ဧရာဝတီတိုင်း၊ ပုသိမ်မြို့၊ အမှတ် ၄ ရပ်ကွက်မှာ ဧပြီ ၅ ရက် မနက်အစောပိုင်းက မြန်မာ့စီးပွားရေးဘဏ်ရှေ့ ဗုံးပေါက်ကွဲခဲ့တယ်လို့ မြို့ခံတွေဆီက သိရပါတယ်။

မြန်မာ့စီးပွားရေးဘဏ်ရှေ့မှာ ကင်းစောင့်နေတဲ့ စစ်ကောင်စီတပ်သားတွေရှိတဲ့ ဘန်ကာကို မနက် ၇ နာရီလောက်မှာ အဝေးထိန်းစနစ်နဲ့ မိုင်း ၂ လုံး ဖောက်ခွဲ တိုက်ခိုက်ခဲ့တာလို့ ပုသိမ်မြို့ပြပြောက်ကျားတပ်ဖွဲ့ရဲ့ တာဝန်ရှိသူက ပြောပါတယ်။

''သူတို့တွေက မနက်တိုင်း ၇ နာရီကို ဘဏ်ကိုလာတော့ သူတို့လာတဲ့အချိန်ကိုစောင့်ပြီး အဝေးထိန်း စနစ်နဲ့ဖောက်ခွဲတိုက်ခိုက်တာပါ။ ဒါပေမဲ့ ဘန်ကာတွေက အခိုင်အမာလုပ်ထားတော့ သူတို့ကို ထိတာမျိုးမရှိဘူး''လို့ ပြောပါတယ်။

စစ်ကောင်စီတပ်သားတွေကို မိုင်း ၂ လုံးနဲ့ ဖောက်ခွဲ တိုက်ခိုက်ခဲ့ပေမယ့် ဘန်ကာတွေ အခိုင်အမာဆောက်ထားတာကြောင့် စစ်ကောင်စီတပ်သားတွေကို မထိခဲ့သလို လမ်းသွားလမ်းလာ အိုဝေတွေကိုသာ အစအနည်းငယ်စင်ခဲ့တယ်လို့ ဆိုပါတယ်။

မိုင်းပေါက်ကွဲပြီးနောက်ပိုင်း စစ်ကောင်စီတပ်သားတွေက လမ်းကို အင်အားအများအပြားနဲ့ ပိတ်ဆို့ စစ်ဆေးခဲ့တာကြောင့် မိုင်း ၁ လုံးထပ်မံတွေ့ရှိခဲ့တယ်လို့ မျက်မြင်တွေ့သူတွေက ပြောပါတယ်။

မျက်မြင်တွေ့သူတစ်ဦးက ''သူတို့က နောက်တစ်လုံးထပ်တွေ့တာ အစတပ်ထဲ ယူသွားပြီး သူတို့ခွဲဖို့လုပ်တာ မယူသွားလို့ထင်တယ် အဲ့မှာပဲခွဲလိုက်တယ်''လို့  ပြောပါတယ်။

ပုသိမ်မှာ ၂၀၂၃ ခုနှစ်အတွင်း စစ်ကောင်စီတပ်ကို တိုက်ခိုက်တာတွေ ၄ ကြိမ်ထိပြုလုပ်ခဲ့ပေမဲ့ ခုအကြိမ်မှာ ဖောက်ခွဲတိုက်ခိုက်နိုင်ခဲ့တာဖြစ်လို့ မြို့ပြပြောက်ကျားတပ်ဖွဲ့ရဲ့ တာဝန်ရှိသူက ပြောပါတယ်။

ပုသိမ်မြို့မှာ စစ်တပ်အာဏာသိမ်းပြီးနောက်ပိုင်း စစ်ကောင်စီတပ်သားတွကို တိုက်ခိုက်တာတွေ တော်တော်များများရှိခဲ့ပေမယ့် ၂၀၂၃ ခုနှစ်ထဲမှာ ဒါဟာ ပထမဆုံးအကြိမ် စစ်ကောင်စီတပ်သားတွေကို ဗုံးခွဲတိုက်ခိုက်တာလို့ ဆိုပါတယ်။

ကချင်ပြည်နယ် မြစ်ကြီးနားမြို့ မြန်မာ့စီးပွားရေးဘဏ်မှာ ပင်စင်စားတွေကို ဘဏ်ဝန်ထမ်းတွေက ငွေထုတ်ယူတဲ့ တုံကင်နံပါတ်တွေ တရားမဝင် ရောင်းချပြီး ငွေတောင်းခံနေတယ်လို့ ပင်စင်ထုတ်ယူသူတွေက ပြောပါတယ်။

မြန်မာ့စီးပွားရေးဘဏ် ပင်စင်ထုတ်ရက်အတွင်း ပင်စင်ထုတ်ယူဖို့ ဘဏ်ဝန်ထမ်းတွေဆီက တုံကင်တခုကို ၂၀၀၀ ကျပ်မှ ၃၀၀၀ အထိ ပေးဝယ်ယူနေရတယ်လို့ ဆိုပါတယ်။

"ပင်စင်ထုတ်မယ်ဆို တုံကင်နံပါတ်ရဖို့ ကြိုဖုန်းဆက်ရတယ်။ ဘဏ်ရောက်ရင် ဘဏ်ဝန်ထမ်းကောင်လေးဆီက တုံကင်ကို ၁ ကနေ ၁၀၀ အတွင်းကို တခု နှစ်ထောင် နဲ့ ဝယ်ရတယ်။ ရှေ့ဆုံးမြန်မြန်ရချင်ရင် ၃၀၀၀ ပေးဝယ်ရတယ်။ တုံကင်မဝယ်ဘဲ သူတို့ဝေတာကို စောင့်ရင်တော့ နံပါတ် ၆၀၀ လောက်ဖြစ်သွားပြီး အချိန်အကြာကြီးစောင့်ရတယ်" လို့ ပင်စင်လာထုတ်တဲ့ အမျိုးသားတဦးက ပြောပါတယ်။

မြစ်ကြီးနားမြို့နယ်မှာ ပင်စင်ထုတ်သူတွေကို မြန်မာ့စီးပွားရေးဘဏ်က လစဉ်တိုင်းရဲ့ ၂၁ ရက်နေ့ကနေ ၂၃ ရက်နေ့အထိ ပင်စင်လစာ ထုတ်ပေးတာပါ။

စစ်အာဏာသိမ်းပြီးနောက်ပိုင်း ပင်စင်စားပြည်သူတွေအပေါ် တရားမဝင်တုံကင် နံပါတ်ရောင်းချတာနဲ့ ပတ်သက်ပြီး ၂၀၂၂ ခုနှစ်အတွင်းက ဘဏ်မန်နေဂျာဆီ တိုင်ကြားခဲ့ပေမဲ့ အခုအချိန်ထိ အရေးယူမှုမရှိခဲ့ဘူးလို့ ပင်စင်စားတွေက ပြောတယ်။