မြန်မာ-ထိုင်းနယ်စပ် ကရင်ပြည်နယ် ၊ မြဝတီဘက်ကနေ နှစ်နိုင်ငံ ချစ်ကြည်ရေးတံတား အမှတ် ၂ ကို ဖြတ်ပြီး ထိုင်းနိုင်ငံ မဲဆောက်မြို့ကို မြန်မာ MOUအလုပ်သမား ၁၅၁ ဦး မေလ ၁၉ ရက် ဒီနေ့မနက်က တတိယအသုတ်အဖြစ် ထပ်မံဝင်ရောက်လာပါတယ်။
ထိုင်းနိုင်ငံမှာ ကိုဗစ်-၁၉ ကူးစက်မှုတွေကြောင့် ၂ နှစ်ကျော်လောက် MOU အလုပ်သမားတင်သွင်းမှုကို ရပ်ဆိုင်းထားရာက မြန်မာလုပ်သားတွေကို ဒီလထဲမှာ ထိုင်းဘက်က စတင်ပြန်လည်လက်ခံနေတာပါ။
ပြီးခဲ့တဲ့ မေလ ၁၀ ရက်နဲ့ ၁၁ ရက်နေ့မှာ အလုပ်သမား ၅၈၈ ဦး ပို့ဆောင်ခဲ့ပြီး ဒီကနေ့ မေလ ၁၉ ရက်နေ့မှာတော့ တတိယအသုတ်အနေနဲ့ နောက်ထပ် ၁၅၁ ဦး ဝင်ရောက်လာတာဖြစ်ပါတယ်။
အဆိုပါ မြန်မာအလုပ်သမားတွေကို မြန်မာအလုပ်သမားသံအရာရှိရုံးနဲ့ ထိုင်းနိုင်ငံဌာနဆိုင်ရာတွေက မဲဆောက်နယ်စပ်စခန်းမှာ ကြိုဆိုလက်ခံခဲ့ပြီး အလုပ်သမားတွေ လုပ်ငန်းခွင်ရှိရာသို့ ဆက်လက်သွားရောက်နိုင်ရေး ညှိနှိုင်းဆောင်ရွက်နေပါတယ်။
ဒီနေ့ဝင်ရောက်လာတဲ့ အလုပ်သမား ၁၅၀ ကျော်ဟာ ထိုင်းနိုင်ငံ အယုဒ္ဓယခရိုင်ရှိ Fujikura Electronics(Thailand) ကုမ္ပဏီသို့ ၉၂ ဦး၊ Thai Chin Fu Enterprise ကုမ္ပဏီကို ၂၉ ဦး၊ Samakee Concrete Product ကုမ္ပဏီကို အယောက် ၃၀ အသီးသီးသွားရောက်လုပ်ကိုင်ကြမှာ ဖြစ်ပါတယ်။
ထိုင်းနိုင်ငံမှာ အိမ်နီးချင်းနိုင်ငံတွေက ရွှေ့ပြောင်းအလုပ်သမား ၂၁၀၄၁၃ ( နှစ်သိန်းကျော် ) လက်ခံဖို့ ရှိပြီး demand letter လက်ခံရရှိထားတဲ့ထဲမှာ မြန်မာနိုင်ငံက တစ်သိန်းခွဲထိရှိပါတယ်။
ဒါပေမဲ့ မြန်မာဘက်က တစ်ပတ်ကျော်အတွင်း ရာဂဏန်းလောက်သာ ပို့နိုင်လို့ တရားမဝင် ဝင်ရော က်မှုတွေလည်း နေ့စဉ် ရာနဲ့ချီရှိနေတာလို့ မဲဆောက်အခြေစိုက် မြန်မာနိုင်ငံသားများအရေး ပူးတွဲဆောင်ရွက်မှုကော်မတီဥက္ကဋ္ဌ ဦးမိုးကြိုးက ဒီဗွီဘီကို ပြောပါတယ်။
