စစ်တပ်ပိုင် မြန်မာ့စီးပွားရေးဦးပိုင်လီမိတက်နဲ့ မြန်မာ့စီးပွားရေးကော်ပိုရေးရှင်း (MEC) တို့ကို အမျိုးသားညီညွတ်ရေးအစိုးရ (NUG) က အကြမ်းဖက်အုပ်စုအဖြစ် ကြေညာလိုက်ပေမဲ့ ထိရောက်ဖို့လိုတယ်လို့ စီးပွားရေးသုတေသီတွေက သုံးသပ်ပြောပါတယ်။
NUG အစိုးရရဲ့ အကြမ်းဖက်မှုတိုက်ဖျက်ရေး ဗဟိုအဖွဲ့အနေနဲ့ အကြမ်းဖက်မှုတိုက်ဖျက်ရေး ဥပဒေပုဒ်မ ၆၊ ပုဒ်မခွဲ (င) နဲ့ ပုဒ်မ ၇၂၊ ပုဒ်မခွဲ (ခ) ပါ လုပ်ပိုင်ခွင့်ကို ကျင့်သုံးကာ ပြည်ထောင်စုအစိုးရအဖွဲ့ရဲ့ သဘောတူညီချက်နဲ့ ဒီဇင်ဘာ ၆ ရက်က ထုတ်ပြန်ခဲ့တာ ဖြစ်ပါတယ်။
အမျိုးသားညီညွတ်ရေးအစိုးရ (NUG) က မြန်မာ့စီးပွားရေးဦးပိုင်လီမိတက်နဲ့ မြန်မာ့စီးပွားရေးကော်ပိုရေးရှင်းတို့ဟာ စစ်ကောင်စီခေါင်းဆောင် မင်းအောင်လှိုင် ဦးဆောင်တဲ့ အကြမ်းဖက်စစ်အုပ်စု သက်ဆိုးရှည်စေဖို့အတွက် စီးပွားရေးလုပ်ငန်းပေါင်းစုံကို လက်ဝါးကြီးအုပ် ခြယ်လှယ်ထားပြီး နှစ်စဉ် ဘဏ္ဍာရန်ပုံငွေများစွာ ရှာဖွေထောက်ပံ့နေတာကို စိစစ်တွေ့ရှိရတယ်လို့ ဆိုပါတယ်။
ဒါ့အပြင် ရရှိလာတဲ့ အကျိုးအမြတ်တွေကို အသုံးပြုပြီးတော့ အကြမ်းဖက်စစ်အုပ်စုဟာ နေ့စဉ်နဲ့အမျှ နိုင်ငံတဝန်းက အပြစ်မဲ့ပြည်သူတွေအပေါ် လူမဆန်စွာ အကြမ်းဖက်တိုက်ခိုက် သတ်ဖြတ်မှုတွေ ကျူးလွန်နေတာကြောင့် အဲဒီအကြမ်းဖက်အဖွဲ့အစည်းရဲ့ ပိုင်ဆိုင်မှုအားလုံးကို အကြမ်းဖက်မှုတိုက်ဖျက်ရေး ဥပဒေအရ အကြမ်းဖက်အုပ်စုပိုင် ပစ္စည်းတွေအဖြစ် သတ်မှတ်ထားပြီး ဥပဒေနဲ့အညီ ထိန်းချုပ်စီမံခန့်ခွဲသွားမယ်လို့ ထုတ်ပြန်ထားပါတယ်။
ဒါပေမဲ့ အမျိုးသားညီညွတ်ရေးအစိုးရရဲ့ ထုတ်ပြန်ချက်ဟာ အကြမ်းဖက်အုပ်စုပိုင် စီးပွားရေးလုပ်ငန်းတွေအပေါ် ထိရောက်မှုရှိဖို့က နိုင်ငံတကာရဲ့ အမြင်တွေကို စွဲဆောင်နိုင်ဖို့ လိုတယ်လို့ သုတေသီတွေက ထောက်ပြပြောပါတယ်။
