အိန္ဒိယနိုင်ငံမှာ အသက် ၂၂ နှစ်အရွယ် မြန်မာအမျိုးသမီးတယောက်ဟာ အမျိုးသား ၄ ယောက်ရဲ့ အုပ်စုဖွဲ့ မုဒိန်းပြုကျင့်ခံခဲ့ရပြီး အဆိုပါ တရားခံတွေကတော့ လွတ်မြောက်နေဆဲဖြစ်တယ်လို့ The Indian Express သတင်းမှာ ဖော်ပြပါတယ်။
ဒီအဖြစ်အပျက်ဟာ ပြီးခဲ့တဲ့ ဖေဖော်ဝါရီ ၂၂ ရက်က ဖြစ်ပွားခဲ့တာဖြစ်ပြီး အဆိုပါအမျိုးသမီးဟာ သူ့ရဲ့ ၁ နှစ်အရွယ် သမီးဖြစ်သူနဲ့ ဒေလီမြို့က ကာလင်ဒီကွန့်ရှ်ပြည်သူ့ဉယျာဉ်ထဲမှာ ရှိနေချိန်မှာ သုံးဘီးဆိုင် ကယ်တစီးက အတင်းအကျပ်ခေါ်ဆောင်ခံခဲ့ရတာဖြစ်တယ်လို့ အိန္ဒိယ အကြီးတန်းရဲအရာရှိတယောက်က ပြောပါတယ်။
“ယာဉ်မောင်းက သူ့(မြန်မာအမျိုးသမီး)ကို ကြံရာပါ အမျိုးသား ၃ ယောက်နဲ့အတူ ဒေလီ-ဟာရီယာနာနယ်စပ်က သူတို့ထဲက တယောက်ရဲ့ အိမ်တလုံးကို ခေါ်သွားခဲ့ပြီးနောက်မှာ အုပ်စုဖွဲ့ မုဒိန်းကျင့်ခဲ့ကြပါတယ်။ ပြီးတော့ သူတို့က အမျိုးသမီးကို ခြိမ်းခြောက်ပြီးတော့ နောက်တနေ့မှာတော့ မြို့တော်က နေရာတခုမှာ ပစ်ထားခဲ့ကြတာ။”
အမျိုးသမီးဟာ ဒီကိစ္စနဲ့ပတ်သက်ပြီးတော့ ဖေဖော်ဝါရီ ၂၆ ရက်မှာ ကာလင်ဒီကွန့်ရှ်ရဲစခန်းဆီ တိုင်ကြားခဲ့တာလို့ သတင်းမှာ ဖော်ပြပါတယ်။
လက်ရှိမှာတော့ သူ့ကို ပစ်ထားခဲ့တဲ့ နေရာနဲ့ သုံးဘီးဆိုင်ကယ်နဲ့ တင်ပြီး ခေါ်ဆောင်သွားနိုင်တဲ့ နေရာတွေစတဲ့ အမှုနဲ့ ဆက်စပ်တာတွေကို အနီးအနားက စီစီတီဗွီလုံခြုုံရေးကင်မရာတွေကနေ တဆင့် စုံစမ်း စစ်ဆေးမှုတွေ လုပ်ဆောင်နေတယ်လို့ ဆိုပါတယ်။
ရဲတွေကတော့ အဆိုပါ မြန်မာအမျိုးသမီးဟာ ဆေးကုသဖို့ နိုင်ငံထဲ ရောက်ရှိလာခဲ့တာလို့ပြောပြီး လတ်တလောမှာ ဒီအမှုအတွက် အုပ်စုဖွဲ့မုဒိန်းပြုကျင့်မှု ပုဒ်မ ၃၇၆ ဃနဲ့ ပြန်ပေးဆွဲပြစ်မှု ပုဒ်မ ၃၆၃ တို့နဲ့ အမှုဖွင့် ထားတယ်လို့ သတင်းမှာ ဖော်ပြပါတယ်။
Source: The Indian Express
ထိုင်းနိုင်ငံ၊ မဲဆောက်မြို့ရဲ့ ဈေးကြီးအတွင်းမှာ ဈေးသည် မြန်မာအမျိုးသမီး တဦးအား အမျိုးသားတဦးက သေနတ်ထောက်ပြီး ရွှေဆွဲကြိုးလုယက်မှု မတ်လ ၂၅ ရက် နေ့ခင်းပိုင်းက ဖြစ်ပွားခဲ့ပါတယ်။
ရွှေဆွဲကြိုးလုယက်ခံရသူဟာ အသက်၂၂ နှစ်အရွယ် မသီတာအေး ဖြစ်ပြီး ထိုင်းရဲကို တိုင်ကြားခဲ့တဲ့အတွက် လုယက်သူကို ဖမ်းဆီးရမိရေး မဲဆောက်မြို့မရဲစခန်း ရဲမှူးကြီး နိုင်းမွန်းစကယောက်အွန်က အထူးရဲနဲ့ လှည့်ကင်းရဲတွေကို ညွှန်ကြားခဲ့ပါတယ်။
မကြာခင်မှာဘဲ အခင်းဖြစ်ပွားရာနေရာကို ရဲတပ်ဖွဲ့ရောက်ရှိပြီး စစ်ဆေးတဲ့အခါ လူယက်သူဟာ ၂ ဦးဖြစ်ပြီး တဦးက အမျိုးသမီးဖြစ်ကာ မိနစ်ပိုင်းမှာဘဲ ဖမ်းဆီးနိုင်ခဲ့ပါတယ်။
လုယက်သူအမျိုးသားဟာ ဆိုင်ခန်းထဲဝင်လာပြီး အထွက်မှာ သေနတ်ထောက်ကာ ၂ ကျပ်သားရွှေဆွဲကြိုးကို လုယူတာဖြစ်ကြောင်း လုယူတဲ့အချိန်မှာ ဆွဲကြိုးကတစ်ပိုင်းပြုတ်သွားတယ်လို့ မသီတာအေးရဲ့ ထိုင်းရဲထံ တိုင်ကြားချက်အရ သိရပါတယ်။
သေနတ်ထောက်ပြီး ရွှေဆွဲကြိုးလုယူသွားတဲ့ အမျိုးသားကိုလည်း အချိန်အနည်းငယ်မှာဘဲ ထိုင်းရဲတပ်ဖွဲ့က ဖမ်းဆီးနိုင်ခဲ့ကာ မသီတာအေးရဲ့ ရွှေဆွဲကြိုးလည်း ပြန်ရရှိသွားပါတယ်။
