မြိတ်-တနင်္သာရီ ပြည်ထောင်စုလမ်းမကြီးပေါ်မှာ ဖြတ်သန်းသွားလာနေကြတဲ့ ခရီးသွားပြည်သူတွေအနေနဲ့ အခု မေလ ၁၂ ရက်ကစပြီး ည ၈ နာရီကနေ မနက် ၅ နာရီအထိ ဖြတ်သန်းသွားလာခြင်းမပြုကြဖို့ မြိတ်ပြည်သူ့ကာကွယ်ရေးအဖွဲ့ (ပ.က.ဖ) ကနေ သတိပေး ထုတ်ပြန်ထားပါတယ်။
အဆိုပါ ပြည်ထောင်စုကားလမ်းမကြီးပေါ်မှာ စစ်ကောင်စီတပ်က အရပ်သား ပြည်သူ့ကားတွေကို အသုံးပြုပြီး ရိက္ခာတင်ပို့လာတာရှိသလို ခရီးသည်တင်ကား၊ ကုန်ကားတွေကို အကာအကွယ်ယူပြီး ယာဉ်တန်းသွားလာနေတာတွေ ရှိနေတဲ့အတွက် အခုလို သတိပေး ထုတ်ပြန်ရတာဖြစ်တယ်လို့ ပြောပါတယ်။
မြိတ်ပြည်သူ့ကာကွယ်ရေးအဖွဲ့ (ပ.က.ဖ) ရဲ့ သတင်းနဲ့ ပြန်ကြားရေး တာဝန်ရှိသူကတော့ “ပြည်သူကိုပြောချင်တာက ကျနော်တို့အနေနဲ့က မစ်ရှင်တခု လုပ်တဲ့အခါမှာ အရပ်သားပြည်သူ ထိခိုက်မှုမရှိအောင် လုပ်ဆောင်နေပါတယ်။ ဒါကြောင့် စကစယာဉ်တန်းနဲ့ ခပ်ကွာကွာ လိုက်ပေးပါလို့လည်း အသိပေးလိုပါတယ်” လို့ ပြောပါတယ်။
လက်ရှိ တနင်္သာရီမြို့နယ်အတွင်းမှာ စစ်ကောင်စီဘက်ကနေပြီး စစ်ကြောင်းထိုး တက်လာတာတွေ ရှိနေပေမဲ့လည်း နှစ်ဖက် ထိပ်တိုက်ထိတွေ့မှုတွေကတော့ မရှိသေးဘူးလို့ ပြောပါတယ်။
ပြီးခဲ့တဲ့ရက်ပိုင်းက ပြည်ထောင်စုလမ်းမပေါ်က ဘန်းလမွတ်ကျေးရွာဘက်မှာ စစ်ကောင်စီယာဉ်တန်း မိုင်းဆွဲတိုက်ခိုက်ခံရပြီးနောက် အဲဒီယာဉ်တန်းနဲ့ ကပ်ပါလာတဲ့ ခရီးသည်ကား ၁ စီး မိုင်းစထိမှန်ခဲ့တယ်လို့ သိရပါတယ်။
ဒါ့အပြင် ပြည်ထောင်စုကားလမ်းမကြီးပေါ်မှာ ဆက်လက်ဖြတ်သန်းသွားလာနေကြတဲ့ ခရီးသည်ကားတွေ အနေနဲ့လည်း အမိုးတာလပတ် အုပ်ပြီးတော့ ဖြတ်သန်းသွားလာတာတွေ မလုပ်ကြဖို့နဲ့ ကားမှန်ချပြီး မောင်းနှင်ပေးကြဖို့ကိုလည်း ပြည်သူ့ကာကွယ်ရေးဘက်ကနေ သတိပေးထားပါသေးတယ်။
အဆိုပါ သတိပေးတားမြစ်ထားတဲ့ကြားကနေ ဖြတ်သန်းသွားလာနေပါက ဖြစ်လာမယ့် ထိခိုက်ပျက်စီးမှုတွေကို မြိတ်ပြည်သူ့ကာကွယ်ရေးအဖွဲ့ (ပ.က.ဖ) ကနေ တာဝန်ယူမှာ မဟုတ်ကြောင်းနဲ့ နောက်ထပ် ကြေညာချက် မထုတ်ပြန်ခင်အထိ ပြောင်းလဲသတ်မှတ်သွားမှာ မဟုတ်ကြောင်းကိုလည်း သတိပေး ထုတ်ပြန်ထားပါတယ်။
မြန်မာပြည်တွင်းမှာ ကိုဗစ်-၁၉ ပိုးတွေ့ရှိမှု ပြန်လည်မြင့်တက်လာတဲ့အတွက် နေပြည်တော် အဝင်အထွက်ဂိတ်တချို့မှာ ကိုဗစ်ပိုးရှိ၊ မရှိ စစ်ဆေးမှုတွေ ပြန်လည်ပြုလုပ်လာတယ်လို့ ဒေသခံတွေက ပြောပါတယ်။
