မြန်မာနိုင်ငံ၊ စစ်ကိုင်းတိုင်းအထက်ပိုင်း တမူးမြို့နဲ့ အိန္ဒိယနိုင်ငံ မိုးရေးမြို့အကြား နယ်နိမိတ်ချင်း ထိစပ်နေတဲ့နှစ်နိုင်ငံ နယ်စပ်ဒေသမှာ  စစ်ကောင်စီရဲ့ ကင်းထောက်လေယာဉ်တွေ အဆက်မအပြတ် ပျံသန်းနေတဲ့အတွက် စစ်ဘေးရှောင်တွေ တောတောင်တွေထဲ တိမ်းရှောင်နေရတယ်လို့ သိရပါတယ်။

နယ်စပ်ကနေထွက်ပြေးတိမ်းရှောင်နေတဲ့ မြန်မာစစ်ရှောင်တွေခိုလှုံနေတဲ့ အိန္ဒိယနိုင်ငံ၊ မိုးရေးမြို့ကို ဒီနေ့ ဇန်နဝါရီ ၃၀ ရက်မှာ စစ်ကောင်စီဘက်က တာဝန်ရှိသူတွေ လာရောက်မှာဖြစ်တဲ့အတွက် မြို့ထဲမှာ အစစ်အဆေးတွေရှိနေပြီး နေ့လယ်ပိုင်းက မြန်မာစစ်တပ်နဲ့ အိန္ဒိယစစ်တပ်က လေယာဉ်တွေ ပျံသန်းနေတဲ့အတွက် စစ်ရှောင်တွေအနေနဲ့ စိုးရိမ်ကြောက်လန့်ပြီး တောတောင်တွေထဲမှာ ထွက်ပြေးပုန်းရှောင်နေရတယ်လို့ မိုးရေးမြို့မှ စစ်ရှောင်တဦးက ဒီဗွီဘီကို ပြောပါတယ်။

“မိုးရေးနဲ့ အနီးအနားကရွာတွေကို ဝင်စစ်တာ၊ မနေ့ကဆိုလည်း ဗမာကလေးတွေကို စာသင်ပေးနေတဲ့ ကချင်ကျောင်းတကျောင်းကို ဝင်စစ်သေးတယ်။ အခုက အိန္ဒိယစစ်တပ်နဲ့ ဗမာစစ်တပ် ပေါင်းပြီး တအိမ်တက် တအိမ်ဆင်း မြန်မာတွေလိုက်ရှာပြီး ဖမ်းနေတယ်ကြားတယ်။ အင်ဖာဘက်ကို စစ်တပ်ကအရာရှိလာမှာမို့လို့ အခုလို ဖြစ်တာလို့လည်း ကြားပါတယ်။ ဒီဘက်ကို မြန်မာစစ်တပ်ဘက်က လုံခြုံရေး ရှေ့ပြေး အယောက် ၂၀ လည်း ရောက်နေတယ်။ အခုက စစ်ရှောင်တွေ အနားက တောတွေထဲမှာ ပုန်းနေကြရတယ်။ ကျနော်တို့လည်း ရှောင်နေရတယ်။”

မြန်မာနဲ့ အိန္ဒိယ နှစ်နိုင်ငံက ဒေသဆိုင်ရာ နယ်ခြားကော်မတီကို ၆ လတကြိမ် ကျင်းပလေ့ရှိပြီး ဒီနေ့မှာ စစ်တပ်ဘက်က အကြီးအကဲတယောက် လာရောက်မှာဖြစ်တဲ့အတွက် အခုလို ကင်းထောက်လေယာဉ်တွေ ပျံသန်းသွားလာနေတာ ဖြစ်နိုင်တယ်လို့ တမူးဒေသ ကာကွယ်ရေးအဖွဲ့တခုရဲ့ တာဝန်ရှိသူက ပြောပါတယ်။

ပြီးခဲ့တဲ့ ဇန်နဝါရီ ၂၇ ရက်ကလည်း နယ်စပ်ဖြတ်ကျော်ခိုလှုံလာတဲ့ အထောက်အထားမဲ့ မြန်မာနိုင်ငံသား ၈၁ ယောက်ကို တရားမဝင် နယ်စပ်ဖြတ်ကျော်မှု လ.ဝ.က ဥပဒေနဲ့ မဏိပူရ်ပြည်နယ်အစိုးရအဖွဲ့က ဖမ်းဆီးထောင်ချခဲ့ပါတယ်။ 

