ကရင်ပြည်နယ်၊ မြဝတီမြို့အပြင်ဘက် မဲကနယ်ကျေးရွာအနီးတဝိုက်ကို ဧပြီ ၂၂ ရက် ဒီမနက်အစောပိုင်း  ၁ နာရီက စစ်ကောင်စီက လက်နက်ကြီးနဲ့ပစ်ခတ်၊ လေကြောင်းကနေ ဗုံးကြဲတိုက်ခိုက်ပြီးနောက် မြေပြင်ကနေ စစ်ကြောင်းထိုးဖို့ကြိုးစားနေတယ်လို့ စစ်မြေပြင်သတင်းရင်းမြစ်ဆီကနေ သိရပါတယ်။

စစ်ကောင်စီနဲ့ ပူးပေါင်းတပ်တွေဟာ မနေ့မနက်ပိုင်းကစပြီး ထို့ကော်ကိုးလမ်းကနေ ကား ၁၀ စီး၊ ဘားအံ-ကော့ကရိတ်လမ်းအတိုင်း ကားအစီး ၃၀ နဲ့ မြဝတီမြို့နယ်ကို ဝင်ရောက်လာခဲ့ပြီးနောက် လတ်တလော တိုက်ပွဲတွေဖြစ်ပွားနေတဲ့ မဲကနယ်ကျေးရွာအနီးတဝိုက်ကို စစ်ကြောင်းထိုး ဝင်ရောက်ဖို့ကြိုးစားနေတာလို့ သတင်းရင်းမြစ်က ပြောပါတယ်။

အဆိုပါတိုက်ခိုက်မှုတွေမှာ  ဒေသခံတွေ ထိခိုက်ဒဏ်ရာရတဲ့ အခြေအနေကိုတော့ လတ်တလော မသိရသေးပါဘူး။

စစ်ကောင်စီပူးပေါင်းတပ်တွေဟာ နယ်မြေလုံခြုံရေးရယူထားတဲ့ ကော်ဘရာစစ်ကြောင်းတွေရှိရာကို စစ်ကြောင်းထိုးဖို့ မဲကနယ်ကျေးရွာကို ညပိုင်းတည်းကဝင်ရောက်လာတယ်လို့လည်း ဒေသခံတွေဆီက သိရပါတယ်။

ဒေသခံကျေးရွာသားတဦးက”ညက ရွာထဲကို စစ်ကြောင်းထိုးဝင်ရောက်လာတယ်။ အရင်တခေါက်က အထိနာပြီး ပြန်ဆုတ်သွားတယ်။ အခုက အင်းအားများတယ်၊၊ ကော်ဘရာစစ်ကြောင်းတွေရှိတဲ့ဘက်ကို တက်ရင် တိုက်ပွဲဖြစ်ဖို့က သေချာတယ်”လို့ ပြောပါတယ်။

ဧပြီ ၉ ရက်ကစတင်ပြီး မဲကနယ်ကျေးရွာအတွင်းကို စစ်ကောင်စီက လက်နက်ကြီးနဲ့ပစ်ခတ်တာ၊ လေကြောင်းက ဗုံးကြဲတိုက်ခိုက်တာအပြင်  နယ်ခြေားစောင့်တပ်(BGF)ပူးပေါင်းအဖွဲ့တွေရဲ့ မီးရှို့ဖျက်ဆီးတာတွေကြောင့် နေအိမ်အလုံး ၆၀ အထိရှိနေပြီလို့ ဒေသခံတွေက ပြောပါတယ်။

မြဝတီမြို့အပြင်ဘက်မှာ စစ်ကောင်စီပူးပေါင်းတပ်တွေနဲ့ KNLA တော်လှန်ရေးတပ်ပေါင်းစုတွေ တိုက်ပွဲတွေဖြစ်ပွားနေပြီး စစ်ရေးတင်းမာနေတဲ့အတွက် ဒေသခံပြည်သူ ၁၀၀၀ ကျော်ဟာ ထွက်ပြေးတိမ်းရှောင်ခဲ့ရပါတယ်။

နှစ်ဖက်တိုက်ပွဲတွေကြောင့် ထွက်ပြေးတိမ်းရှောင်ခဲ့ရတဲ့ စစ်ဘေးရှောင်ပြည်သူတွေထဲမှာ မသန်စွမ်း သက်ကြီးရွယ်အိုတွေ၊ မီးဖွားခါနီးကိုယ်ဝန်ဆောင်အမျိုးသမီးတွေ၊ မီးဖွားပြီးစမိခင်တွေဟာ ကျန်းမာရေးစောင့်ရှောက်မှုတွေ၊ ဆေးဝါးလိုအပ်ချက်တွေရှိနေတဲ့အပြင် နေထိုင်စားသောက်ရေးမှာ ကူညီလှူဒါန်းသူတွေမရှိတဲ့အတွက် အခက်အခဲတွေနဲ့ရင်ဆိုင်နေရပါတယ်။

