မဲဆွယ်စည်းရုံးရေး

October 20, 2022

မလေးရှားအထွေထွေရွေးကောက်ပွဲ နိုဝင်ဘာ ၁၉ ရက်နေ့ ကျင်းပမည်

မဲပေးခွင့်အရည်အချင်းပြည့်မီတဲ့ မလေးရှားနိုင်ငံသား ၂၁ သန်းလောက်ဟာ နိုင်ငံရဲ့ လာမယ့် အထွေထွေရွေးကောက်ပွဲအတွက် နိုဝင်ဘာ ၁၉ ရက်မှာ မဲရုံတွေဆီ မဲသွားပေးရတော့မှာဖြစ်ကြောင်း ရွေးကောက်ပွဲကော်မရှင်က အောက်တိုဘာ ၂၀ ရက်နေ့မှာ ပြောကြားပါတယ်။

ဒီရွေးကောက်ပွဲမှာ အကျင့်ပျက်ခြစားမှုနဲ့ နာမည်ဆိုးထွက်နေတဲ့ အာဏာရပါတီကလည်း သူတို့ အာဏာကို ဆက်ကိုင်စွဲထားနိုင်မယ်လို့ ယုံကြည်ထားပါတယ်။

မဲဆွယ်စည်းရုံးတာကို ၂ ပတ်ကြာ ကျင်းပမှာဖြစ်ပြီး ကိုယ်စားလှယ်လောင်းတွေဟာ နိုဝင်ဘာ ၅ ရက်မှာ သူတို့ရဲ့နာမည်စာရင်း တင်သွင်းရမှာဖြစ်ကြောင်း ရွေးကောက်ပွဲကော်မရှင်ဥက္ကဋ္ဌ အက်ဗ်ဒူ ဂါနီ ဆာလကက ကြာသပတေးနေ့ သတင်းစာရှင်းလင်းပွဲမှာ ပြောကြားခဲ့ပါတယ်။

ညီညွတ်သော မလေးအမျိုးသားအဖွဲ့ (UMNO) ရဲ့ ဝန်ကြီးချုပ်အမတ်လောင်းအဖြစ် အမည်စာရင်း ထပ်ပြီး တင်သွင်းခံရတဲ့ ဝန်ကြီးချုပ် အစ္စမေးလ် ဆာဘရီ ယာကော့ဘ်ဟာ အောက်တိုဘာ ၁၀ ရက်က လွှတ်တော်ကို ဖျက်သိမ်းခဲ့ပါတယ်။

ဝန်ကြီးချုပ် အစ္စမေးလ်ဟာ လျှပ်တပြက် ရွေးကောက်ပွဲတွေပြုလုပ်ဖို့ တောင်းဆိုခဲ့ပြီး ရွေးကောက်ပွဲက နှစ်ပေါင်းများစွာ နိုင်ငံရေးမတည်မငြိမ်ဖြစ်မှုကို အဆုံးသတ်မယ်လို့ ဆိုထားပါတယ်။

အတိုက်အခံတွေ ဝရုန်းသုန်းကား ဖြစ်နေတဲ့အတွက် လာမယ့်လ ရွေးကောက်ပွဲမှာ UMNO က အနည်းငယ် အားသာနိုင်တယ်လို့ ခန့်မှန်းထားပါတယ်။

မဲဆန္ဒရှင်တွေရဲ့ စိတ်မထက်သန်မှုတွေနဲ့ မုတ်သုံရာသီဥတုကြောင့် မဲလာပေးမယ့် အရေအတွက် နည်းပါးမယ်လို့ လေ့လာသူတွေက ခန့်မှန်းထားပါတယ်။

12 hours Ago

October 17, 2020

1.1K

ဘီးလင်းတွင် Stay at Home ကြောင့် နိုင်ငံရေးပါတီများ မဲဆွယ်စည်းရုံးရေး အခက်အခဲကြုံ