“နေ့စဉ်ရက်ဆက် ထိုင်းနိုင်ငံကို ဝင်နေတာက တရားမဝင် ခိုးဝင်တွေပဲ များနေတယ်။ ဘာကြောင့်လဲ ဆိုတော့ တရားဝင်လုပ်သား ပို့ဆောင်တဲ့ ဝန်ဆောင်မှုလုပ်ငန်းတွေက အရမ်းနှေးလို့။ လာချင်တဲ့သူက အိမ်ပေါင်၊ လယ်ပေါင်၊ ခြံပေါင် ရှိတာတွေ ပေါင်နှံရောင်းချကြတယ်။ ပြီးတော့ တရားဝင်လမ်းကြောင်းက အိပဲ့အိပဲ့နဲ့ လနဲ့ချီ အကြာကြီး စောင့်ရတော့ မစောင့်နိုင်ဘူးလေဗျာ၊ ထိုင်းမှာ Demand Letter (အလုပ်ခေါ်စာ) ရထားတဲ့ မြန်မာလုပ်သားဦးရေက တစ်သိန်းခွဲလောက်ရှိတာ။ အခု တပတ်ကို ရာဂဏန်းပဲပို့နိုင်တယ်။ နေ့တိုင်းလည်း မဟုတ်ဘူးဆိုတော့ ဆင့်ပါးစပ် နှမ်းပက်သလိုပဲပေါ့ ၊ အဲဒါကြောင့် ခိုးဝင်ကြတာပေါ့။ ပြီးတော့ အဖမ်းခံရတာပေါ့။”
တရားမဝင်အလုပ်သမားဝင်ရောက်မှု အမှန်တကယ်ပပျောက်စေချင်ရင် MOU လုပ်သားပို့ဆောင်ရေးစနစ် မြန်မြန်ဆန်ဆန် ပြီးမြောက်အောင် လုပ်ထုံးလုပ်နည်းတွေကို ချမှတ်ဖို့ ၊ ဝန်ဆောင်မှုတွေကို သက်ဆိုင်ရာတာဝန် ရှိသူတွေအနေနဲ့ ကြပ်မတ်ဆောင်ရွက်ပေးဖို့ ဦးမိုးကြိုးက တိုက်တွန်းပြောပါတယ်။
ဒီမေလ ၁ ရက်ကနေ ၁၈ ရက်အထိ ထိုင်းနိုင်ငံထဲကို တရားမဝင် ဝင်ရောက်လာလို့ အဖမ်းခံရတဲ့ မြန်မာလုပ်သား ၁၆၀၀ ဝန်းကျင်ရှိတယ်လို့ သိရပါတယ်။
MOU ရွှေ့ပြောင်းမြန်မာအလုပ်သမား ၃၀၀ ကျော် ကရင်ပြည်နယ်၊ မြဝတီမြို့ကနေ မြန်မာ-ထိုင်းချစ်ကြည်ရေးတံတားအမှတ် ၂ ကိုဖြတ်ပြီး ထိုင်းနိုင်ငံ၊ တာခ်ရိုင်၊ မဲဆောက်မြို့ကို မေလ ၁၁ ရက်က မနက်က ထပ်မံဝင်ရောက်လာပါတယ်။
ကိုဗစ်-၁၉ ရောဂါကူးစက်မှုအခြေအနေကြောင့် ထိုင်းမှာအလုပ်လာလုပ်ဖို့ ၂ နှစ်ကျော် ဆိုင်းငံ့ခံထားခဲ့ရတဲ့ မြန်မာ MOU အလုပ်သမားတွေဟာ မနေ့က ပထမဆုံးအသုတ်အနေနဲ့ ၂၈၈ ဦး စတင်ဝင်ရောက်ခဲ့ပြီး ဒီကနေ့ ၃၀၁ ဦး ထပ်မံဝင်ရောက်လာပါ။
မနေ့ကနဲ့ ဒီနေ့ နှစ်ရက် စုစုပေါင်း မြန်မာအလုပ်သမား ၅၈၉ ဦးတို့ဟာ ကျန်းမာရေးအဆင့်ဆင့်ကိုစစ်ဆေးပြီးမှ ထိုင်းနိုင်ငံကို တရားဝင် ပြည်ဝင်ခွင့်နဲ့ ရောက်ရှိလာတာဖြစ်ပြီး အားလုံးဟာ ချွန်းပူးရီးခရိုင်ရှိ Panuspoultry Group Co., Ltd ကြက်သားထုတ်လုပ်ရေးစက်ရုံ တစ်ရုံတည်းမှာပဲ လုပ်ငန်းခွင်ဝင်ကြရမှာပါ။
