မြန်မာနိုင်ငံ၊ ကရင်ပြည်နယ်ရှိ စစ်ဘေးရှောင်ပြည်သူတွေအတွက် ရန်ပုံငွေရှာဂီတဖျော်ဖြေပွဲကို  ကရင်တိုင်းရင်းသူ တေးသံရှင် နော်မာသထူးဝါးအပါအဝင် ကိုးရီးယားတေးသံရှင်တွေ ပူးပေါင်းပြီး တောင်းကိုရီးယားနိုင်ငံ၊ အင်ချွန်းမြို့၊ ဖျောင်းဂန်းဘုရားကျောင်းခန်းမမှာ  မတ်လ ၁၈ ရက် ဒီနေ့ ညမှာ ကျင်းပဖို့ရှိနေပါတယ်။

ဂီတဖျော်‌‌ဖြေပွဲကို ကိုရီးယားရောက်ကရင်ကွန်မြူနတီ (KCK)အဖွဲ့၊ KEEN (Karen Equipped Embrace Nation) အဖွဲ့နဲ့ ဖျောင်းဂန်း‌ (တောင်ကိုရီးယား) အသင်းတော်တို့ ပူးပေါင်းပြီး စီစဉ်တာဖြစ်ပါတယ်။

ထိုင်း - မြန်မာနယ်စပ်ကနေ ကိုးရီးယားနိုင်ငံကိုရောက်လာတဲ့ ကရင်တိုင်းရင်းသားတွေနဲ့ တောင်ကိုးရီးယားပြည်သူတွေအကြား ကောင်းမွန်စွာ အတူယှဥ်တွဲနေထိုင်မှုကို ဖေါ်ပြလိုတာနဲ့ လက်ရှိ နွေဦးတော်လှန်ရေးနဲ့ မြန်မာ့လွတ်လပ်ရေးတိုက်ပွဲကြောင့် ကရင်ပြည်နယ်ကို ရောက်ရှိနေကြတဲ့ မြန်မာနိုင်ငံသားတွေအရေးကို ကိုးရီးယားနိုင်ငံသားတွေက အာရုံစိုက်စေရေး ရည်ရွယ်ကျင်းပတာလို့  ဂီတဖျော်ဖြေပွဲစီစဥ်တဲ့ KCK တာဝန်ရှိသူ တဦးက ဒီဗွီဘီကို ပြောပါတယ်။

ဒီဖျော်ဖြေပွဲမှာ နော်မာသထူးဝါး(ဝါန်နီဟွာ)နဲ့အတူ ကိုရီးယားအဆိုတော်တွေဖြစ်တဲ့ ဂျောင်ချိုအာ၊ ချားဆူးဂယောင်၊ ဂန်အူးဂျင်၊ ကင်အာလင်း၊ လီဂန်ဂျွန်တို့ပါဝင် သီဆိုကြမှာ ကရင် လူငယ်တေးဂီတဝိုင်းနဲ့ ကိုးရီးယားဂီတပညာရှင်တွေ ပူးပေါင်းပြီး တီးခတ်သွားကြမှာ ဖြစ်ပါတယ်။

တေးသံရှင် နော်မာသထူးဝါဟာ ထိုင်း-မြန်မာနယ်စပ်ကနေ ကိုရီးယားနိုင်ငံမှာ သွားရောက် အခြေချနေထိုင်ခဲ့သူဖြစ်ပြီး ငယ်စဉ်ကတည်းက သီချင်းဆိုပြိုင်ပွဲမှာ ဝင်ရောက်ယှဉ်ပြိုင်ခဲ့ရာက   တစိုက်မတ်မတ် ကြိုးစားလေ့လာသင်ယူရင်း တောင်ကိုးရီးယားနိုင်ငံမှာ လူသိများတဲ့ တေးသံရှင်တယောက် ဖြစ်လာခဲ့ပါတယ်။

နော်မာသထူးဝါဟာကို တောင်ကိုးရီးယားနိုင်ငံ၊ ဂယောင်ဂီပြည်နယ် မီးသတ်ဌာနချုပ် (မီးဘေးဒုက္ခသည်များကူညီကယ်ဆယ်ရေးဌာန)က ပြန်ကြားရေးသံတမန်အဖြစ် မတ်လ ၁၀ ရက်နေ့မှာ ဂုဏ်ပြု ခန့်အပ်ခဲ့ပါတယ်။

