ဗီယက်နမ်အလယ်ပိုင်း ကမ်းရိုးတန်းမှာရှိတဲ့ သမိုင်းဝင် ရှေးဟောင်းမြို့တော် ဟွိုင်အန်းကို တိုင်ဖွန်း နိုရူ စက်တင်ဘာ ၂၈ ရက်က ဝင်ရောက်တိုက်ခတ်ပြီးနောက် ရေကြီးရေလျှံခဲ့ပြီး သစ်ပင်တွေ ပြိုလဲခဲ့သလို မြစ်ကမ်းပါးတွေ ပြိုကျကာ ရှေးဟောင်းအမွေအနှစ်နေရာကို သွားတဲ့လမ်းတွေ ပိတ်ဆို့ကုန်ပါတယ်။
တိုင်ဖွန်းမုန်တိုင်းကနေ အပူပိုင်းမုန်တိုင်းအဖြစ် အဆင့်လျော့ကျလာတဲ့ နိုရူဟာ ကွမ်နမ်ပြည်နယ်မှာ တနာရီ လေတိုက်နှုန်း ၇၂ မိုင်နဲ့ ကုန်းတွင်းပိုင်းကို ဝင်ရောက်ခဲ့တာပါ။
ရေကြီးရေလျှံတာနဲ့ မြေပြိုတဲ့အန္တရာယ်တွေရှိလို့ ဒေသခံတွေ ထိခိုက်သေဆုံးတဲ့ သတင်းတွေ ချက်ချင်းမထုတ်ပြန်နိုင်သေးဘူးလို့ အာဏာပိုင်တွေက သတိပေးထားပါတယ်။
နိုရူဟာ အခုနှစ်မှာ အိမ်နီးချင်း ဖိလစ်ပိုင်ကို ဝင်ရောက်တိုက်ခတ်တဲ့ အပြင်းထန်ဆုံး မုန်တိုင်းဖြစ်ပြီး စက်တင်ဘာ ၂၄ ရက် ညပိုင်းက ကုန်းတွင်းပိုင်းကို ဝင်ရောက်ခဲ့တာပါ။
လူ ၈ ယောက်ထက်မနည်း သေဆုံးပြီး လယ်မြေတွေနဲ့ လူမှုအသိုင်းအဝိုင်းတွေ ရေနစ်မြုပ်ကုန်တဲ့အပြင် အဓိကအားဖြင့် ဆန်စပါးတွေ ပျက်စီးခဲ့ပါတယ်။
ဗီယက်နမ်ဟာ သူ့ရဲ့ ရှည်လျားတဲ့ ကမ်းရိုးတန်းကြောင့် အပျက်အစီးများတဲ့ မုန်တိုင်းတွေနဲ့ ရေလွှမ်းမိုးမှုဒဏ်တွေကို ခံနေရတာပါ။
မုန်တိုင်းကြောင့် ရေကြီး၊ မြေပြိုတာတွေ အများစုပါတဲ့ သဘာဝဘေးအန္တရာယ်တွေကြောင့် မနှစ်က လူ ၁၃၉ ယောက် သေဆုံးပြီး အယောက် ၁၅၀ ဒဏ်ရာရရှိခဲ့ပါတယ်။
ဟွိုင်အန်းမြို့ဟာ ကျဉ်းမြောင်းပြီး အကွေ့အကောက်များတဲ့လမ်းတွေနဲ့ တရုတ်ပုံစံ အိမ်ဆိုင်တွေပါတဲ့ လမ်းလျှောက်ဖို့ အင်မတန်လှတဲ့ ရှုခင်းတွေရှိလို့ ကုလသမဂ္ဂ ယဉ်ကျေးမှုအဖွဲ့ကြီး ယူနက်စကိုရဲ့ ကမ္ဘာ့အမွေအနှစ်နေရာအဖြစ် သတ်မှတ်ထားပါတယ်။
