ကမ္ဘောဒီးယားနိုင်ငံမှာ ကျင်းပနေတဲ့ ဆီးဂိမ်းဘောလုံးပြိုင်ပွဲမှာ မြန်မာယူ၂၂ အသင်းက ဖိလစ်ပိုင်အသင်းကို ၁ ဂိုးဂိုးမရှိနဲ့အနိုင်ရပြီး နောက်ဆုံးဆီးဂိမ်းငါးကြိမ်မှာ လေးကြိမ်အထိ ဆီမီးဖိုင်နယ်တက်ရောက်နိုင်ခဲ့ပါတယ်။
မြန်မာအသင်းအတွက် အနိုင်ဂိုးကို ဒုတိယပိုင်းမှာ နောက်ခံလူ သက်ဟိန်းစိုးကပဲ သွင်းယူခဲ့တာပါ။ သူဟာ ဗဟိုခံစစ်မှူးဖြစ်ပေမဲ့ အုပ်စုပွဲစဉ်သုံးပွဲမှာ သုံးဂိုးသွင်းယူထားတာပါ။
မြန်မာအသင်းက အုပ်စုပွဲစဉ်လေးပွဲမှာ အင်ဒိုနီးရှားကိုရူံးနိမ့်ခဲ့ပေမဲ့ အရှေ့တီမော၊ ကမ္ဘောဒီးယားနဲ့ ဖိလစ်ပိုင်အသင်းတွေကို အနိုင်ရခဲ့တာကြောင့် အုပ်စုဒုတိယနဲ့ ဆီမီးဖိုင်နယ်အဆင့်ကို တက်ရောက်ခဲ့တာပါ။
မြန်မာလူငယ်အသင်းဟာ အိမ်ရှင်အဖြစ်လက်ခံကျင်းပတဲ့ ၂၀၁၃ ဆီးဂိမ်းမှာ အုပ်စုအဆင့်ကနေ မကျော်လွန်နိုင်ခဲ့ပေမဲ့ ၂၀၁၅၊ ၂၀၁၇၊ ၂၀၁၉ နဲ့ ၂၀၂၃ ပြိုင်ပွဲတွေမှာ ဆီမီးဖိုင်နယ်တက်ခဲ့ပြီး ၂၀၂၁ ဗီယက်နမ်ဆီးဂိမ်းမှာပဲ အုပ်စုအဆင့်နဲ့ ကျေနပ်ခဲ့ရတာပါ။
မြန်မာယူ၂၂ အသင်းဟာ တဖက်အုပ်စုက အုပ်စုပထမရတဲ့ အသင်းနဲ့ မေ ၁၃ ရက်မှာ ယှဉ်ပြိုင်သွားရမှာပါ။ တဖက်အုပ်စု B မှာ ထိုင်းနဲ့ဗီယက်နမ် အသင်းတို့က လက်ကျန်ပွဲစဉ် ကျန်သေးပေမဲ့ နှစ်သင်းစလုံး ဆီမီးဖိုင်နယ်တက်ရောက်ခဲ့ပါတယ်။
ထိုင်းအသင်းက ဗီယက်နမ်နဲ့ ရမှတ် ၉ မှတ်စီတူပေမဲ့ ဂိုးကွာခြားချက်အသာနဲ့ အုပ်စုပထမနေရာမှာ ရပ်တည်နေပါတယ်။
