မြန်မာနိုင်ငံ ကြက်ခြေနီအသင်းဟာ ကိုဗစ်-၁၉ ကပ်ဘေးကြောင့် ဖြစ်ရတဲ့ အခက်အခဲတွေအပြင် ဖေဖော်ဝါရီ ၁ ရက် အာဏာသိမ်းမှုကြောင့် ကြုံရတဲ့ စီးပွားရေး အကျပ်အတည်းတွေကြောင့် ဘေးဒုက္ခတွေများနေတဲ့ ထောင်သောင်းချီ ပြည်သူလူထုကို အကူအညီတိုးမြှင့်ပေးနေတယ်လို့ ကြက်ခြေနီ အကူအညီပေးရေးအဖွဲ့က ဇွန် ၈ ရက်မှာ ပြောပါတယ်။

လူအတော်များများဟာ ၀င်ငွေရဖို့ ရုန်းကန်နေကြရပြီး ကျန်းမာရေးစောင့်ရှောက်မှုလို အခြေခံ၀န်ဆောင်မှုတွေကို လက်လှမ်းမမီကြဘူးလို့  ကြက်ခြေနီအဖွဲ့ အထွေထွေအတွင်းရေးမှူး ဦးထင်ဇော်စိုးက ကြေညာချက်မှာပြောပါတယ်။

ကြက်ခြေနီအသင်းဟာ အပြည်ပြည်ဆိုင်ရာ ကြက်ခြေနီအသင်းနဲ့ လခြမ်းနီအသင်းများရဲ့ အကူအညီနဲ့ မြန်မာနိုင်ငံတဝန်းရှိ လူပေါင်း ၂၃၆,၀၀၀ ကို ငွေကြေးနဲ့ အစားအစာ အကူအညီတွေ ပါဝင်တဲ့ ထောက်ပံ့မှုတွေ တိုးလုပ်သွားမယ်လို့လည်း ပြောပါတယ်။

ရွေးကောက်တင်မြှောက်ခံ လူထုခေါင်းဆောင် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ထံကို စစ်တပ်က အကြမ်းဖက် အာဏာလု ဖြုတ်ချခဲ့ပြီးကတည်းက လူဦးရေ ၅၃ သန်းရှိတဲ့  တိုင်းပြည်ဟာ ပရမ်းပတာ အရှုပ်အထွေးတွေ ကြုံနေရတာပါ။ 

 စီးပွားရေးကျဆင်းပြီး၊ ဆန္ဒပြမှုတွေလည်း နေ့စဉ်လိုလို ဖြစ်ပွားနေကာ စစ်တပ်အုပ်ချုပ်မှုကို အတိုက်အခံပြုသူ ရာပေါင်းများစွာကို လုံခြုံရေးတပ်ဖွဲ့တွေက သတ်ဖြတ် ခဲသလို ထောင်နဲ့ချီတဲ့ပြည်သူတွေကိုလည်း ဖမ်းဆီးထားတဲ့အပြင် နယ်စပ်ဒေသမှာလည်း တိုက်ပွဲတွေ ဖြစ်ပွားနေပါတယ်။

ကယားပြည်နယ်က တိုက်ပွဲရှောင် ပြည်သူတွေထံ မြန်မာနိုင်ငံ ကြက်ခြေနီအသင်းက လိုအပ်တဲ့ အရေးပေါ်ကယ်ဆယ်ရေးပစ္စည်းတွေ ပေးပို့လှူဒါန်းခဲ့တယ်လို့ သတင်းထုတ်ပြန်ပါတယ်။

ဒီလှူဒါန်းမှုကိုတော့ ကယားပြည်နယ် ကြက်ခြေနီကြီးကြပ်မှုကော်မတီကတဆင့် ဒီးမော့ဆိုမြို့နယ်က တိုက်ပွဲရှောင်ပြည်သူတွေ နေထိုင်ရာ နေရာ ၄ နေရာကို ဖြန့်ဝေပေးခဲ့တာ ဖြစ်ကာ အရေး ပေါ်လိုအပ်တဲ့ တာပေါ်လင်(မိုးကာ)၊ စောင်၊ ခြင်ထောင်၊ ရေသန့်စက်၊ ဆပ်ပြာ၊ ဂျယ်လီကန် (ခေါက်သိမ်းနိုင်သော ရေသိုလှောင်ကန်)၊ ကြိုးခွေ၊ တကိုယ်ရေသန့် ရှင်းရေးသုံးပစ္စည်း၊ မီးဖိုချောင်သုံးပစ္စည်း၊ လက်သန့်ဆေးရည်၊ အိမ်ဆောက်အထောက်အကူပစ္စည်း စတဲ့ ပစ္စည်းတွေ ပါဝင်ပါတယ်။

ဒါ့အပြင် တိုက်ပွဲရှောင်ပြည်သူတွေ ခိုလှုံနေထိုင်ရာ တနေရာမှာ ကြက်ခြေနီ စေတနာ လုပ်အားရှင် ၁၃ ယောက်နဲ့ ရှေးဦးပြုစုခြင်းလုပ်ငန်းတွေ ဆောင်ရွက်ပေးနေပြီး ပြည်သူတွေအတွက် ရှေးဦးပြုစုတာ၊ ကျန်းမာရေးစောင့်ရှောက်မှုနဲ့ ဆေးဝါးအကူအညီတွေ ပေးအပ်နိုင်ဖို့ ဆက်လက် ကြိုးစားဆောင်ရွက်နေတယ်လို့ ဆိုပါတယ်။

နိုင်ငံတဝန်း စစ်အာဏာရှင်ဆန့်ကျင်ရေး ဆန္ဒပြပွဲတွေမှာ ပြည်သူတွေ မြို့ရွာအနှံ့ ပါဝင်နေခဲ့ကြပြီး စစ်တပ်နဲ့ ရဲတပ်ဖွဲ့ဝင်တွေက အကြမ်းဖက် ပစ်ခတ်နှိမ်နင်းမှုတွေနဲ့ အခြေအနေတွေ ပိုမိုတင်းမာလာနေခဲ့ကာ ကယားပြည်နယ်မှာလည်း တိုက်ပွဲတွေ အရှိန်အဟုန်နဲ့ ဆက်လက်ဖြစ်ပွားနေပါတယ်။

လက်ရှိအချိန်မှာတော့ စစ်အာဏာသိမ်းမှု ၃ လခွဲကျော်ရှိလာခဲ့ချိန်မှာ ရဲနဲ့ စစ်တပ်အင်အားစုတွေရဲ့ ပစ်မှတ်ထား အကြမ်းဖက်ဖြိုခွင်းမှုကြောင့် အရပ်ဘက်လူမှုအဖွဲ့အ စည်းတွေ၊ သတင်းသမားတွေ၊ အရပ်သားပြည်သူတွေ ကျဆုံးတာတွေ၊ ထိခိုက်ဒဏ်ရာ ရရှိတာတွေ၊ ဖမ်းဆီးခေါ်ဆောင်တာတွေလည်း ပိုမိုမြင့်တက်နေပါတယ်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း(အေအေပီပီ)ရဲ့ ထုတ်ပြန်ချက်အရ အကြမ်းဖက်စစ်အုပ်စုက ပစ်ခတ်နှိမ်နင်းမှုကြောင့် လက်ရှိအချိန်ထိ ကျဆုံးပြည်သူ ၈၂၇ ယောက်၊ ဖမ်းဆီးထိန်းသိမ်းခံခဲ့ရသူအရေအတွက် ၅,၄၂၁ ယောက်ထိ ရှိခဲ့တယ်လို့ ဖော်ပြပါတယ်။