ထိုင်း-မြန်မာနယ်စပ် တာ့ခ်ခရိုင်၊ ဖုပ်ဖရမြို့က အသက် ၁၆ နှစ်အရွယ် မြန်မာရွှေ့ပြောင်းလုပ်သား မိန်းကလေး ၁ ဦးဟာ အလုပ်ရှင်က ၇ လ ပိတ်လှောင်ထားပြီး အဓမ္မပြုကျင့်တာ ခံခဲ့ရတယ်လို့ Matichon ထိုင်းသတင်းမှာ ဖော်ပြပါတယ်။

ကေ (အမည်လွှဲ) လို့ခေါ်တဲ့ မြန်မာမိန်းကလေးဟာ ၁၀ နှစ်ခံ တောင်ပေါ်သားကတ် ကိုင်ဆောင်ထားပြီး ပြီးခဲ့တဲ့ ၂၀၂၂ မေလ ၁ ရက်နေ့ကစလို့ ဖုပ်ဖရမြို့ ချောင့်ခက်ပ်ရပ်ကွက်ရှိ နာမည်ကြီး ကွေ့သယို (ခေါက်ဆွဲ) ဆိုင် ၁ ဆိုင်မှာ အလုပ်ဝင်လုပ်ခဲ့ပါတယ်။

အဲဒီမှာလုပ်ကိုင်စဉ် အလုပ်ရှင် အမျိုးသားက ဘယ်မှသွားခွင့်မပြုဘဲ အိမ်မှာလှောင်ထားပြီး မကြာခဏ အဓမ္မပြုကျင့်ခဲ့ကြောင်း၊ သူမဟာ ထွက်ပြေးဖို့ အကြိမ်ကြိမ်ကြိုးစားခဲ့ပြီး ဒီ ၂၀၂၃ ခုနှစ် ဖေဖော်ဝါရီလထဲမှာမှ လွတ်မြောက်လာနိုင်ခဲ့တယ်လို့ ဆိုပါတယ်။

အပြင်ရောက်ပြီးတဲ့နောက် သူမက ဖုပ်ဖရမြို့နယ်ရဲစခန်းမှာ သွားရောက်တိုင်တန်းထားခဲ့ကြောင်း၊ ဒါကို အလုပ်ရှင်က သိသွားပြီးတဲ့နောက် အမှုပြန်ရုပ်သိမ်းဖို့ ကြားလူကနေတဆင့် ဘတ်ငွေ ၈ သောင်းနဲ့တကြိမ်၊ ၁ သိန်းနဲ့ ၁ ကြိမ် လာရောက် ညှိနှိုင်းခဲ့တယ်၊ ဒါပေမဲ့ မိန်းကလေးက လက်ခံလိုက်ရင် နောက်ထပ် တခြားမိန်းကလေးတွေကို သူ့လိုလုပ်မှာစိုးလို့ လက်မခံဘဲ ငြင်းခဲ့တယ်လို့ ဆိုပါတယ်။

ငွေပေးတာ လက်မခံတဲ့အတွက် အလုပ်ရှင်က သူတို့အသိ ရဲတွေနဲ့ပါ လာရောက် ခြိမ်းခြောက်ခဲ့ကြောင်း၊ ဒါကြောင့် မဲဆောက်ရှိ အလုပ်သမားကူညီရေးအဖွဲ့ ၁ ဖွဲ့နဲ့ ဆက်သွယ်မိပြီး အဆိုပါအဖွဲ့အစည်းနဲ့အတူ ပြီးခဲ့တဲ့ မေ ၉ ရက်က ဖုပ်ဖရမြို့နယ်ရဲစခန်းကို ထပ်မံတိုင်ကြားခဲ့ပါတယ်။

စခန်းမှူးကတော့ မိန်းကလေးဟာ လူငယ်ဖြစ်တဲ့အတွက် ထိရှလွယ်တဲ့အမှုဖြစ်လို့  အနည်းငယ် ကြန့်ကြာနေရကြောင်း၊ ဖြစ်စဉ်က ကြာခဲ့လို့ ဆေးစစ်ချက်တွေ ပြန်လုပ်နေရတယ်လို့ပဲ ပြန်ဖြေတယ်လို့ ဆိုပါတယ်။