တိုက်ပွဲတွေကြောင့် တိမ်းရှောင်ထွက်ပြေးရာက ကျေးရွာအတွင်း ပြန်လည်ဝင်ရောက်ခဲ့တဲ့ ဒေသခံကျေးရွာသား ၇၀ နီးပါးကို စစ်ကောင်စီနဲ့နယ်ခြားစောင့်တပ်ဖွဲ့တွေရဲ့ ဖမ်းဆီးထိန်းသိမ်းခံထားရတယ်လို့ ဧပြီ ၂၀ ရက် မွန်းတည့် ၁၂ နာရီမှာ ထွက်ပြေးလွတ်မြောက်လာတဲ့ ဒေသခံတွေက ဒီဗွီဘီကို ပြောပါတယ်။

ဧပြီ ၁၁ ရက် မနက်ပိုင်းက ကရင်ပြည်နယ်၊ မြဝတီမြို့ပြင်ဘက် မဲကနယ်ကျေးရွာအနီးမှာ  စစ်ကောင်စီ၊ နယ်ခြားစောင့်တပ်ဖွဲ့တွေနဲ့ KNLA ပူးပေါင်းတပ်ဖွဲ့တို့  နှစ်ဖက်တိုက်ပွဲ‌တွေ ပြင်းထန်ခဲ့သလို လေကြောင်းတိုက်ခိုက်မှုတွေကြောင့် ဒေသခံပြည်သူတချို့ ထွက်ပြေးတိမ်းရှောင်ခဲ့ရတယ်လို့ ဆိုပါတယ်။ 

သင်္ကြန်ကာလ ဧပြီ ၁၃ ရက်နေ့က တိုက်ပွဲတွေ ခေတ္တငြိမ်သက်ချိန် ကျေးရွာက နေအိမ်နဲ့ တိရစ္ဆာန်တွေကို ပြန်လည်ကြည့်ရှုစဉ် အခုလို ဖမ်းဆီးထိန်းသိမ်းခံခဲ့ရတာပါ။

ဒေသခံပြည်သူတွေဟာ စစ်ကောင်စီရဲ့ လက်နက်ကြီးအပြင် လေကြောင်းတိုက်ခိုက်မှုတွေကို စိုးရိမ်ကြောက်လန့်နေကြတယ်လို့ ထွက်ပြေးလွတ်မြောက်လာတဲ့ ဒေသခံရွာသားတဦးက ပြောပါတယ်။

“တိုက်ပွဲတွေငြိမ်လို့ ရွာမှာကျန်ခဲ့တဲ့ အိမ်နဲ့ အိမ်မွေးတိရစ္ဆာန်တွေကို ပြန်ကြည့်တဲ့သူနဲ့ တချို့မပြေးဘဲ ကျန်နေတဲ့သူ ၇၀ လောက်ရှိတယ်။ ဘယ်သူမှ ရွာပြင်ပေးမထွက်ဘူး။ ထွက်တဲ့သူကို ပစ်သတ်မယ်လို့ ခြိမ်ခြောက်ထားတယ်။ တဖက်မှာလည်း တိုက်ပွဲတွေကပြန်ဖြစ်နေတာ။ လက်နက်ကြီးကော၊ လေကြောင်းကကော နေ့ညရန်းသမ်းပစ်နေတော့ ရွာသားတွေက စိုးရိမ်ကြောက်လန့်တာပေါ့။ ထွက်လည်း မပြေးရဲဘူး။ ကျနော်တောင် တိုက်ပွဲဖြစ်တုန်း ကံကောင်းလို့ လွတ်လာတာ။”

စစ်ကောင်စီက မြေပြင်ကနေ လက်နက်ကြီးပစ်ခတ်တာ၊ လေကြောင်းကနေ ဗုံးကြဲတိုက်ခိုက်ခဲ့တဲ့အတွက် မဲကနယ်ကျေးရွာအတွင်းက ဘုရားကျောင်းအပါအဝင် နေအိမ်တချို့ မီးလောင်ပျက်စီးခဲ့ရသလို စစ်ကောင်စီနဲ့ နယ်ခြားစောင့်တပ်တွေက ကျေးရွာအတွင်းက နေအိမ် အလုံး ၃၀ ကျော်ကို မီးရှို့ဖျက်ဆီးလိုက်တယ်လို့လည်း ပြောပါတယ်။

ဒါအပြင် စစ်ကောင်စီပူးပေါင်းတပ်တွေက ဒေသခံပြည်သူတွေပိုင်ဆိုင်တဲ့  ကား၊ ဆိုင်ကယ်၊ အိမ်တွင်းပစ္စည်းတွေကို နေတိုင်းလိုလို ဆယ်ဘီးကားနဲ့ ယူဆောင်သွားတဲ့အပြင် အိမ်မွေးတိရစ္ဆာန်တွေကို ဖမ်းယူစားသောက်တာတွေရှိတယ်လို့ ဒေသခံတွေက ပြောပါတယ်။

နှစ်ဖက်တိုက်ပွဲတွေကြောင့် မြစန္နီ၊ မဲကနယ်ကျေးရွာနဲ့ အနီးအနားကျေးရွာက ဒေသခံပြည်သူ ၁၀၀၀ ကျော်ဟာ သေ့ဘောပိုး၊ ဖလူး၊ ဆွေမျိုးတွေရှိရာ သောင်းရင်းမြစ်တဖက်ကမ်းက မော်လီချိုင်းကျေးရွာနဲ့ နီးစပ်ရာဆွေမျိုးတွေရှိရာ ကျေးရွာတွေမှာ ဒီကနေ့အထိ ထွက်ပြေးတိမ်းရှောင်နေရပါတယ်။