ဂျပန်နဲ့ တောင်ကိုရီးယားနိုင်ငံအကြား အရှေ့တရုတ်ပင်လယ်ပြင်မှာ မြန်မာသင်္ဘောသားတွေအပါအဝင် ၂၂ ဦးပါသွားတဲ့ ကုန်တင်သင်္ဘောတစီး ဇန်နဝါရီ ၂၃ ရက် မနေ့ညက နစ်မြုပ်သွားရာမှာ ၁၄ ဦးကို ပြန်ကယ်ဆယ်နိုင်ခဲ့ပြီး ကျန်ပျောက်ဆုံးနေသူတွေကို ကယ်ဆယ်ရေးအဖွဲ့တွေက ဆက်လက်ရှာဖွေနေပါတယ်။

တန်ချိန် ၆၅၅၁ တန်ရှိ  ဟောင်ကောင်မှတ်ပုံတင်ထားတဲ့ ကုန်တင်သင်္ဘော “Jintian”  ဟာ ကိုရီးယားဒန်ဂျိုကျွန်းရဲ့ အနောက်ဘက် ၆၈ မိုင်၊ ဂျပန်နိုင်ငံ နာဂါဆာကီကမ်းရိုးတန်း အနောက်တောင်ဘက်  မိုင် ၁၀၀ လောက်မှာ နစ်မြုပ်သွားတာလို့ ဂျပန်နဲ့ ကိုရီးယားမီဒီယာတွေက ရေးပါတယ်။

ဟောင်ကောင်မှာ မှတ်ပုံတင်ထားတဲ့ ဒီကုန်တင်သင်္ဘာပေါ်မှာ  တရုတ်သင်္ဘောသား ၁၄ ဦးနဲ့ မြန်မာသင်္ဘောသားက ၈ ဦးလိုက်ပါလာတာလို့ ဂျပန်တာဝန်ရှိသူတွေက ပြောပေမဲ့ ပျောက်ဆုံးနေသူတွေကတော့ ဘယ်နိုင်ငံသားတွေလဲဆိုတာ အသေးစိတ်မသိရသေးပါဘူး။

လက်ရှိအချိန်အထိ သင်္ဘာသား ၁၄ ဦးကို တခြားသင်္ဘောတစီးက ကယ်ဆယ်နိုင်ခဲ့ပြီး ဒီအထဲက ၉ ယောက်ကတော့ သတိလစ်နေဆဲပဲလို့ တာဝန်ရှိသူတွေရဲ့ပြောဆိုချက်ကို ကိုးကားပြီး တောင်ကိုရီးယား ယွန်ဟတ်သတင်းမှာ ရေးပါတယ်။

ရာသီဥတုဆိုးရွားပြီး သင်္ဘောမှောက်ခဲ့တဲ့နေရာမှာ ကယ်ဆယ်ရှာဖွေရေးလုပ်ငန်းတွေကို  တောင်ကိုရီးယားနဲ့ ဂျပန် နှစ်နိုင်ငံက လေယာဉ်တွေ၊ သင်္ဘောတွေနဲ့  ပူးပေါင်း ဆောင်ရွက်နေပါတယ်။

သင်္ဘောသားတယောက်က ဘေးအန္တရာယ် ကျရောက်နေတဲ့အကြောင်းနဲ့ သင်္ဘောစောင်းပြီး ရေတွေဝင်လာတဲ့အကြောင်းနဲ့ ဇန်နဝါရီ ၂၄ ရက်နေ့က သတင်းပို့ပြီးနောက် ၄ နာရီလောက်မှာ   “Jintian” ကုန်တင်သင်္ဘော နစ်မြုပ်သွားတာလို့ ကျိုဒိုသတင်းမှာ ဖော်ပြပါတယ်။

သင်္ဘောကပ္ပတိန်က ဂျီဂျုကျွန်းပေါ်ရှိ ကိုရီးယားကမ်းခြေစောင့်တပ်ကို ဂြိုဟ်တုဖုန်းတဲ့ နောက်ဆုံးဆက်သွယ်ခဲ့တာ  ဇန်နဝါရီ ၂၄ ရက် ဒီမနက် ၂ နာရီ ၄၁ မိနစ်မှာ ဖြစ်တယ်လို့ဆိုပါတယ်။

ကိုရီးယားကမ်းခြေစောင့်အဖွဲ့တွေ ရောက်သွားချိန်မှာ သင်္ဘောဟာလုံးလုံးမြုပ်သွားပြီဖြစ်ပြီး ရှာတွေ့ရဲ့ အသက်ကယ်ဘော ၃ ခုနဲ့ သက်ကယ်လှေပေါ်မှာလည်း တယောက်မှ မတွေ့ဘူးလို့ ပြောပါတယ်။

