close

မြေနေရာ

close

April 30, 2023

မြေနေရာငှားမရသဖြင့် ကျောက်တော် စစ်ဘေးရှောင်များ အခက်အခဲဖြစ်နေ

ရခိုင်ပြည်နယ် ကျောက်တော်မြို့နယ်၊ ဝါးတောင်စစ်ဘေးရှောင်စခန်းက အိမ်ထောင်စု ၆၀ ကျော်ဟာ အခုနေထိုင်နေကြတဲ့ စခန်းမြေနေရာကို ဆက်လက်ငှားရမ်းလို့ မရတော့တာကြောင့် စခန်းပြောင်းရွှေ့နေကြရပြီး နေစရာအခက်အခဲဖြစ်နေကြတယ်လို့ စခန်းတာဝန်ရှိသူတွေက ပြောပါတယ်။

ဝါးတောင်စစ်ဘေးရှောင်စခန်းဟာ ကျေးရွာသား ၂ ယောက်ရဲ့ လယ်မြေတွေကို ငှားရမ်း တည်ဆောက်ထားကြတာဖြစ်ပြီး မြေပိုင်ရှင် တယောက်က မြေမငှားတော့တာကြောင့် အခုစခန်းနဲ့ ၂ မိုင်ခန့်အကွာ တောင်မင်းကုလားစစ်ဘေးရှောင်စခန်းအနီးကို ပြောင်းရွှေ့နေကြရတယ်လို့ စစ်ဘေးရှောင် စခန်းတာဝန်ခံ ဦးနိုင်ထွန်းဝင်းက ပြောပါတယ်။

"ဝါးတောင်စခန်းဆောက်ထားတဲ့ မြေပိုင်ရှင်က မြို့နယ်ထွေအုပ်ကိုရော ULA နယ်မြေရုံးတွေကိုပါ တိုင်တန်းထားတာကြောင့် ဘယ်လိုမှ နေလို့မရတော့ဘူး။ မြေပိုင်ရှင်က ၂ ယောက်ရှိတာ။ တဦးကတော့ ဆက်ပြီးငှားရမ်းလို့ ရသေးတယ်။ အခု​ ငှားရမ်းလို့ မရတော့တဲ့ မြေမှာနေထိုင်ကြတဲ့ အိမ်ထောင်စု ၆၆ စုဟာ ၂၈ ရက်ကတည်းက တောင်မင်းကုလားစစ်ဘေးရှောင်စခန်းနားကို ပြောင်းရွှေ့နေကြရပြီး အိမ်တွေဆောက်ဖို့ တော်တော်လေးကို အခက်ခဲဖြစ်နေကြတယ်" 

အခုပြောင်းရွှေ့ခဲ့ရတဲ့ တောင်မင်းကုလားစစ်ဘေးရှောင်စခန်းမှာ သောက်သုံးရေအပါဝင် နေစရာ အိမ်ဆောက်ဖို့ကအစ အခက်အခဲတွေအများကြီး ရှိနေတယ်လို့ စစ်ဘေးရှောင်တဦးက ပြောပါတယ်။

"အခု သောက်သုံးရေ အခက်အခဲတော့ ရှိတယ်။ နောက်အခုလောက် ပူပြင်းတဲ့အချိန်မှာ အိမ်တွေ ဆောက်ဖို့ တာပေါ်လင်တွေ၊ ဝါးတွေ စုံစုံလင်လင်မရှိဘဲ အခက်အခဲတွေ ဖြစ်နေကြတယ်။ ဟိုဘက်က ဖြိုဖျက်ပြီး ယူလာတာကလည်း ဟောင်းနေပြီဆိုတော့ ဆွေးသွားတာတွေ များတယ်။ အဓိကအခက်အခဲကတော့ အိမ်ရဲ့ အမိုးအကာတွေက အခုလောလောဆယ် အခက်အခဲဖြစ်တယ်။" 

ဝါးတောင်စစ်ဘေးရှောင်စခန်းမှာ အိမ်ထောင်စု ၁၅၅ စု၊ လူဦးရေ ၈၀၀ ကျော် နေထိုင် ကြတာဖြစ်ပြီး မြေနေရာငှားရမ်း မရတာကြောင့် အိမ်ထောင်စု ၆၆ စုက လူဦးရေ ၃၇၀ လောက် ရွှေ့ပြောင်းသွားကြရတယ်လို့ စစ်ဘေးရှောင်တွေက ပြောပါတယ်။

ဝါးတောင် စစ်ဘေးရှောင်စခန်းမှာ ကျောက်တော်မြို့နယ် ယိုးချောင်းအတွင်းရှိ ခမောင်း၊ ကင်ဘိ၊ လေကွီ၊ ပညာကြီး၊ ငစရိုင်းကိုင်း၊ သိမ်းချောင်း၊ ချင်မဝန်တောင်း၊ တဲဝ စတဲ့ကျေးရွာတွေက ဒေသခံ တွေ ခိုလှုံနေကြတာ ဖြစ်ပါတယ်။