အခုဂီတ ဖျော်ဖြေပွဲကို ဝင်ကြေး လက်မှတ်တစ်စောင် ကိုရီးယား ဝမ်ငွေ ၂၀၀၀၀ သတ်မှတ်ထားပြီး  ရရှိလာတဲ့ အလှူတွေကို ကရင်ပြည်နယ်ရှိ စစ်ဘေးဒဏ်ခံနေရတဲ့ ပြည်သူတွေအတွက် စားနပ်ရိက္ခာနဲ့ ဆေးဝါးတွေလှူဒါန်းမှာဖြစ်သလို လွတ်မြောက်နယ်မြေသို့ ရောက်ရှိနေတဲ့ တိုင်းရင်းသားညီအစ်ကို မောင်နှမတွေ ထံသို့ လှူဒါန်းသွားမယ်လို့ ပွဲစီစဉ်သူတွေက ပြောပါတယ်။

ရန်ပုံငွေတွေကို ထိုင်းနိုင်ငံ မဲဆောက်မြို့ အခြေစိုက် ကရင်ဒုက္ခသည်ကော်မတီ (KRC) နဲ့ တခြား NGO တွေကနေတဆင့် ချိတ်ဆက်ပြီး စစ်ဘေးရှောင်ပြည်သူတွေထံ ထိထိရောက်ရောက် ပို့ဆောင် သွားမယ်လို့လည်း သိရပါတယ်။

အိန္ဒိယနိုင်ငံ မဏိပူရ်ပြည်နယ် ချူရချမ်ပူရ်ခရိုင် နယူးလန်ကားမြို့မှာ စစ်ဘေးတိမ်းရှောင်ရင်း ရက်ကန်းလုပ်ငန်း လုပ်ကိုင်နေတဲ့ မြန်မာနိုင်ငံသား ၁၀ ဦးကို မဏိပူရ်ပြည်နယ်ရဲတပ်ဖွဲ့က ဖမ်းဆီးသွားတယ်လို့ သိရပါတယ်။

ဖေဖော်ဝါရီ ၅ ရက်‌ ညပိုင်းက မဏိပူရ်ပြည်နယ်ရဲတွေက စစ်ဘေးရှာင်‌တွေ အလုပ်လုပ်နေတဲ့ ရက်ကန်းရုံမှာ ဝင်ဖမ်းသွားတာဖြစ်ပြီး အိန္ဒိယရဲတပ်ဖွဲ့‌တွေရဲ့ ဖမ်းဆီးမှု‌ကြောင့် စစ်ဘေးရှောင်အများစု တိမ်းရှောင်နေကြရတယ်လို့ မဏိပူရ်ပြည်မှာ‌‌နေတဲ့ လူငယ်တဦးက ပြောပါတယ်။

ဖမ်းခံရသူအများစုဟာ စစ်ကိုင်းတိုင်း မုံရွာမြို့နယ်နဲ့ ကလေးမြို့ဘက်ကနေ ဒေသတွင်း တိုက်ပွဲတွေနဲ့ နိုင်ငံရေးမတည်ငြိမ်မှုကြောင့် မဏိပူရ်ပြည်နယ်ဘက် ထွက်ပြေးတိမ်းရှောင်ကာ ရက်ကန်းခတ် အသက်မွေးဝမ်းကျောင်းရှာဖွေနေကြတာဖြစ်ပြီး ဖမ်းဆီးခံရသူတွေကို မဏိပူပြည်နယ်ရဲတပ်ဖွဲ့က နိုင်ငံခြားသားအက်ဥပဒေအရ အရေးယူဆောင်ရွက်သွားမယ်လို့ ဆိုပါတယ်။

မဏိပူရ်ပြည်နယ် နယူးလန်ကားမြို့နယ်မှာ မြန်မာနိုင်ငံက ရက်ကန်းသမား ရာဂဏန်းလောက်ရှိကြပြီး ပြီးခဲ့တဲ့နှစ် ဇွန် ၂၈ ရက်ကလည်း မဏိပူရ်ပြည်နယ်အစိုးရက ရက်ကန်းရက်သူ ၈၀ ကျော်ကို ဖမ်းဆီးခဲ့ပါသေးတယ်။

စစ်ဘေးရှောင်တွေရဲ့ ပြောပြချက်အရ မဏိပူရ်ပြည်နယ်မှာ ဖမ်းဆီးခံရတဲ့ မြန်မာစစ်ဘေးရှောင် ၁၅၀ ကျော်ရှိနေပြီလို့ ဆိုပါတယ်။

ပြီးခဲ့တဲ့ ဇန်နဝါရီ ၂၇ ရက်ကလည်း မိုးရေးမြို့နယ် လန်းချန်းကျေးရွာနဲ့ နီးယူ ဆလ်ဘုန်းကျေးရွာမှာ ခိုလှုံနေကြတဲ့ မြန်မာစစ်ဘေးရှောင် အမျိုးသား အယောက် ၈၀ ကျော်ကို မဏိပူရ်ရဲတပ်ဖွဲ့က ဖမ်းဆီးခဲ့ပါသေးတယ်။