တိုင်းရင်းသားပြည်သူတွေအပေါ် စစ်ရာဇဝတ်မှုတွေကျူးလွန်နေတဲ့ မြန်မာစစ်တပ်ကို မြန်မာနိုင်ငံသား ၁၆ ဦးနဲ့  လူ့အခွင့်အရေးလှုပ်ရှားနေတဲ့ Fortify Rights အဖွဲ့တို့စုပေါင်းပြီး ဂျာမနီနိုင်ငံရှိ နိုင်ငံတကာတရားရုံးမှာ တရားစွဲဆိုထားတယ်လို့ ဇန်နဝါရီ ၂၄ ရက်မှာ ကြေညာပါတယ်။

၂၀၂၁ ခုနှစ် အာဏာသိမ်းပြီးနောက် တိုင်းရင်းသားလူမျိုးတွေအပေါ်ကျူးလွန်ခဲ့တဲ့ ပြစ်မှုတွေအပါအဝင် ၂၀၁၇ ခုနှစ်က မွတ်စလင်တွေအပေါ် ကျူးလွန်ခဲ့ကြတဲ့ စစ်ရာဇဝတ်မှုတွေကို မြန်မာစစ်တပ်ခေါင်းဆောင်တွေ တာဝန်ယူမှုရှိစေရမယ်လို့ Fortify Rights အဖွဲ့ရဲ့ ထုတ်ပြန်ချက်မှာ ရေးသားဖော်ပြပါတယ်။

Fortify Rights အဖွဲ့နဲ့အတူ ပူးပေါင်းပြီး တရားစွဲဆိုသူ မြန်မာနိုင်ငံသား ၁၆ ဦးထဲမှာ  ၂၀၁၇ ခုနှစ်ကြမ်းကြုတ်ရက်စက်မှုဒဏ်ကို ရင်ဆိုင်ခဲ့ရတဲ့ မွတ်စလင်တွေ၊ ၂၀၂၁ ခုနှစ် စစ်အာဏာသိမ်းပြီး နောက်ပိုင်း လူ့အခွင့်အရေးချိုးဖောက်မှု ရင်ဆိုင်ခဲ့ရတဲ့ ကျောင်းသား၊ ပညာရှင်၊ လယ်သမား၊ ရပ်ကျေးအုပ်ချုပ်ရေးမှူးတွေနဲ့ အိမ်ရှင်မတွေပါ ပါဝင်တာဖြစ်ပါတယ်။

Fortify Rights အဖွဲ့ ပူးတွဲထူထောင်သူ အတွင်းရေးမှူး မက်သယူးစမစ်က “စစ်ရာဇတ်မူမှာ အစုလိုက်အပြုံလိုက် သတ်ဖြတ်ခံရမှုတွေ ကျူးလွန်ခြင်းတွေအတွက် ပြစ်မှုတွေဟာ နိုင်ငံတကာအသိုင်းအဝိုင်း တစ်ခုလုံးကို ကိုယ်စားပြုနိုင်လောက်တဲ့အထိ ကြီးမားနေပြီး ထိုဒေသရှိ လူမျိုးမရွေး ဘာသာမရွေး အပြည်ပြည်ဆိုင်ရာ တရားရုံးတွေမှာ တရားစွဲဆိုပိုင်ခွင့်ရှိတယ်” လို့ ပြောပါတယ်။

တရားစွဲဆိုရာမှာ သက်သေတွေအဖြစ် အသက်ရှင်ကျန်ရစ်သူတွေရဲ့ တွေ့ဆုံမေးမြန်းချက်တွေ၊ မြန်မာစစ်တပ်ထဲက ထွက်ပြေးလာသူတွေထံက ပေါက်ကြားလာတဲ့ အချက်အလက်တွေ၊ ကုလသမဂ္ဂစုံစမ်းစစ်ဆေးရေးမှူးနဲ့ တခြားအဖွဲ့အစည်းတွေက ထုတ်ပြန်ထားတဲ့ အစီရင်ခံစာတွေ ပူးတွဲ တင်ပြထားပါတယ်။

မြန်မာစစ်တပ်ကို အပြည်ပြည်ဆိုင်ရာ ရာဇဝတ်မှုတရားရုံး (ICC) နဲ့ အပြည်ပြည်ဆိုင်ရာတရားရုံး (ICJ) တို့မှာလည်း လူမျိုးတုံးသတ်ဖြတ်မှုနဲ့ တရားစွဲဆိုထားကာ စုံစမ်းစစ်ဆေးနေတဲ့အပြင် အာဂျင်တီးနား၊ တူရကီနဲ့ ဩစတြေးလျ တရားရုံးတွေမှာလည်း တရားစွဲဖို့ ဆောင်ရွက်နေတာ တွေရှိပါတယ်။

Photo-Fortify Rights

ထိုင်းနိုင်ငံ၊ ရနောင်းမြို့ရှိ နေအိမ်တစ်လုံးကို ဒီဇင်ဘာ ၁၀ ရက်နေ့က တရားမဝင် ရောက်ရှိလာတဲ့ မြန်မာနိုင်ငံသား ၁၆ ယောက်နဲ့  သူတို့ကို ကူညီပေးတယ်လို့ ယူဆရတဲ့ ထိုင်းလူမျိုး ၃ ယောက်ကို ထိုင်းစစ်သားတွေက ခြေရာခံလိုက်လာပြီး ဖမ်းဆီးခဲ့တယ်လို့  The Nation ထိုင်းသတင်းမှာ ဖော်ပြပါတယ်။  

စစ်ဆေးမေးမြန်းမှုအတွင်း သူတို့ဟာ မြန်မာနိုင်ငံ ကော့သောင်းမြို့ကနေ ထိုင်းနိုင်ငံ နယ်စပ် ရနောင်းမြို့ကို ထွက်လာပြီးတော့ စောင့်ဆိုင်းနေတဲ့ မော်တော်ဆိုင်ကယ်တွေကနေ အဲ့ဒီအိမ်အထိ ပို့ဆောင်ပေးတာလို့ ဝန်ခံပြောပြပါတယ်။ 

ထိုင်းဘက်ကို တရားမဝင်လာရောက်ဖို့ တယောက်ကို ဘတ် ၂၅၀၀၀ စီ ပေးဆောင်ခဲ့ရတယ်လို့ အဖမ်းခံရသူတွေက  ပြောပါတယ်။ 

ဖမ်းဆီးခံရသူတွေကို မူဝမ်-ရနောင်းရဲစခန်းကို မလွှဲပြောင်းမီ ကိုဗစ်-၁၉ ရောဂါ ရှိ မရှိ စစ်ဆေးခဲ့ ပါတယ်။

ဓာတ်ပုံ- The Nation