မကွေးတိုင်း၊ သရက်ခရိုင်၊ မင်းတုန်းမြို့နယ်က သရက်ချောင်းရွာရှိ နယ်မြေရဲစခန်းမှာရှိတဲ့ စစ်ကောင်စီတပ်နဲ့ ရဲတွေကို ဒေသခံကာကွယ်ရေးတပ်က ဖေဖော်ဝါရီ ၁၀ ရက်မှာ အနီးကပ် သွားရောက်ပစ်ခတ် တိုက်ခိုက်ခဲ့တယ်လို့ သရက်ခရိုင်တပ်ရင်း၊ တပ်ရင်း-၄ Eagle Force က ထုတ်ပြန်ပါတယ်။

အဲဒီရဲစခန်းကို ဒေသကာကွယ်ရေးတပ်က ဝင်ရောက်တိုက်ခိုက်ပစ်ခတ်စဥ် အပြန်လှန် တိုက်ပွဲဖြစ်ပွားခဲ့ပြီး စုံစမ်းမှုတွေအရ စစ်ကောင်စီ ပူးပေါင်းတပ်ဘက်က ၂ ယောက် သေဆုံးပြီး အများပြား ထိခိုက်ဒဏ်ရာ ရတယ်လို့ ထုတ်ပြန်ချက်က ဆိုပါတယ်။

Eagle Force တပ်ဖွဲ့ တာဝန်ရှိသူတဦးက “အဲဒီစခန်းက အနီးနားရွာက ဒေသခံတွေကို မထင်ရင် မထင်သလို ဖမ်းဆီးတာတွေ၊ စစ်ဆေးတာတွေ ရှိနေတာပါ။ ဒါ့ကြောင့် အနီးကပ် ဦးအောင်တိုက်ခိုက်ခဲ့တာပါ” လို့ ‌ပြောပါတယ်။

သရက်ခရိုင် တပ်ရင်း-၄ Eagle Force ဟာ ဖေဖော်ဝါရီ ၉ ရက်ကလည်း သရက်မြို့ က.ပ.စ ၁၂ ကို ရှော့တိုက်ဒုံးနဲ့ ပစ်ခတ်တိုက်ခိုက်ခဲ့သလို ရေမျက်ကျေးရွာ နယ်မြေရဲစခန်းကိုလည်း ဒရုန်းနဲ့ ဗုံးချတိုက်ခိုက်ခဲ့ပါသေးတယ်။

မကွေးတိုင်း၊ မင်းတုန်းမြို့နယ်မှာပဲ ဖေဖော်ဝါရီ ၉ ရက် ညနေက ကွမ်းလာဝယ်တဲ့ စစ်ကောင်စီတပ်သား ၂ ယောက် သေနတ်နဲ့ပစ်သတ်ခံခဲ့ရတယ်လို့ Swallow PDF (မကွေး) ကနေ သိရပါတယ်။

မင်းတုန်းမြို့နယ်၊ ပြောင်းရွာ စစ်ဆေးရေးဂိတ်က စစ်ကောင်စီအရာရှိတယောက်ဟာ ထန်းပင်ကုန်းဘက်မှာ အမြဲသွားအိပ်တယ်လို့ သတင်းရတဲ့အတွက် ရှင်းလင်းဖို့ ဖေဖော်ဝါရီ ၉ ရက် ညနေ ၅ နာရီကျော်လောက်မှာ သွားစောင့်ခဲ့တာလို့ Swallow PDF ခေါင်းဆောင် ဗိုလ်ပျံလွှားက ပြောပါတယ်။

ဒါပေမဲ့ အဲဒီနေ့က အဲဒီအရာရှိ ပါမလာဘဲ ဆိုင်ကယ်နဲ့ ကွမ်းဝယ်ဖို့ထွက်လာတဲ့ စစ်သား ၂ ယောက်ကို ထန်းပင်ကုန်းရွာနားမှာ သေနတ်နဲ့ ၁၀ ချက်လောက် ပစ်ခတ်ခဲ့လို့ ပွဲချင်းပြီး သေဆုံးကာ လက်ကိုင်ဖုန်း ၂ လုံး သိမ်းဆည်းနိုင်ခဲ့ပြီး လက်နက်ခဲယမ်းတွေတော့ မရရှိခဲ့ဘူးလို့ ဆိုပါတယ်။