MOU စနစ်နဲ့ ဝင်ရောက်လာတဲ့အလုပ်သမားတွေဟာ လွန်ခဲ့တဲ့ ၇၂ နာရီအတွင်း ကိုဗစ်-၁၉ စစ်ဆေးပြီး ကင်းစင်ကြောင်းအထောက်အထား၊ ကိုဗစ်-၁၉ ကာကွယ်ဆေး အနည်းဆုံး ၂ ချောင်းထိုးထားတဲ့အထောက်အထား ၊ နိုင်ငံကူးလက်မှတ်တွေ ပြသရမှာ ဖြစ်ပါတယ်။
သူတို့ကို ထိုင်းကျန်းမာရေးဌာနက SWAB နဲ့ ကိုဗစ်-၁၉ ထပ်စစ်ပြီး ပိုးတွေ့သူတွေမှသာ ကွာရန်တင်းဝင်ရမယ်လို့ ဆိုပါတယ်။
ဒုတိယနေ့ ထပ်မံဝင်ရောက်လာသူတွေကို မဲဆောက်မြို့နယ်အုပ်ချုပ်ရေးမှူး ၊ မြို့နယ်ရဲတပ်ဖွဲ့နဲ့ သက်ဆိုင်ရာတာဝန်ရှိသူတွေက သွားရောက်ကြိုဆိုပြီး ကျန်းမာရေးဌာနက ကိုဗစ်-၁၉ အပြင် တားမြစ်ရောဂါ ၆ မျိုး ( အနာကြီး၊ ဆင်ခြေတောက်၊ ငှက်ဖျား ၊ အရက်စွဲ ၊ ဆစ်ဖလစ်ကာလသား၊ ၊ ပြင်းထန်တဲ့အဆုတ်ရောဂါ) စစ်ဆေးခြင်း ၊ လဝက မှ ပြည်ဝင်ခွင့်ဗီဇာတုံးထုခြင်း ၊ တာ့ခ်ခရိုင်အလုပ်သမားရုံးမှ အလုပ်သမားကဒ်လုပ်ပေးဖို့ ဓာတ်ပုံရိုက်ခြင်းတွေ ပြုလုပ်ပါတယ် ။
တာ့ခ်ခရိုင် မဲဆောက် ၊ အုန်းဖျံနဲ့ ဖုပ်ဖရမြို့နယ်ထဲမှာ မနက်သွား - ညပြန် အနေနဲ့ လာရောက်အလုပ်လုပ်မယ့်အလုပ်သမားတွေလည်း Border Pass နယ်စပ်ဖြတ်ကျော်လက်မှတ်နဲ့ နေ့ချင်းပြန်ဝင်ရောက်လုပ်ကိုင်နိုင်ပြီလို့ သတင်းမှာ ဖော်ပြပါတယ် ။
ဒီမေလထဲမှာ MOU အလုပ်သမား ဝင်ရောက်မှု ဒီတကြိမ်သာရှိပြီး နောက်တစ်ကြိမ်ကတော့ လာမယ့်ဇွန်လဆန်းပိုင်းမှာမှ ထပ်ဝင်လာရမယ်လို့ တာဝန်ရှိသူက သတင်းသမားတဦးကို ပြောပါတယ်။
အခုလို မြန်မာအလုပ်သမားတွေ တရားဝင်လာမယ့်သူတွေ များမယ်ဆိုရင် တရားမဝင်လာတဲ့သူတွေ နည်းပါးသွားမယ်လို့ မဲဆောက်မြို့နယ်ရဲ ဒါရိုက်တာရဲမှူးကြီး မွန်းဆာကယောက်အော်ကလည်း ပြောပါတယ်။
မြန်မာနိုင်ငံမှာ အလုပ်အကိုင်အဆင်မပြေမှုတွေကြောင့် အိမ်နီးချင်းထိုင်းနိုင်ငံထဲမှာ တရားဝင် MOU အနေနဲ့ရော ၊ တရားမဝင်လမ်းကြောင်းကနေပါ ဝင်ရောက်လုပ်ကိုင်ဖို့ စောင့်ဆိုင်းနေရတဲ့ အလုပ်သမားတွေဟာ မြဝတီခရိုင်တစ်ခုတည်းမှာတင် ၁၀၀၀၀ ကျော်လောက်ရှိနေတယ်လို့ မဲဆောက်အခြေစိုက် မြန်မာနိုင်ငံသားများအရေးပူးတွဲလှုပ်ရှားမှုကော်မတီ ဥက္ကဋ္ဌ ဦးမိုးကြိုးက ဒီဗွီဘီကို ပြောပါတယ်။
