ထိုင်းတောင်ပိုင်းမှာ အကြောင်းအမျိုးမျိုးကြောင့် ဖမ်းဆီးအရေးယူခံရပြီး အကျဉ်းထောင်က လွတ်ရက်စေ့သူတွေကို ပြန်ပို့ပေးနေရာမှာ ဧပြီ ၂၄ ရက် မှာလည်း ထိုင်းလဝကရဲတပ်ဖွဲ့က နောက်ထပ်မြန်မာနိုင်ငံသား ၁၇၁ ဦးကို ပြန်ပို့ပေးခဲ့ပါတယ်။

မနေ့က ပြန်ပို့တဲ့ထဲမှာ အမျိုးသမီး ၄၅ ဦး အမျိုးသား ၁၂၆ ဦး စုစုပေါင်း ၁၇၁ ဦးပါဝင်ကြောင်း၊ တာဝန်ရှိသူတွေက ကိုဗစ်-၁၉ ကာကွယ်ရေးအတွက် ကိုယ်ပူချိန်စစ်ဆေးရာမှာ အပူချိန် ၃၇ ဒီဂရီစင်တီဂရိတ်အထက်မြင့်နေသူ ၁၀ ဦးကျော်တွေ့ရှိပြီး အဲဒီထဲမှာ ၂ ဦးက ကိုဗစ်-၁၉ ပိုးကူးစက်ခံထားရတယ်လို့ ပြည်တော်ပြန်ကြိုဆိုရေးကူညီခဲ့တဲ့ ကော့သောင်းအခြေစိုက် ရွှေ့ပြောင်းလုပ်သားပညာရေးနဲ့ဖွံ့ဖြိုးရေးစင်တာ FED / MEC မှ တာဝန်ခံ ဦးမိုးဝေက ပြောပါတယ်။

“သူတို့ကထိုင်းတောင်ပိုင်း ၁၄ ခရိုင် အကျဉ်းထောင်နဲ့ အချုပ်ခန်းတွေကနေ လွတ်လာတာပါခင်ဗျ။ ထိုင်းလဝကရဲတပ်ဖွဲ့က မနက် ၁၁ နာရီလောက်မှာ ဆိပ်ကမ်းကိုလာပို့ပေးပြီး ကော့သောင်းကို ၁၂ နာရီလောက်ရောက်လာပါတယ်။ ဒီဘက်ရောက်တော့ တာဝန်ရှိသူတွေက ကြိုဆိုပြီး ကျန်းမာရေးစစ်ဆေးတယ်။ ရာသီဥတုကလည်း ပူတော့အပူချိန်မြင့်နေတာ ၁၀ ယောက်ကျော်တယ်။ သူတို့ကို သီးသန့်ခွဲပြီး နှာခေါင်းထိုး ATK စစ်ဆေးတာတွေပြန်လုပ်တာ အမျိုး သား ၂ ယောက်မှာ ကိုဗစ်-၁၉ ကူးစက်ခံထားရတာ တွေ့လို့ ဆေးရုံပို့ထားပါတယ်။”

ကျန်သူတွေကို သက်ဆိုင်ရာက ပညာပေးအမှာစကားပြောကြားပြီး ညနေပိုင်းမှာတော့ သူတို့နေရပ်အသီးသီးကို ပြန်ပို့ပေးခဲ့တယ်လို့ ဆိုပါတယ်။

မနေ့ကပြန်ရောက်သူတွေမှာ ရနောင်းဒေသခံတွေအပြင် တနင်္သာရီတိုင်း၊ မွန်ပြည်နယ်နဲ့ ရခိုင်ပြည်နယ်ကပါ ပါဝင်ပြီး၊ ခရီးစရိတ်မတတ်နိုင်သူတွေကို လူမှုကူညီရေးအဖွဲ့တွေက ထောက်ပံ့ပေးခဲ့ရတယ်လို့ ဆိုပါတယ်။

လက်ရှိရနောင်းခရိုင်အကျဉ်းထောင်ထဲမှာ အကျဉ်းသား ၁၀ ကျော်သာကျန်ရှိကြောင်း၊ အဖမ်းအဆီးနေ့စဉ်လိုရှိနေတော့ မကြာခင်ရာဂဏန်းထိပြန်ပြည့်လာမယ်လို့ ယူဆကြောင်း ကိုမိုးဝေက ပြောပါတယ်။

ရနောင်းခရိုင် လဝကအကျဉ်းထောင်မှာ အရင်က လွှတ်ရက်စေ့သူတွေကို ချက်ချင်းပြန်မပို့ဘဲ ၄-၅ လကြာဆက်ထားပြီး ငွေပေးနိုင်သူကို အရင်ပို့ပေးသလို ထောင်ထဲမှာ လူ့အခွင့် အရေးချိုးဖောက်ခံနေရတာကြောင့် အကျဉ်းသားတွေ ဆန္ဒပြခဲ့ကြပါတယ်။ 

