ထိုင်းနိုင်ငံအနောက်ပိုင်း၊ ပရကျူတ်ခီရီခန်မြို့နယ်၊ ကော်လတ်အုပ်စု၊ မာ့ခန်ဖရုန်းကျေးရွာအနီးမှာ နိုဝင်ဘာ ၁၀ ရက်ကင တရားမဝင် ဝင်ရောက်လာတဲ့ မြန်မာနိုင်ငံသား ၁၃၈ ဦးဖမ်းဆီးခံခဲ့ရပါတယ်။
မြန်မာအမျိုးသား ၄၅ ယောက်နဲ့ အမျိုးသမီး ၃၂ ယောက်တို့ဟာ မာ့ခန်ဖရုန်းကျေးရွာအနီးမှာ ထိုင်းအာဏာပိုင်တွေရဲ့ ဖမ်းဆီးခံလိုက်ရတာပါ။
သူတို့တွေဟာ ထားဝယ်၊ ပဲခူး၊ မော်လမြိုင်၊ ရန်ကုန်၊ မြဝတီ၊ မကွေး စတဲ့ဒေသကဖြစ်ပြီး ထိုင်းနိုင်ငံ ဘန်ကောက်၊ စမွတ်စခွန်း၊ နခွန်းပထုန်၊ ချွန်းပူရီစတဲ့ခရိုင်တွေမှာ အလုပ်သွားလုပ်ဖို့ ပွဲစားကို တစ်ဦးလျှင် ဘတ် ၂၄၀၀၀ မှ ၂၇၀၀၀ ထိပေးပြီး ဝင်လာခဲ့တာလို့ဆိုပါတယ်။
တာဝန်ရှိသူတွေက ကိုဗစ်-၁၉ စည်းကမ်းအရ အပူချိန်တိုင်းရာ အားလုံးပုံမှန်ဖြစ်ပြီး တည်ဆဲဥပဒေအရအရေးယူဖို့ ပရကျူတ်ခီရီခန်ရဲစခန်းကို ပို့ဆောင်ထားတယ်လို့ ထိုင်းစစ်တပ် Army PR Center သတင်းမှာ ဖော်ပြပါတယ်။
အလားတူ ထိုင်းမြောက်ပိုင်း ချင်းမိုင်ရိုင်၊ ဖှန်မြို့နယ်၊ မွမ့်ပင်ကျေးရွာအုပ်စု ဘန့်ပါ ကွေ့ရွာနားမှာလည်း တရားမဝင် ဝင်ရောက်လာတဲ့ မြန်မာနိုင်ငံသား ၆၁ ယောက်ကို နယ်ခြားစောင့်စစ်တပ်က ဖမ်းဆီးရမိခဲ့တယ်လို့ ချင်းမိုင်န ယူးစ်သတင်းမှာ ဖော်ပြပါတယ်။
သူတို့ဟာ ထိုင်းမှာအလုပ်လာလုပ်ဖို့ မြန်မာနယ်စပ် တောလမ်းကနေ ခြေကျင်လျှောက်ပြီး ဝင်ရောက်လာတာလို့ ဆိုပါတယ်။
နယ်စပ်မှာ တရားမဝင် ဝင်ရောက်မှုတွေ ပိုများလာလို့ ၂၄ နာရီစောင့်ကြပ်စစ်ဆေးဖို့ ထိုင်းအမျိုးသားလုံခြုံရေးဌာနက သက်ဆိုင်ရာအဖွဲ့တွေကို ညွှန်ကြားထားပါတယ်။
မြန်မာပြည်တွင်းမှာ စစ်အာဏာသိမ်းမှုနဲ့ ကိုဗစ်-၁၉ ရောဂါ အခြေအနေတွေကြောင့် အလုပ်အကိုင်ရှားပါးပြီး စားဝတ်နေရေးပိုမိုကျပ်တည်းလာတာကြောင့် မြန်မာနိုင်ငံသားတွေ အိမ်နီးချင်းထိုင်းနိုင်ငံဘက်ကို နေ့စဉ်ဝင်ရောက်ခိုလှုံနေပြီး အဖမ်းခံရတာလည်း နေ့စဉ်လိုရှိနေပါတယ်။