မွန်ပြည်နယ်၊ ဘီးလင်းမြို့နယ်ထဲမှာ ကိုဗစ်-၁၉ အတည်ပြုလူနာများလာပြီး Stay at Home ကြေညာထားတဲ့အတွက် မဲဆွယ်စည်းရုံးဖို့ အခက်အခဲတွေ ရှိနေတယ်လို့ နိုင်ငံရေးပါတီတွေက ပြောပါတယ်။ အမျိုးသားဒီမိုကရေစီအဖွဲ့ချုပ်ကတော့ ဘီးလင်းမြို့နယ် မဲဆန္ဒရှင်ပြည်သူတွေအတွက် လူမှုကွန်ရက် facebook စာမျက်နှာကနေတဆင့် မဲဆွယ်စည်းရုံးနေရတယ်လို့ မြို့နယ်ပါတီဥက္ကဋ္ဌ ဦးကျော်မျိုးမင်းက ပြောပါတယ်။ “ဒီကာလက လူစုလူဝေးလည်း လုပ်လို့မရတော့ ငုတ်တုတ်ထိုင်နေရတာပေါ့။ ရပ်ကျေးဆိုင်းဘုတ်တင်တာတို့ ပန်းဖလပ်ဝေတာတို့ကျတော့ အလှပြယာဉ် ၂ စင်းလောက်နဲ့ ထွက်တာတော့ရှိတယ်။ ဒီလိုထွက်တဲ့အပေါ်မှာလည်း ရွာတွေထဲထိ ဝင်တာမရှိပါဘူး။ အဓိက Lock Down ချထားတဲ့ နေရာတွေဆိုရင် ဘာမှကို အဆက်အသွယ်မရှိတော့ပါဘူး။ ပြောရရင် ကိုဗစ်လည်း အနိုင်ယူ အောင်နိုင်ရေးလည်း အနိုင်ယူဆိုသလို လူမှုကွန်ရက် facebook စာမျက်နှာကနေ တစ်ဆင့်ပဲ ကိုယ်စားလှယ်လောင်းတွေက လုပ်ဆောင်နေကြရတယ်။ တိုင်းရင်းသားပါတီတွေအနေနဲ့ကလည်း သူတို့အနေအထားနဲ့ စည်းရုံးရေးတော့ လုပ်နေကြတာပဲ။” ဘီးလင်းမြို့နယ်ထဲမှာ လာမယ့် ၂၀၂၀ ရွေးကောက်ပွဲအတွင်း ကရင်ပြည်သူ့ပါတီ၊ ညီညွတ်သောတိုင်းရင်းသား လူမျိုးများ ဒီမိုကရေစီပါတီ အပါအ၀င် ပါတီပေါင်း ၉ ပါတီက ကိုယ်စားလှယ်လောင်း ၅၃ဦးက ပါဝင်ယှဉ်ပြိုင်သွားမယ်လို့ သိရပါတယ်။ ဘီးလင်းမြို့နယ်မှာ နိုင်ငံရေးပါတီကြီးတွေအနေနဲ့ မဲဆွယ်စည်းရုံးမှုကို ကျယ်ကျယ်ပြန့်ပြန့် မလုပ်ဆောင်နိုင်တဲ့အပြင် ရပ်ကျေးပါတီဆိုင်းဘုတ်ထောင်တာတွေ၊ ပါတီအမာခံတွေကတဆင့် ပြည်သူတွေ မဲပေးမှုစနစ်မှန်ကန်အောင် အသိပညာပေးမှုတွေ၊ ကျန်းမာရေးနှင့်အားကစားဝန်ကြီးဌာနက ထုတ်ပြန်ချက်တွေ၊ ရွေးကောက်ပွဲကော်မရှင် ထုတ်ပြန်ချက်တွေနဲ့အညီ မဲဆွယ်မှုတွေကိုပြုလုပ်နေကြပါတယ်။ ဘီးလင်းမြို့နယ် ညီညွတ်သောတိုင်းရင်းသားလူမျိုးများ ဒီမိုကရေစီပါတီ ပြည်သူ့ လွှတ်တော်ကိုယ်စားလှယ် ဒေါ်စန္ဒာက “ကျမတို့ပါတီရုံး စတည်ထူထောင်ချိန်က ကိုဗစ်ပထမလှိုင်းနဲ့ ဆုံတယ်။ ဒုတိယလှိုင်းပြန်လာတဲ့အခါကျတော့လည်း Stay Home နဲ့ ကိုဗစ်-၁၉ ဥပဒေတွေကြောင့် မဲဆွယ်စည်းရုံးမှုက အခက်ခဲတွေဖြစ်လာတာပေါ့။ တစ်ချို့ရွာတွေကျတော့ ပေးမ၀င်တာတွေရှိတယ်။ ကျမတို့ပါတီကလည်း ဒီမိုကရေစီပါတီဖြစ်တဲ့အတွက် တန်းတူအခွင့်အရေးကို ဦးစားပေးတဲ့အနေနဲ့ မဲဆွယ်စည်းရုံးမှုကို နားထားပါတယ်။ ဥပမာ မဲဆွယ်သွားတဲ့သူတွေထဲက တစ်ယောက်ယောက်ကို ကူးစက်သွားမယ်ဆိုရင်လည်း မကောင်းဘူး။ အဓိက မဲရခြင်းမရခြင်းထက် ပြည်သူတွေရဲ့ကျန်းမာရေးက အရေးကြီးပါတယ်” လို့ ပြောပါတယ်။ ဘီးလင်းမြို့နယ်ထဲမှာ Lock Down Area ၈ ခု သတ်မှတ်ထားရာကနေ ၇ ခု ပြန်လည်ဖြေလျှော့ပေးခဲ့တယ်လို့ ဘီးလင်းမြို့နယ်အထွေထွေအုပ်ချုပ်ရေးဦးစီးဌာနရုံးက သိရပါတယ်။ ဘီးလင်းမြို့နယ်မှာ အောက်တိုဘာ ၁၃ ရက်နေ့အထိ ကိုဗစ်-၁၉ အတည်ပြုလူနာ ၉၀ ကျော်ရှိခဲ့ပြီး ရောဂါသက်သာလာတဲ့အတွက် ဆေးရုံဆင်းသူ ၆၀ ကျော်ရှိပြီလို့ သိရပါတယ်။ သတင်း၊ ဓာတ်ပုံ - ယူမင်းစိုး

2 years Ago