အခုလို အဖွဲ့အစည်းတခုခုက ဝင်ရောက်ကိုင်တွယ်တယ် ဆိုရင်တော့ ကျူးလွန်သူ အလုပ်ရှင်ကို အရေးယူ အပြစ်ပေးနိုင်မယ်လို့ ယုံကြည်ကြောင်း သတင်းမှာ ဖော်ပြပါတယ်။

မိန်းကလေးကို အကူအညီပေးနေတဲ့ အဖွဲ့အစည်းကိုတော့ ဒီဗွီဘီက စုံစမ်းဆက်သွယ်လို့ မရသေးပါဘူး။

ကိုးကား - .msn.com

ထိုင်းနိုင်ငံ၊ စမွတ်ပရကန်ခရိုင်၊ ဘန့်စောင်ထုံးဒေသမှာ မတ်လ ၆ ရက် ညနေပိုင်းက  မြန်မာရွှေ့ပြောင်းလုပ်သား မိသားစုဝင် အသက် ၁၂ နှစ်အရွယ် မိန်းကလေးငယ်တယောက် အဓမ္မပြုကျင့်ခံခဲ့ရတယ်လို့ သူတို့နဲ့နီးစပ်တဲ့ ထိုင်းရောက် ရွှေ့ပြောင်းအလုပ်သမားတဦးက ပြောပါတယ်။

အဓမ္မပြုကျင့်ခံရတဲ့ မိန်းကလေးငယ်ဟာ အပြင်းအထန် ဒဏ်ရာရရှိခဲ့ကာ လက်ရှိ ဆေးရုံမှာ တက်ရောက်ကုသနေရပါတယ်။ ကျူးလွန်သူအမျိုးသားဟာ လာအိုနိုင်ငံသားဖြစ်ပြီး ကျူးလွန်ခဲ့ပြီးနောက် ညပိုင်းမှာ သူနေထိုင်တဲ့ အခန်းအတွင်း ဆွဲကြိုးချ သတ်သေသွားပါတယ်။

ထိုင်းရောက် ရွှေ့ပြောင်းအလုပ်သမားတဦးက “အဓမ္မမှု ကျူးလွန်ခံရတဲ့ ကလေးလေးက အခုမှ ၁၂ နှစ်ပဲ ရှိသေးတယ်။ ကျူးလွန်သူက အသက် ၄၈ နှစ်၊ လာအိုနိုင်ငံသား၊ ကျူးလွန်သူက အရင် မုဒိမ်းမှု ၂ ခုအတွက် ဝရမ်းထုတ်ခံထားရတဲ့သူလို့ ပြောတယ်” လို့ ပြောပါတယ်။

အဲဒီ သေဆုံးသူအမျိုးသားကို ထိုင်းအမျိုးသမီးတယောက်က သူနေထိုင်တဲ့အခန်းတွင်းမှာ ဆွဲကြိုးချသတ်သေတဲ့ပုံစံနဲ့ တွေ့ရှိခဲ့တဲ့အတွက် ထိုင်းရဲတပ်ဖွဲ့ကို အကြောင်းကြားခဲ့လို့ ထိုင်းရဲတပ်ဖွဲ့က လာရောက်စစ်ဆေးခဲ့ပါတယ်။

ကျူးလွန်သူဟာ အရင်ကလည်း  မုဒိမ်းမှု ၂ ခုနဲ့ ဝရမ်းထုတ်ခံထားရတဲ့သူဖြစ်ကာ အဖမ်းခံရမှာကြောက်တဲ့အတွက် ကိုယ့်ကိုယ်ကိုယ် သတ်သေသွားတာ ဖြစ်နိုင်တယ်လို့ ထိုင်းရဲတပ်ဖွဲ့က သုံးသပ်ထားပါတယ်။

လက်ရှိမှာတော့ ကျူးလွန်ခံရတဲ့ ကလေးငယ်ရဲ့ မိဘတွေက ထိုင်း ဘန်စူရဲစခန်းမှာ တိုင်ကြားထားပြီး ရဲတပ်ဖွဲ့ကလည်း သက်သေအထောက်အထားတွေကို စုစည်းထားကာ ဥပဒေနဲ့အညီ ဆောင်ရွက်နေတယ်လို့ ထိုင်းသတင်းတွေမှာ ဖော်ပြပါတယ်။