အဲဒီနောက်ပိုင်း ထိုင်းနဲ့ မြန်မာအာဏာပိုင်တွေညှိနှိုင်းပြီး လွှတ်ရက်စေ့ အကျဉ်းသားတွေကို ကြာကြာမထားတော့ဘဲ တစ်လလျှင် ၂ ကြိမ် ပြန်ပို့ပေးနေပါတယ်။ ဒီ ၂၀၂၃ ခုနှစ်ထဲမှာ ၃ ကြိမ်ပြန်ပို့ခဲ့ပြီး ပြစ်ဒဏ်စေ့မြန်မာနိုင်ငံသား ၉၀၀ ကျော် ပြည် တော်ပြန်ခဲ့ရပါတယ်။ 

ထိုင်းအကျဉ်းထောင်ကျခဲ့ရသူတွေဟာ အများအားဖြင့် တရားမဝင် ဝင်ရောက်မှု၊ အလုပ်သမားဥပဒေနဲ့မညီညွတ်မှုတွေနဲ့ အဖမ်းခံရတာဖြစ်ပြီး တခြားမူးယစ်မှု၊ ရန်ဖြစ်မှု ရာဇဝတ်မှုမှာ အနည်းအကျဉ်းသာရှိတယ်လို့  ဦးမိုးဝေက ပြောပါတယ်။ 

Photo- FED 

တရုတ်အကျည်းထောင် ၁၂ ထောင်မှာ နှစ်ရှည် ဖမ်းဆီးထိန်းသိမ်းခံရပြီး လွတ်ရက်စေ့သွားတဲ့ မြန်မာနိုင်ငံသား အကျဉ်းသား ၁၄၀ ကျော်ကို ဒီဇင်ဘာ ၁၈ ရက်နေ့မှာ တရုတ်ဘက်က ပြန်လည်လွှဲပြောင်းပေးခဲ့တယ်လို့ မူဆယ် တရုတ်ကျောင်း ထောင်လွှဲ ကွာရန်တင်းစင်တာ တာဝန်ခံ ဦးမန်းမျိုးမြင့်က DVB ကို ပြောပါတယ်။ ထောင်လွှဲ ပို့ဆောင်သူတွေမှာ ဆေးမှုအများဆုံးဖြစ်ပြီး လဝက နယ်ကျော်မှု၊ လူကုန်ကူးမှုတွေ ပါဝင်ကာ ၄ လမှ အနှစ် ၂၀ ထိ ကျခံရသူတွေ ပါဝင်တယ်လို့ ဆိုပါတယ်။ တရုတ်နိုင်ငံ ပြည်နယ်အသီးသီးရှိ အကျည်းထောင် ၁၂ ထောင်က အမျိုးသမီး ၆၇ ဦး၊ အမျိုးသား ၇၉ ဦး ဖြစ်ပြီး အဲဒီထဲက အမျိုးသမီး ၂ ဦးက လူကုန်ကူးခံရတာကြောင့် ကျယ်ဂေါင် လူကုန်ကူးမှုတားဆီးရေး စင်တာကို ပို့ဆောင်ထားကာ ကျန်သူတွေကိုတော့  မူဆယ် တရုတ်ကျောင်း ထောင်လွှဲ ကွာရန်တင်းစင်တာမှာ လက်ခံထားရှိတယ်လို့ ဦးမန်းမျိုးမြင့်က ပြောပါတယ်။ လွှဲပြောင်းခံရသူတွေကို ဒီဇင်ဘာ ၁၉ ရက်မနက် ၇ နာရီက စတင်ကာ ကိုဗစ်-၁၉ ရောဂါပိုး ရှိ၊ မရှိ စစ်ဆေးပြီး ပိုးကင်းစင်သူတွေကိုတော့ နေရပ်ဒေသ ပို့ဆောင်သွားမယ်လို့ မူဆယ် ကိုဗစ်-၁၉ ထိန်းချုပ်ကာကွယ်ရေး၊ ကုသရေးနှင့် စည်းကမ်းထိန်းသိမ်းရေးအဖွဲ့ တရုတ်ကျောင်း ကွာရန်တင်းစင်တာက သိရပါတယ်။ ကိုဗစ်-၁၉ ရောဂါဖြစ်ပွားနေချိန် ကာလအတွင်း တရုတ်နိုင်ငံမှာ အကြောင်းအမျိုးမျိုးကြောင့် ဖမ်းဆီးထိန်းသိမ်းခံရတဲ့ မြန်မာနိုင်ငံသားအကျဉ်းသားတွေကို တရုတ်-မြန်မာ တရားဝင် အဝင်အထွက် ဂိတ်ပေါက်ဖြစ်တဲ့ မူဆယ်မြို့ နန်းတော်ဂိတ်ကနေ အပတ်စဉ် သောကြာနေ့တိုင်း လွှဲပြောင်းပေးနေတာ ဖြစ်ပါတယ်။ သတင်း - Pra Jaw