သင်္ဘောနစ်မြုပ်ရတဲ့ အကြောင်းရင်းကို အတိအကျမသိရသေးဘဲ အခင်းဖြစ်တဲ့အချိန်ဟာ ဂျပန်နဲ့ တောင်ကိုရီးယားမှာ နှင်းတွေ အရမ်းကျနေပြီး နေ့အပူချိန်ဟာ ၃ ဒီဂရီလောက်ပဲ ရှိတယ်လို့ သိရပါတယ်။

လေပြင်းတွေတိုက်ခိုက်နေကြောင်း ကင်းလှည့်ရေယာဉ်နဲ့ လေယာဉ်တွေ စေလွှတ်ခဲ့ပေမဲ့ ရာသီဥတု ကြမ်းတာကြောင့် နှောင့်နှေးခဲ့ရတယ်လို့  ဂျပန် ကမ်းခြေစောင့်တပ်က ပြောပါတယ်။

အပြင်းအထန် နာမကျန်းဖြစ်နေတဲ့ မြန်မာသင်္ဘောသားတယောက်ကို   အိန္ဒိယကမ်းခြေစောင့်တပ်ဖွဲ့က ဇန်နဝါရီ ၂၃ ရက်မှာ ရဟတ်ယာဉ်နဲ့ခေါ်ယူပြီး  ဘူဘန်နက်ဆွာရာမြို့က ပုဂ္ဂလိကဆေးရုံတခုကို ပို့ဆောင်ပေးခဲ့တယ်လို့ အိန္ဒိယသတင်းမှာ ဖော်ပြပါတယ် ။

နေမကောင်းဖြစ်နေတဲ့ မြန်မာသင်္ဘောသား သန်းထိုက်လွင်ဟာ စက်ချို့ယွင်းမှုကြောင့် အနောက်ဘက် ဘင်္ဂလားကမ်းရိုးတန်းမှာ ကျောက်ချရပ်နားထားတဲ့ စင်ကာပူကုမ္ပဏီပိုင် MT GB Venture သင်္ဘောနဲ့ လိုက်ပါလာခဲ့သူ ဖြစ်ပါတယ်။

ဘူဘန်နက်ဆွာရာ ကမ်းရိုးတန်းစောင့်တပ်ဖွဲ့ရဲ့ လေယာဉ်စခန်းကနေ အဆင့်မြင့်အပေါ့စား ရဟတ်ယာဉ် (ALH: Advance Light Helicopter) နဲ့ လူနာကို သယ်ဆောင်ပေးခဲ့ကြောင်း သူတို့ရဲ့ ထုတ်ပြန်ချက်မှာ ဖော်ပြထားပါတယ်။

မနက် ၁၀ နာရီခွဲလောက်မှာ ဝေဒနာပြင်းထန်စွာ ခံစားနေရတဲ့လူနာကို လေယာဉ်မှူးက သင်္ဘောပေါ်ကနေ သွားရောက်ခေါ်ဆောင်ခဲ့ပြီး ၁၁ နာရီ ၄၀ မိနစ်လောက်မှဦ အန္တရာယ်ကင်းစွာနဲ့ ပြန်လည်ရောက်ရှိခဲ့တယ်လို့ ဆိုပါတယ်။

အဲဒီကနေ လူနာကို ဆေးကုသပေးဖို့ ဘူဘန်နက်ဆွာရာမြို့က အပိုလို (Apollo) ဆေးရုံကို ဆက်လက်ပို့ဆောင်ခဲ့ကြောင်းသိရပါတယ်။

အဲဒီနောက် ဒေသခံဝန်ထမ်းတွေက ဆေးရုံဝန်ထမ်းတွေနဲ့ ပူးပေါင်းဆောင်ရွက်ခဲ့ကြပြီး လူနာရဲ့ အခြေအနေက အေးဆေးတည်ငြိမ်လာခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

မြန်မာနိုင်ငံသား သင်္ဘောသား သန်းထိုက်လွင်ဟာ သင်္ဘောရဲ့ ဟိုက်ဒရောလစ်ပိုက်လိုင်းကို ပြုပြင်နေစဉ် ဝမ်းဗိုက်မှာ ပြင်းထန်စွာနာကျင်ကိုက်ခဲတဲ့ ဝေဒနာကိုခံစားခဲ့ရပြီး အသက်ရှူရ ခက်ခဲခဲ့တယ်လို့  ဆိုပါတယ်။

အဲဒီနောက် သင်္ဘောကပ္ပတိန်က ကမ်းရိုးတန်းစောင့်တပ်ဖွဲ့ကို ဆေးအကူအညီအတွက် လာရောက်ခေါ်ဆောင်ပေးဖို့ တောင်းဆိုခဲ့တာဖြစ်ကြောင်းနဲ့ သင်္ဘောဟာ ပါရာဒစ်ပ်ဆိပ်ကမ်းရဲ့ အရှေ့မြောက်ဘက်၊ အရှေ့ရေမိုင် ၈၀ မှာ ကျောက်ချရပ်နားထားတာဖြစ်ကြောင်း The Statesman သတင်းမှာ ဖော်ပြထားပါတယ်။ 

Ref- The Statesman