ဗိုလ်ပျံလွှားက “မင်းတုန်းဘက်ကနေ စစ်သား ၆ ယောက်လောက်နဲ့ အလောင်းလာသယ်တဲ့ကားကို မိုင်းဆွဲတိုက်ခိုက်ခဲ့ပေမဲ့ မကွဲလိုက်ဘူး။ အဲဒီနောက်မှာ မင်းတုန်းတမြို့နယ်လုံးကို လျှပ်စစ်မီးတွေဖြတ်တယ်၊ ရှာဖွေစစ်ဆေးခဲ့တယ်” လို့ ပြောပါတယ်။

မကွေးတိုင်း၊ မြိုင်နဲ့ ပခုက္ကူမြို့နယ်တွေမှာလည်း ဖေဖော်ဝါရီ ၉ ရက်က တိုက်ပွဲ ၄ ကြိမ် ဖြစ်ပွားပြီး စစ်ကောင်စီဘက်က ၆ ယောက်ထက်မနည်း အပြင်းအထန် ဒဏ်ရာရခဲ့တယ်လို့ မြိုင် ပ.က.ဖ ကနေ သိရပါတယ်။

ပေါက်မြို့နယ်၊ ဖလံကိုင်းဘက်ကနေ ပြန်လာတဲ့ စစ်ကောင်စီယာဉ်တန်းအား လုံခြုံရေးယူဖို့ ကင်းပုန်းလာဝပ်တဲ့ မြိုင်မြို့နယ် တွင်းမရွာက ပျူစောထီးတွေကို တွင်းမ-သရက်ကန် လမ်းပိုင်းမှာ မနေ့မနက် ၇ နာရီလောက်က မိုင်းဆွဲတိုက်ခိုက်ခဲ့လို့ ၃ ယောက် အပြင်းအထန် ဒဏ်ရာရသွားတယ်လို့ မြိုင်ပကဖ တပ်ရင်း-၁၊ တပ်ရင်းမှူး ဗိုလ်လက်ယာက ပြောပါတယ်။

ဒါ့အပြင် ပခုက္ကူမြို့နယ် ကမ္မမြို့ကနေ မြိုင်မြို့နယ် သရက်ကန်ရွာဘက်ကိုသွားတဲ့ စစ်ကောင်စီယာဉ်တန်းကို မနေ့မနက် ၉ နာရီလောက်မှာ တွင်းမ-သရက်ကန် လမ်းပိုင်းမှာပဲ မိုင်းဆွဲတိုက်ခိုက်ခဲ့လို့ စစ်ကောင်စီဘက်က ထိခိုက်သေဆုံးသူ ရှိနိုင်သလို ပေါက်မြို့နယ် ဖလံကိုင်းဘက်ကနေ ပြန်လာတဲ့ စစ်ကောင်စီယာဉ်တန်းကိုလည်း မနေ့မနက် ၁၁ နာရီလောက်မှာ တွင်းမ-သရက်ကန်လမ်းပိုင်းမှာပဲ ဒရုန်းအသုံးပြုပြီး ဗုံးသီးတွေဖြုတ်ချ တိုက်ခိုက်ခဲ့လို့ ထိခိုက်သူရှိနိုင်တယ်လို့ ဆိုပါတယ်။

မနေ့က နေ့လယ်ပိုင်းမှာလည်း ပခုက္ကူမြို့နယ်၊ ကန်တော်ကျေးရွာနားက စစ်ကောင်စီရဲ့ စစ်ဆေးရေးဂိတ်မှာ ဒရုန်းနဲ့ ဗုံးသီးချ တိုက်ခိုက်ခဲ့လို့ စစ်ကောင်စီတပ်သား ၁ ယောက်နဲ့ ပျူစောထီး ၂ ယောက် ဒဏ်ရာရသွားပြီး လက်နက်ကြီး၊ လက်နက်ငယ်တွေနဲ့ ပြန်လည် ပစ်ခတ်ပေမဲ့ ရဲဘော်တွေ ထိခိုက်မှုမရှိဘဲ ဆုတ်ခွာနိုင်ခဲ့တယ်လို့ ဗိုလ်လက်ယာက ဆိုပါတယ်။