စီးပွားရေးသုတေသီတဦးက “ထိရောက်မှု ရှိ၊ မရှိ ဆိုတာကို ကျနော်တို့က ဘာနဲ့ကြည့်ရမလဲ ဆိုတော့ နိုင်ငံတကာက NUG ကို ဘယ်လောက်အသိအမှတ်ပြုထားပြီလဲ။ ပြီးတော့ အဲ့ဒီ ကြေညာချက်တွေကိုကော နိုင်ငံတကာက ဘယ်လောက်ထိ အလေးထားသလဲ ဆိုတာတွေနဲ့ တိုင်းတာဖို့တော့ လိုတာပေါ့။ ပြောရရင် သူတို့ရဲ့ ကြေညာချက်က ဘယ်လောက်ထိ ထိရောက်မှု ရှိသလဲ။ နိုင်ငံတကာအပေါ် ဘယ်လောက်ထိ စွဲဆောင်မှုရှိသလဲ။ တကယ်လို့ပေါ့ နိုင်ငံတကာအပေါ် စွဲဆောင်မှုရှိတယ် ဆိုရင်တော့ သူတို့ကြေညာချက်က ထိရောက်မှုရှိတယ်လို့ ပြောလို့ရတယ်။ အဲ့လိုမဟုတ်ဘဲ စွဲဆောင်မှုလည်းမရှိ၊ ဟိုဘက်ကလည်း အလေးမထားဘူး ဆိုရင်တော့ ဘာမှဖြစ်မှာမဟုတ်ဘူး။ ဒါက စီးပွားရေးရှုထောင့်ကနေ ကျနော့်အမြင် ပြောတာပါ” လို့ ဒီဗွီဘီကို ပြောပါတယ်။
မြန်မာပြည်မှာ အရပ်သားဒီမိုကရေစီအစိုးရလက်ထက်မှာ စစ်ဗိုလ်ချုပ်ကြီးတွေပိုင်တဲ့ စီးပွားရေးဆိုင်ရာ အကျိုးစီးပွားတွေ ထိခိုက်လာမှာကို စိုးရိမ်စိတ်နဲ့ စစ်တပ်က အာဏာသိမ်းခဲ့တဲ့ အကြောင်းရင်းတွေထဲမှာ တခုအပါအဝင် ဖြစ်ပါတယ်။
နိုင်ငံရေးနဲ့ စီးပွားရေးလေ့လာသုံးသပ်သူတဦးကတော့ “စစ်အုပ်စုတွေအနေနဲ့က ဦးပိုင်နဲ့ မြန်မာ့စီးပွားရေးကော်ပိုရှင်းဟာ သူတို့အတွက် နောက်ခံကျောရိုးပေါ့။ ဒါပေမဲ့ အဲ့နှစ်ခုတည်းကို ကျနော်တို့က ကြည့်လို့မရဘူး။ ဘာလို့လဲဆို အမည်မခံဘဲနဲ့ စစ်ဗိုလ်ချုပ်အဟောင်းတွေ အသစ်တွေရဲ့ သားသမီးတွေက လုပ်နေတဲ့ စီးပွားရေးတွေ အများကြီးရှိတယ်။ ဒါပေမဲ့ ပြဿနာက ဘာလဲဆို အရပ်သားအစိုးရလက်ထက်မှာ ဒီမိုကရေစီ အစစ်အမှန်နဲ့သွားရင် ဦးပိုင်နဲ့ မြန်မာ့စီးပွားရေးကော်ပိုရေးရှင်းက သူတို့ရပိုင်ခွင့်တွေ လုပ်ပိုင်ခွင့်တွေက ကျဆင်းလာတော့မှာလေ။ အဲ့လို ကျဆင်းလာမှာကို စိုးရိမ်စိတ်နဲ့ စစ်တပ်က အာဏာသိမ်းရတဲ့အထဲမှာ ပါတယ်။ တကယ်လို့သာ စစ်တပ်က အုပ်ချုပ်မယ်ဆိုရင် ဒီလို စိုးရိမ်စိတ် ရှိလာစရာမလိုဘူးလေ။ စစ်တပ်က သူတို့ ဆက်ပြီး အုပ်ချုပ်မယ်ဆိုရင် သူတို့အတွက်လည်း အခွင့်အလမ်းက ပိုကောင်းလာမယ်။ အဲ့လိုမဟုတ်ဘဲ ဒီမိုကရေစီ အစိုးရကသာ အုပ်ချုပ်မယ်ဆိုရင် သူတို့ရဲ့အခွင့်အလမ်းတွေ ပိတ်လာတော့မှာလေ” လို့ ဒီဗွီဘီကို ပြောပါတယ်။
လက်ရှိမှာတော့ အာဏာသိမ်းစစ်ကောင်စီဟာ နိုင်ငံတော်အာဏာကို မတရားသိမ်းယူထားပြီး အပြစ်မဲ့ပြည်သူတွေကို အကြမ်းဖက် ပစ်ခတ်သတ်ဖြတ်မှုတွေ ကျူးလွန်နေတာကြောင့် မြန်မာစစ်အုပ်စုရဲ့ ဘဏ္ဍာရေးဆိုင်ရာ ပင်မရင်းမြစ်ကြီးတခုဖြစ်တဲ့ မြန်မာ့ရေနံနဲ့ သဘာဝဓာတ်ငွေ့လုပ်ငန်း (MOGE) အပါအဝင် စစ်အုပ်စုကို ငွေကြေးအထောက်အပံ့ပေးနေတဲ့ Total၊ Chevron နဲ့ နိုင်ငံတကာကုမ္ပဏီကြီးတွေကို အရေးယူ ပိတ်ဆို့ဖို့ တောင်းဆိုတဲ့ ကမ်ပိန်းတွေ လုပ်ဆောင်နေပါတယ်။
