ကချင်ပြည်နယ် ၊ ဗန်းမော်မြို့ရှိ မြို့နယ်ဘောလုံးကွင်းမှာ ဖေဖော်ဝါရီ ၁၄ ရက် ညနေပိုင်းက ဗုံးပေါက်ကွဲမှုဖြစ်ပွားခဲ့ပါတယ်။
ဘောလုံးအားကစားပြိုင်ပွဲတွေ ကျင်းပဖို့ စစ်ကောင်စီက စီစဉ်နေချိန် မြို့နယ် ဘောလုံးကွင်းအတွင်းမှာ မနေ့ ညနေ ၆ နာရီခွဲလောက်က ဗုံးပေါက်ကွဲခဲ့တာလို့ ဒေသခံတွေထံက သိရပါတယ်။
“အားကစားကွင်းထဲမှာ ဘောလုံးပွဲကျင်းပဖို့ ပြင်ဆင်နေကြတယ်။ ဗုံးပေါက်တဲ့အချိန်မှာတော့ ကွင်းထဲ လူအများကြီး မရှိဘူး။ ဗုံးအသံက အတော်ကျယ်တယ်။ ဗုံးပေါက်တဲ့နေရာက ကြံ့ခိုင်ရေးရုံးဘက်ခြမ်းမှာ လူ ထိခိုက်တာတော့မရှိဘူး” လို့ ဒေသခံ တစ်ဦးက ပြောပါတယ်။
ဒီဇင်ဘာ ၃၁ ရက် ညနေပိုင်းကလည်း စစ်ကောင်စီတပ်ဖွဲ့ဝင်တွေ စီးနင်းလာတဲ့ကား ဗန်းမော် ၃ မိုင်ကွက်သစ် အောင်ပင်လယ် စားသောက်ဆိုင်အနီးမှာ ဗုံးပေါက်ကွဲခဲ့လို့ တပ်ဖွဲ့ဝင်တယောက် သေဆုံးပြီး နှစ်ယောက် ဒဏ်ရာရခဲ့ပါတယ်။
