ရခိုင်ပြည်နယ် မြေပုံမြို့နယ် သင်္ဘောဆိပ်နားက မြစ်ထဲမှာ စားသောက်ကုန်တွေတင်ဆောင်လာတဲ့ စက်လှေတစီးကို စစ်ကောင်စီတပ်က နိုဝင်ဘာ ၅ ရက်နေ့ ညနေ ၃ နာရီလောက် ဖမ်းဆီးခဲ့တယ်လို့ မြေပုံမြို့ဒေသခံတယောက်က ဒီဗွီဘီကို ပြောပါတယ်။

အမ်းမြို့နယ် ကဇုကိုင်းကျေးရွာက ဦးရွှေနိုင်စိန်၊ ဦးညီပုနဲ့ ဦးတင်မောက်သန်းတို့ဟာ မြေပုံမြို့နယ် က စက်လှေတစီးကို ငှားရမ်းပြီး စားသောက်ကုန်ပစ္စည်းတွေ တင်ဆောင်လာစဉ် ဖမ်းဆီးခံခဲ့ရတာလို့ ဆိုပါတယ်။

ဖမ်းဆီးခံရသူ ၃ ယောက်အား မြေပုံမြို့မရဲစခန်းစစ်ကြောရေးကို ခေါ်ဆောင်သွားပြီး စစ်ဆေးမေးမြန်းနေတယ်လို့ ဒေသခံတွေက ပြောပါတယ်။

စစ်တွေမြို့နယ် မင်းချောင်းတံတားနားမှာလည်း နိုဝင်ဘာ ၄ ရက်နေ့ ညနေပိုင်းက စားသောက်ကုန်တွေ တင်ဆောင်လာတဲ့ စက်လှေတစီးကို စစ်တပ်က ဖမ်းဆီးခဲ့ပြီး စစ်တွေမြို့မရဲစခန်းမှာ ပြည်တွင်းရေကြောင်းဥပဒေနဲ့ အမှုဖွင့်ထားတယ်လို့ သိရပါတယ်။

ရခိုင်ပြည်နယ်အတွင်းမှာ စစ်ကောင်စီတပ်တွေနဲ့ ရက္ခိုင့်တပ်တော် (အေအေ) တို့ အခုနှစ် သြဂုတ်လကစတင်ကာ တိုက်ပွဲတွေ ပြန်ဖြစ်ပြီးနောက်ပိုင်း မြို့နယ်အများအပြားမှာ စစ်ကောင်စီက လက်နက်ကြီးနဲ့ပစ်ခတ်တာ၊ ဧည့်စာရင်းစစ်ဆေးတာ၊ အပြစ်မဲ့ပြည်သူတွေကို မတရားဖမ်းဆီးတာ၊ ခရီးသည်တင်ယာဥ်တွေနဲ့ ကုန်တင်ယာဥ်တွေ ကုန်းလမ်း၊ ရေလမ်းတွေအားလုံးကို ပိတ်ဆို့ပြီး စားနပ်ရိက္ခာနဲ့ ဆေးဝါးသယ်ယူခွင့်ဖြတ်တောက်တာတွေ ပြုလုပ်နေတယ်လို့ သိရပါတယ်။

ရခိုင်ပြည်နယ် မြေပုံမြို့နယ်အတွင်း ပြေးဆွဲနေတဲ့ စက်လှေတွေအားလုံး အဝင်/အထွက် သွား လာတာကို သတင်းပို့ရမယ်လို့  စစ်ကောင်စီတပ်က စက်တင်ဘာ ၉ ရက်မှာ အမိန့်ထုတ်ထား တယ်လို့ ရေလုပ်သားတွေက ပြောပါတယ်။

မြေပုံမြို့ဒေသခံ တဦးက "စက်လှေတွေ အားလုံး အထွက်/အဝင် တနေရာတည်းမှာ သတင်းပို့ စာရင်းပေးမှ ထွက်ခွင့်ရတယ်။ သတင်းပေးပြီး မသွားရင် ပစ်ခတ်ဖမ်းဆီးမယ်ဆိုပြီး မနေ့က သတင်းထုတ်ပြန်ထားတယ်။ သတင်းပေးရမှာကလည်း နေရာတခုတည်း ဖြစ်နေတယ်။"လို့ ပြောပါတယ်။

ခရီသည်တင်နဲ့ ငါးဖမ်းစက်လှေအားလုံး မြေပုံသင်္ဘောဆိပ်နားက မောင်မောင်ဆိပ်ကမ်းမှာ စာရင်းပေးရမှာဖြစ်ပြီး   မြေပုံမြို့အနောက်ဘက်ကျေးရွာ ၇ ရွာက ငါးဖမ်းလှေ ၆၀၀ လောက် အခက်တွေ့နေတယ်လို့ ရေလုပ်သားတဦးက ပြောပါတယ်။

ကျောက်မော်ကြီးကျေးရွာမှ ရေလုပ်သား တဦးက "သူတို့ကို သွားသတင်းပို့ရတာ ကိစ္စမရှိဘူး။ ကျနော်တို့ ရွာက အနောက်ဘက်မှာရှိတာပါ။ သူတို့ကို သတင်းပေးရမှာက အရှေ့ဘက်သင်္ဘောဆိပ် မှာဆိုတော့ အနောက်ကနေ အရှေ့ကို ပတ်ပြီးလာဖို့ ၃ နာရီလောက် ကြာမယ်။ ငါးက ဘယ်အချိန်သွားဖမ်းရမှာလဲ။ နောက်ပြီး ဆီစျေးက မြင့်နေတယ်။ သတင်းပေးရတာကို အနောက်ဘက်က တံငါရွာတွေအတွက် သီးသန့်လုပ်ပေးသင့်တယ်။"လို့ ပြောပါတယ်။

မြေပုံမြို့အနောက်ဘက်မှာ ငုံးပြင်လယ်၊ ကျောက်မော်ကြီး၊ ထူးချေ၊ ကိုင်းချေ၊ အငူ၊ အုန်းတောဆိုတဲ့ တံငါရွာတွေရှိပြီး ငါးဖမ်းတံငါလှေ ၆၀၀ လောက်ရှိနေပါတယ်။

စက်တင်ဘာ ၇ ရက် မနက်ပိုင်းက မြေပုံမြို့မှာ စစ်ကောင်စီတပ်ကို ရက္ခိုင်တပ်တော် အေအေက မိုင်းခွဲ တိုက်ခိုက်ခဲ့တာကြောင့် စစ်ကောင်စီတပ်ဟာ မြေပုံမြို့က မသင်္ကာတဲ့ နေအိမ်တွေကို နေ့စဉ် စစ်ဆေးနေတယ်လို့ မြေပုံမြို့ခံတချို့က ပြောပါတယ်။