အကြမ်းဖက်စစ်အုပ်စုက ဦးဆောင်တဲ့ မြန်မာ့စီးပွားရေးဦးပိုင်လီမိတက်နဲ့ မြန်မာ့စီးပွားရေး ကော်ပိုရေးရှင်းတို့ကို အမျိုးသားညီညွတ်ရေးအစိုးရ (NUG) က အကြမ်းဖက်အုပ်စုအဖြစ် ကြေညာလိုက်ပါတယ်။
ဒီဇင်ဘာ ၆ ရက် ရက်စွဲနဲ့ အဆိုပါထုတ်ပြန်ချက်မှာတော့ NUG အစိုးရ အကြမ်းဖက်မှုတိုက်ဖျက်ရေး ဗဟိုအဖွဲ့အနေနဲ့ အကြမ်းဖက်မှုတိုက်ဖျက်ရေး ဥပဒေပုဒ်မ ၆၊ ပုဒ်မခွဲ (င) နဲ့ ပုဒ်မ ၇၂၊ ပုဒ်မခွဲ (ခ) ပါ လုပ်ပိုင်ခွင့်ကို ကျင့်သုံးကာ ပြည်ထောင်စုအစိုးရအဖွဲ့ရဲ့ သဘောတူညီချက်နဲ့ ဒီအမိန့်ကြော်ငြာစာကို ထုတ်ပြန်လိုက်တယ်လို့ ဖော်ပြထားပြီး မြန်မာ့စီးပွားရေးဦးပိုင်လီမိတက်နဲ့ မြန်မာ့စီးပွားရေးကော်ပိုရေးရှင်းတို့ဟာ မင်းအောင်လှိုင် ဦးဆောင်တဲ့ အကြမ်းဖက်စစ်အုပ်စု သက်ဆိုးရှည်စေဖို့ စီးပွားရေးလုပ်ငန်းပေါင်းစုံကို လက်ဝါးကြီးအုပ် ချယ်လှယ်ကာ နှစ်စဉ် ဘဏ္ဍာရန်ပုံငွေများစွာ ရှာဖွေထောက်ပံ့နေတာကို စိစစ်တွေ့ရှိရတယ်လို့ ဆိုပါတယ်။
အဆိုပါ ဘဏ္ဍာရန်ပုံငွေတွေဟာ အကြမ်းဖက်စစ်တပ်ရဲ့ ထိပ်ပိုင်းခေါင်းဆောင်တွေနဲ့ အရာရှိကြီးတွေအတွက်သာ အကျိုးစီးပွားဖြစ်ထွန်းနေပြီး အောက်ခြေ အကြပ်၊ စစ်သည်တွေကတော့ ခံစားခွင့်မရှိသလောက် နည်းပါးနေတာကိုလည်း အမြတ်ခွဲဝေမှုဆိုင်ရာ အထောက်အထား၊ စာရွက်စာတမ်းတွေအရ သိရှိရတယ်လို့ NUG အစိုးရက ပြောပါတယ်။
ဒါ့အပြင် အဆိုပါအကျိုးအမြတ်တွေကို အသုံးပြုပြီးတော့ အကြမ်းဖက်စစ်အုပ်စုဟာ နေ့စဉ်နဲ့အမျှ နိုင်ငံတဝန်းက အပြစ်မဲ့ပြည်သူတွေအပေါ် လူမဆန်စွာ အကြမ်းဖက်တိုက်ခိုက် သတ်ဖြတ်မှုတွေ ကျူးလွန်နေတာကြောင့် အဲဒီအကြမ်းဖက်အဖွဲ့အစည်းတွေရဲ့ ပိုင်ဆိုင်မှုအားလုံးကို အကြမ်းဖက်မှုတိုက်ဖျက်ရေး ဥပဒေပုဒ်မ ၃၊ ပုဒ်မခွဲ (ဃ) အရ အကြမ်းဖက်အုပ်စုပိုင် ပစ္စည်းတွေအဖြစ် သတ်မှတ်ပြီးတော့ အများပြည်သူ အကျိုးစီးပွားအလို့ငှာ အကြမ်းဖက်မှုတိုက်ဖျက်ရေး ဥပဒေပုဒ်မ ၆၊ ပုဒ်မခွဲ (ဌ) နဲ့အညီ ထိန်းချုပ်စီမံခန့်ခွဲသွားမယ်လို့ ထုတ်ပြန်ချက်မှာ ဖော်ပြပါတယ်။