အခုတိုက်ခိုက်မှုတွေနဲ့ ပတ်သက်လို့တော့ စစ်ကောင်စီဘက်က သတင်းထုတ်ပြန်တာ မတွေ့ရသေးပါဘူး။

မကွေးတိုင်း ​မြိုင်နဲ့ပခုက္ကူမြို့နယ်မှာ နိုဝင်ဘာ ၁၇ ရက်နဲ ၁၈ ရက်တွေက စစ်ကောင်စီတပ်ဖွဲ့ကို မိုင်း၊ ဒရုန်းတွေနဲ့ တိုက်ခိုက်ခဲ့တာကြောင့် ၇ ယောက်ထက် မနည်းသေဆုံးပြီး အများအပြား ဒဏ်ရာရရှိခဲ့တယ်လို့ မြိုင် ပ.က.ဖ က ပြောပါတယ်။

မြိုင်မြို့နယ်အနောက်ဘက် ကြောင်ကန်ရွာနားကို ကား ၂ စီးနဲ့ သေနတ်တွေ ပစ်ခတ်ပြီးဝင်လာတဲ့ စစ်ကောင်စီတပ်တွေကို နိုဝင်ဘာ ၁၈ ရက်နေ့ ညနေ ၅ နာရီလောက်မှာ မိုင်းအကြီး ၃ လုံးနဲ့ တိုက်ခိုက်ခဲ့တာလို့ မြိုင် ပ.က.ဖ တပ်ရင်း(၁) တပ်ရင်းမှူး ဗိုလ်လက်ယာက ပြောပါတယ်။

အဲဒီတိုက်ပွဲအတွင်းမှာ  ရဲဘော်တွေ အထိခိုက်အကျဆုံး မရှိဘဲ ဆုတ်ခွာနိုင်ခဲ့ပေမယ့် ဒေသခံ တယောက်ကတော့ စစ်ကောင်စီတပ်သားတွေဘက်က သေနတ်ကျည် ရှပ်ထိမှန်ပြီး ဒဏ်ရာ အနည်ငယ် ရရှိခဲ့တယ်လို့ ဆိုပါတယ်။

ဒါ့အပြင် ပခုက္ကူဘက်ကနေထွက်လာတဲ့ ခြေလျင်စစ်ကြောင်းကိုလည်း နိုဝင်ဘာ ၁၇  မွန်းလွဲ ၂ နာရီလောက်က ကံတော်ရွာနဲ့ ကန်ရပ်ရွာကြားမှာ ဒရုန်းနဲ့ဗုံးကြဲ တိုက်ခိုက်ခဲ့သလို နယ်မြေရှင်းလင်းဖို့ ထွက်လာတဲ့အချိန်မှာလည်း မိုင်းပွိုင့်အကြီး ၉ လုံးနဲ့ မိုင်းဆွဲ တိုက်ခိုက်ခဲ့တာကြောင့် စစ်ကောင်စီတပ်ဘက်က ၇ ယောက်ထက်မနည်း သေဆုံးနိုင်တယ်လို့ ဗိုလ်လက်ယာက ပြောပါတယ်။

စစ်ကောင်စီဘက်က အနီးနားကျေးရွာတွေကို ပစ်ခတ်ခဲ့ပြီး ကံတော်ရွာက ဒေသခံ ၁၀ ယောက်ကို ဖမ်းဆီးသွားတယ်လို့ ဆိုပါတယ်။

နှစ်ဘက်တိုက်ပွဲအတွင်းမှာ စစ်ကောင်စီဘက်က ထိခိုက်သေဆုံးတဲ့အခြေနေကို သီးခြားအတည် မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်တာ မတွေ့ရသေးပါဘူး။

မြိုင်မြို့နယ်မှာ နိုဝင်ဘာ ၁၄ ရက် ညနေပိုင်းကလည်း စစ်ကောင်စီရဲ့ ကား ၂ စီးကို မြိုင် ပ.က.ဖ အပါဝင်ဒေသကာကွယ်ရေး ပူးပေါင်းတပ်ဖွဲ့တွေက တိုက်ခဲ့လို့ စစ်ကောင်စီဘက်က ၂ ယောက် သေဆုံးကာ အများအပြား ဒဏ်ရာရခဲ့တယ်လို့  သိရပါတယ်။