ဒီဇင်ဘာ ၅ ရက် ညနေက စင်ကာပူနိုင်ငံမှာ ယှဉ်ပြိုင်ကစားခဲ့တဲ့ ဆူဇူကီးဖလား အုပ်စု (က) အဖွင့်ပွဲစဉ်မှာ အိမ်ရှင်စင်ကာပူအသင်းက မြန်မာအသင်းကို ၃ ဂိုးပြတ်အနိုင်ရသွားပါတယ်။
အာဆီယံဆူဇူကီးဖလားပြိုင်ပွဲဝင် မြန်မာလက်ရွေးစင်ဘောလုံးအသင်းကို အားပေးမှာ မဟုတ်ဘူးလို့ စင်ကာပူရောက် မြန်မာဘောလုံးပရိသတ်တွေက ကြေညာထားသလို ကွင်းထဲမှာလည်း လာရောက်ပေးသူ မရှိပါဘူး။
ဒီပွဲမှာ အိမ်ရှင်စင်ကာပူအသင်းအတွက် အဖွင့်ဂိုးကို ပထမပိုင်း ၃၄ မိနစ်မှာ ဆာဖူဝမ် ဘာဟာရူဒင်က သွင်းပေးခဲ့ပြီး ၃၉ မိနစ်နဲ့ ၄၅ မိနစ်ကျော် နာကျင်အချိန်ပိုမှာ တိုက်စစ်မှူးအစ်ဆန် ဖန်ဒီက ၂ ဂိုးသွင်းယူပေးခဲ့လို့ ပထမပိုင်းမှာတင် စင်ကာပူက မြန်မာကို ၃ ဂိုးအသာနဲ့ ပွဲကို ဦးဆောင်ထားတာပါ။
ဒုတိယပိုင်းမှာတော့ ဂိုးကန်သွင်းခွင့်တွေ ရရှိခဲ့ပေမဲ့ နှစ်ဘက်စလုံး ဂိုးထပ်သွင်းနိုင်ခြင်းမရှိတော့ဘဲ စင်ကာပူအသင်းက အနိုင် ၃ မှတ်ရရှိသွားတာပါ။
မနေ့က ယှဉ်ပြိုင်ကစားခဲ့တဲ့ အုပ်စုတွင်း ထိုင်းနဲ့ အရှေ့တီမောတို့ပွဲစဉ်မှာတော့ ထိုင်းအသင်းက အရှေ့တီမောကို ၂ ဂိုး ဂိုးမရှိနဲ့ အနိုင်ရသွားပါတယ်။ ဒီပွဲစဉ်အပြီး လက်ရှိအုပ်စု (က) မှာ စင်ကာပူက အုပ်စု ပထမနေရာ၊ ထိုင်းက ဒုတိယ နေရာ၊ တီမောက တတိယနေရာနဲ့ မြန်မာက အုပ်စု အောက်ဆုံးမှာ အသီးသီး ရပ်တည်နေပါတယ်။
မြန်မာအသင်းဟာ ဒီဇင်ဘာ ၈ ရက်နေ့မှာ အရှေ့တီမောအသင်းနဲ့ အုပ်စု ဒုတိယမြောက်ပွဲစဉ် ဆက်လက် ယှဉ်ပြိုင် ကစားရမှာဖြစ်ပါတယ်။
Photo- MFF