စစ်တပ် အာဏာသိမ်းပြီး နောက်ပိုင်းမှာ အိန္ဒိယနိုင်ငံ မီဇိုရမ်ပြည်နယ်ဘက် ထွက်ပြေးတိမ်းရှောင်တဲ့ ဒုက္ခသည်ပေါင်း ၄၀,၀၀၀ ခန့်နဲ့ မဏိပူရပြည်နယ်မှာ ၅,၀၀၀ ကျော်ရှိတယ်လို့ လေ့လာသူတွေက ခန့်မှန်းထားကြပါတယ်။

မြန်မာနိုင်ငံကို လာရောက်လည်ပတ်တဲ့ အိန္ဒိယနိုင်ငံသားနှစ်ယောက် သတ်ဖြတ်ခံရပြီးနောက် နှစ်နိုင်ငံနယ်စပ်ကနေ ပြည်သူတွေအသွားအလာကို အပြန်အလှန်ပိတ်ပင်လိုက်တဲ့အတွက် နယ်စပ်စီးပွားရေးလုပ်ကိုင်နေသူတွေ အခက်အခဲ ဖြစ်နေတယ်လို့ တမူးဒေသခံတွေက ဒီဗွီဘီကို ပြောပါတယ်။

အိန္ဒိယနိုင်ငံသား တမီးလ်အမျိုးသား နှစ်ယောက်ဟာ ဇူလိုင် ၅ ရက် နေ့လယ်ပိုင်းက တမူးမြို့နယ်မှာ ပျူစောထီးတွေရဲ့ ပစ်သတ်ခံရပြီးနောက်ပိုင်း အိန္ဒိယနိုင်ငံ မဏိပူပြည်နယ်ထဲက ခရိုင်အုပ်ချုပ်ရေးမှူးက အရေးပေါ်အမိန့် ထုတ်ပြန်လိုက်တာ ဖြစ်ပါတယ်။

အရေးကြီးကိစ္စမရှိဘဲ အိန္ဒိယပြည်သူတွေ မြန်မာပြည်ကို သွားလာခြင်းမပြုဖို့နဲ့ သွားလာမယ်ဆိုရင် သက်ဆိုင်ရာ ခွင့်ပြုမိန့်ယူပြီးမှသာ သွားလာဖို့နဲ့ မြန်မာပြည်ဘက်ကလည်း ခွင့်ပြုချက်မရှိဘဲ ဝင်ထွက်သွားလာခွင့် ပြုတော့မှာမဟုတ်ကြောင်း ထုတ်ပြန်ချက်မှာ ပါရှိပါတယ်။

အိန္ဒိယနယ်စပ်ကို ဈေးသွားရောင်းချတဲ့ တမူးဒေသခံတဦးက “တမူးနယ်စပ်က တခြားနယ်စပ်တွေလို ဖွံ့ဖြိုးမှုသိပ်မရှိဘူး။ မြန်မာဘက်ခြမ်းကနေ ဟိုဘက်ကို ဈေးသွားရောင်းကြတယ်။ ကယ်ရီသမားတွေလည်း ထိခိုက်တာပေါ့ဗျာ၊ မနေ့ကဆို မြန်မာနိုင်ငံသားတွေ ရိုက်ထုတ်ခံရတယ်။ ဈေးလာရောင်းတဲ့သူတွေကို ဈေးဆိုင်တွေ ပိတ်ခိုင်းတယ်၊ လာမရောင်းခိုင်းတော့ဘူး” လို့ ပြောပါတယ်။

နောက်ပြီး မြန်မာနိုင်ငံဘက်က CDM ပြုလုပ်ပြီး အိန္ဒိယနိုင်ငံဘက် သွားခိုလှုံနေကြတဲ့သူတွေနဲ့  တခြာအရပ်သားပြည်သူတွေ ကို အိန္ဒိယဘက်က  ပြန်လွှတ်မှာကိုလည်း ဒေသခံတွေက စိုးရိမ်နေကြပါတယ်။

အိန္ဒိယသတင်းမှာတော့ တမီးလ်လူငယ်နှစ်ယောက်ကို စစ်ကောင်စီလက်အောက်ခံ ပျူစောထီး တပ်ဖွဲ့ဝင်တွေက ပစ်ခတ်သတ်ဖြတ်ခဲ့တယ်လို့ ရေးသားထားပါတယ်။

တမူးမြို့ဟာ မြန်မာ-အိန္ဒိယ နှစ်နိုင်ငံ နယ်စပ်မျဉ်းဘေးမှာ တည်ရှိလို့ အိန္ဒိယနိုင်ငံသားနှစ်ယောက် အခုလိုအသတ်ခံရတဲ့ကိစ္စကြောင့် လုံခြုံရေးတင်းကျပ်ပြီး အဝင်အထွက် ကန့်သတ်လိုက်တာကြောင့် ဒေသခံတွေ စီးပွားရေးထိခိုက်လာမှာ စိုးရိမ်နေကြပါတယ်။