အခု ရွှေ့ပြောင်းနေကြရတဲ့ ဝါးတောင်စစ်ဘေးရှောင်စခန်းဟာ ၂၀၁၈ ခုနှစ်ကတည်းက စစ်ဘေးရှောင်နေကြရတဲ့  သက်တမ်းရှည်စစ်ရှောင်စခန်းတွေ ဖြစ်ပါတယ်။

11 mins Ago

June 13, 2022

မြေနေရာ ငှားရမ်းမရသဖြင့် ကျောက်တော် ဝါးတောင်စစ်ရှောင်များ အခက်ကြုံနေ

ရခိုင်ပြည်နယ်မှာ သက်တမ်းအရှည်ဆုံး စစ်ဘေးရှောင် စခန်းတခုဖြစ်တဲ့ ကျောက်တော်မြို့နယ် ဝါးတောင်ကျေးရွာ စစ်ဘေးရှောင်စခန်းမှာ လက်ရှိနေထိုင်ကြတဲ့ မြေနေရာကို ဆက်လက် ငှားရမ်းမရတာကြောင့် စစ်ဘေးရှောင်တွေ နေအိမ်ဆောက်ခွင့်မရရှိဘဲ အခက်ကြုံနေကြတယ်လို့ စခန်းတာဝန်ခံက ပြောပါတယ်။

စခန်းတာဝန်ခံ ဦးနိုင်ထွန်းဝင်းက “ကျနော်တို့ အခုနေနေထိုင်ကြတဲ့ မြေနေရာက ဆက်ပြီးတော့ ငှားရမ်းဖို့ အခက်အခဲတွေ ရှိနေတယ်။ မြေပိုင်ရှင် နှစ်ယောက်မှာ တစ်ယောက်က ဆက်မငှားနိုင်တော့ဘူး ဆိုပြီးပြောတယ်။ နောက်တယောက်ကလည်း မြေငှားဖို့ ညှိနှိုင်းလို့ မရဘူးဖြစ်နေတယ်။ အခုက မိုးတွင်းကာလဆိုတော့ အိမ်တွေက ပြိုပျက်နေကြတော့ ဘယ်လိုမှ နေလို့မရတော့ဘူး။ UNHCR က အိမ်တွေ ဆောက်ဖို့ သစ်၊ ဝါးတွေနဲ့ ဓနိတွေ ထောက်ပံ့ထားတာကိုလည်း မြေပိုင်ရှင်တွေက မြေမငှားကြတော့ ဆောက်လုပ်လို့မရဘူး ဖြစ်နေကြတယ်” လို့ ပြောပါတယ်။

အဆိုပါ စစ်ဘေးရှောင် စခန်းမြေနေရာကို တနှစ် ၂၄ သိန်းကျပ်နဲ့ ငှားရမ်းထားတာဖြစ်ပြီး ငှားရမ်းခတွေအတွက်  ကုလသမဂ္ဂ ကမ္ဘာ့စားနပ်ရိက္ခာအစီအစဉ် (WFP) က စစ်ဘေးရှောင်တွေကို လစဉ်ထောက်ပံ့တဲ့ငွေကို စုဆောင်းပြီး ပေးချေနေကြရတာလို့ ဦးနိုင်ထွန်းဝင်က ​ဆိုပါတယ်။

စစ်ဘေးရှောင်တဦးက “အခု မိုးတွင်းရာသီလည်းဖြစ်လာပြီး အိမ်တွေက ပြိုပျက်နေကြပြီး မိုးရွာရင် တော်တော်လည်းကို ဒုက္ခရောက်ကြတယ်။ ညပိုင်းမိုးရွာရင် အိမ်ခေါင်မိုးတွေက မိုးယိုတော့ ကလတွေလည်း  မအိပ်ကြရဘူး။ သစ်တွေ ဝါးတွေရှိတာလည်း မြေငှားလို့ မရတာကြောင့် မဆောက်ရဘူးဖြစ်နေတယ်” လို့ ပြောပါတယ်။

ဝါးတောင်စစ်ဘေးရှောင်စခန်းမှာ ပြီးခဲ့ ၂၀၁၈ ခုနှစ် ဒီဇင်ဘာ ကတည်းက ကျောက်တော်မြို့နယ်က ကျေးရွာ ၈ ရွာမှ အိမ်ထောင်စု ၁၅၇ စုက လူဦးရေ ၈၆၃ ဦး ခိုလှုံနေကြတာဖြစ်ပါတယ်။

11 months Ago
Up