သင်္ကြန်ကာလအပြီးမှာ မြန်မာနိုင်ငံမှာ ကိုဗစ်ပိုးတွေ့လူနာ နေ့စဉ်ရှိနေပြီး ဧပြီ ၂၁ ရက်ကနေ ၂၃ ရက်အထိ စစ်ကောင်စီရဲ့ နေ့စဉ်ထုတ်ပြန်ချက်တွေထဲမှာ ပိုးတွေ့လူနာစာရင်းကလည်း အမြဲပါဝင်နေတာ ဖြစ်ပါတယ်။
နေပြည်တော်ဒေသခံတဦးက “သူတို့ထုတ်ပြန်ချက်တွေထဲမှာတော့ နေ့တိုင်းပါနေတာပဲ၊ သင်္ကြန်ပြီးကတည်းက။ နေ့တိုင်း ၃၀/၄၀ တော့ ပါနေတာ။ ဒီမှာတော့ ပုံမှန်လိုပါပဲ။ နေပြည်တော်ထဲ အဝင်မှာတော့ ကိုဗစ်ရှိ မရှိ စစ်တယ်ကြားတယ်” လို့ ပြောပါတယ်။
တနင်္သာရီတိုင်း၊ မြိတ်မြို့မှာတော့ ရေပုန်းရပ်ကွက်မှာ နေမကောင်းလို့ ဆေးရုံမှာ သွားရောက်စစ်ဆေးတဲ့ ကလေးငယ် ၁ ဦးမှာ ကိုဗစ်ပိုး တွေ့ရှိခဲ့ပြီးနောက် မိသားစုဝင် ၁ ဦးမှာလည်း ကိုဗစ်ထပ်မံတွေ့ရှိခဲ့တယ်လို့ လူမှုကူညီရေးအသင်းတွေဆီက သိရပါတယ်။
ကိုဗစ်တွေ့ရှိတဲ့ ကလေးငယ်မှာ အသက် ၁ နှစ်ကျော်အရွယ်သာရှိတဲ့ မိန်းကလေးဖြစ်ပြီး ဧပြီ ၂၂ ရက် ည ၁၀ နာရီလောက်မှာ ဆေးရုံကို သွားရောက်စစ်ဆေးချိန် ကိုဗစ်ပိုး စစ်ဆေးတွေ့ရှိခဲ့တာ ဖြစ်တယ်လို့ သိရပါတယ်။
အဆိုပါကလေးမှာ ကိုဗစ်ပိုးတွေ့ရှိခဲ့ပြီးနောက် မိသားစုဝင်တွေကို စစ်ဆေးခဲ့ရာ အမျိုးသမီး ၁ ဦးမှာ ကိုဗစ်ထပ်မံတွေ့ရှိခဲ့တာဖြစ်တယ်လို့ သိရပါတယ်။
ရွှေရောင်နေ့သစ် နာရေးကူညီမှုအသင်း တာဝန်ရှိသူတဦးက “ကလေး နေမကောင်းလို့ဆိုပြီး ဆေးရုံမှာ သွားပြရင်း ကိုဗစ်တွေ့တာပါ။ မိသားစုဝင်တွေ ထပ်စစ်ဆေးတော့ အမျိုးသမီးတဦးမှာ ထပ်တွေ့တယ်။ လက်ရှိ အဲဒီနှစ်ယောက်ကို ဆေးရုံမှာ ကုသထားတယ်” လို့ ပြောပါတယ်။
လက်ရှိမှာတော့ ကလေးငယ်နဲ့ အမျိုးသမီးကို မြိတ်မြို့ ပြည်သူ့ဆေးရုံမှာ ဆေးကုသမှု ခံယူထားတယ်လို့ သိရပြီး ကျန်ရှိတဲ့ မိသားစုဝင်တွေကိုတော့ နေအိမ်မှာ လော့ဒေါင်းချထားတယ်လို့ သိရပါတယ်။
တနင်္သာရီတိုင်းမှာ အခုလအတွင်း ကိုဗစ်သံသယရှိသူ ၁၃၄ ဦးကို စစ်ဆေးချိန် ထားဝယ်မြို့က ၃ ဦးမှာ ကိုဗစ်ပိုး စစ်ဆေးတွေ့ရှိခဲ့တယ်လို့ တနင်္သာရီတိုင်း ကျန်းမာရေးဌာနက ထုတ်ပြန်ပါတယ်။
မြိတ်မြို့မှာ ကိုဗစ်ကူးစက်တဲ့လူနာ မတွေ့တာ ကြာခဲ့ပြီဖြစ်ကာ အခုရက်ပိုင်းမှ ကိုဗစ်ကူးစက်သူ ပြန်တွေ့တာဖြစ်တယ်လို့ သိရပါတယ်။
မြန်မာတနိုင်ငံလုံးမှာတော့ ဧပြီ ၂၁ ရက်မှာ ကိုဗစ်ပိုးတွေ့လူနာ ၃၀ ကျော်ခန့် ရှိရာကနေ ၂၂ ရက်နဲ့ ၂၃ ရက်တို့မှာ တနေ့ကို ၄၀ ကျော်ခန့် ပိုးတွေ့လူနာတွေ့ရှိရပြီး အများစုမှာ ပြည်တွင်းကူးစက်သူတွေ ဖြစ်တယ်လို့ စစ်ကောင်စီရဲ့ ကျန်းမာရေးဝန်ကြီးဌာနက ထုတ်ပြန်ထားပါတယ်။