ပုဒ်မ ၃(ဃ) အကြမ်းဖက်အုပ်စုပိုင်ပစ္စည်းတွေ ဆိုတာကတော့ အကြမ်းဖက်မှု ကျူးလွန်ရာကနေ ရရှိတဲ့ အကျိုးအမြတ်တွေ၊ အကြမ်းဖက်မှုတရပ်ကို ကျူးလွန်ရာမှာ အသုံးပြုခဲ့တဲ့ သို့မဟုတ် အကျိုးပြုနေတဲ့ သို့မဟုတ် အသုံးပြုလိမ့်မယ်လို့ ယူဆရတဲ့ ငွေကြေးနဲ့ ပစ္စည်းတွေ၊ အကြမ်းဖက်သမား သို့မဟုတ် အကြမ်းဖက်အုပ်စုတခုက အသုံးပြုခဲ့တဲ့ သို့မဟုတ် အသုံးပြုနေတဲ့ သို့မဟုတ် အသုံးပြုလိမ့်မယ်လို့ ယူဆရတဲ့ ငွေကြေးနဲ့ ပစ္စည်းတွေ၊ အကြမ်းဖက်သမား သို့မဟုတ် အကြမ်းဖက်အုပ်စုတခု သို့မဟုတ် အဆိုပါအုပ်စုရဲ့ ကိုယ်စား အခြားသူတဦးဦးက ပိုင်ဆိုင်ထားတဲ့ သို့မဟုတ် ထိန်းချုပ်ထားတဲ့ ငွေကြေးနဲ့ ပစ္စည်းတွေ၊ အကြမ်းဖက်အုပ်စုတခုကို ထောက်ပံ့ဖို့ သို့မဟုတ် အကြမ်းဖက်မှုတခုကို ရန်ပုံငွေထောက်ပံ့ဖို့ ရည်ရွယ်ချက်နဲ့ စုဆောင်းခဲ့တဲ့ ငွေကြေးနဲ့ ပစ္စည်းတွေနဲ့ အဆိုပါငွေကြေးနဲ့ ပစ္စည်းတွေကနေ ဆင့်ပွားဆင်းသက်လာတဲ့ ငွေကြေးနဲ့ အကျိုးအမြတ်တွေကို ဆိုလိုပါတယ်။
လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေး အတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ်တိုက်ပွဲတွေ တိုင်းဒေသကြီးနဲ့ ပြည်နယ်တွေအနှံ့အပြား ပြုလုပ်နေကြသလို ဒေသခံ ပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေ ပြင်းထန်နေပါတယ်။
ဒါ့အပြင် နိုင်ငံတော်အာဏာကို မတရားသိမ်းယူထားပြီး အပြစ်မဲ့ပြည်သူတွေကို အကြမ်းဖက် ပစ်ခတ်သတ်ဖြတ်မှုတွေ ကျူးလွန်နေတဲ့ မြန်မာစစ်အုပ်စုရဲ့ ဘဏ္ဍာရေးဆိုင်ရာ ပင်မရင်းမြစ်ကြီးဖြစ်ပြီး နိုင်ငံခြားဝင်ငွေ အများဆုံးရရှိတဲ့ မြန်မာ့ရေနံနဲ့ သဘာဝဓာတ်ငွေ့လုပ်ငန်း (MOGE) အပါအဝင် စစ်အုပ်စုကို ငွေကြေးအထောက်အပံ့ပေးနေတဲ့ Total၊ Chevron အပါအဝင် နိုင်ငံတကာကုမ္ပဏီကြီးတွေကို အရေးယူ ပိတ်ဆို့နိုင်ရေးအတွက် တောင်းဆိုတဲ့ ကမ်ပိန်းမှာ ပြည်သူလူထုတရပ်လုံး ပါဝင်နိုင်ဖို့ Blood Money သွေးစွန်းငွေအဖွဲ့ကလည်း တိုက်တွန်းမှုတွေ လုပ်ဆောင်နေပါတယ်။
