ရခိုင်ပြည်နယ်၊ မြောက်ဦးမြို့အခြေစိုက် ၅၄၀ တပ်ရင်းမှ စစ်ကောင်စီတပ်သား ၃ ဦး ဇန်နဝါရီ ၁၆ ရက် ညက လက်နက်တွေနဲ့ ထွက်ပြေးသွားတယ်လို့ မြောက်ဦးဒေသခံတွေက အတည်ပြု ပြောပါတယ်။

“ထွက်ပြေးသွားကြတဲ့ တပ်သားတွေရဲ့ နာမည်နဲ့ ရာထူးကိုတော့ အတိအကျ မသိရသေးဘူးဗျ။ ​တပ်တွင်းသတင်းအရကတော့ ၅၄၀ တပ်ရင်းက စစ်သား ၃ ဦး လက်နက်အပြည့်အစုံနဲ့ မနေ့က ထွက်ပြေးသွားတယ်လို့ အတိအကျ ​ပြောကြတယ်” လို့ ဒေသခံတဦးက ပြောပါတယ်။

ထွက်ပြေးသွားသူ ၃ ဦးကို စစ်တပ်က မြောက်ဦးမြို့ထဲမှာ စစ်ကားတွေနဲ့ လိုက်ရှာနေပြီး စစ်ဆေးရေးဂိတ်တွေမှာလည်း အသေးစိတ် စစ်ဆေးနေကြောင်း ဒေသခံ ကားသမားတွေက ပြောပါတယ်။

“မြို့ကိုပတ်ပြီး စစ်ကားတွေနဲ့ လိုက်ရှာနေကြတာ တွေ့ရတယ်။ လင်းမြွေတောင်ထက်က စစ်သားတွေလည်း ကားလမ်းမကိုဆင်းပြီးတော့ စစ်ဆေးနေတာတွေ ရှိနေတယ်” လို့ ကားသမားတဦးက ပြောပါတယ်။

ဒါ့အပြင် ပြီးခဲ့တဲ့ရက်ကလည်း မြောက်ဦးအခြေစိုက် ၃၇၈ တပ်ရင်းမှ တပ်ကြပ်ကျော်သန့်စင် ဟာ တပ်တွင်းမှာ အရာရှိစစ်ဗိုလ် ၃ ဦးနဲ့ စကားများ ရန်ဖြစ်ပြီး ထွက်ပြေးသွားခဲ့တာ ရှိတယ်လို့ ဒေသခံတွေဆီကနေ သိရပါတယ်။

ရခိုင်မှာ စစ်ကောင်စီနဲ့ ရက္ခိုင့်တပ်တော် (အေအေ) တို့ အလွတ်သဘော အပစ်အခတ် ရပ်စဲထားကြပေမဲ့ စစ်ကောင်စီတပ်အတွင်း ယုံကြည်မှုနဲ့ စိတ်ပိုင်းဆိုင်ရာ ထိခိုက်မှုတွေ ရှိလာနေသလို အထက်အရာရှိတွေရဲ့ ဖိနှိပ်မှုတွေကြောင့် အခုလို တပ်ပြေးတွေ တရက်တရက် များလာနေကြောင်း ရခိုင်စစ်ရေးနဲ့ နိုင်ငံရေး လေ့လာသူတွေက ထောက်ပြပါတယ်။

ရက္ခိုင့်တပ်တော် (အေအေ) ပြောခွင့်ရ ခိုင်သုခကတော့ ပဥ္စမအကြိမ်မြောက် သတင်းစာရှင်းလင်းပွဲမှာ စစ်ကောင်စီတပ်သားအရေအတွက် ရာနဲ့ချီပြီး အေအေဘက်ကို ခိုလှုံလာနေတာရှိကြောင်း ပြောဆိုထားပါတယ်။

ရခိုင်တိုင်းရင်းသားမျိုးနွယ်စုဝင် တခုဖြစ်တဲ့ ခမီလူမျိုးတို့ရဲ့ ၆ ကြိမ်မြောက် နှစ်သစ်ကူးပွဲ အခမ်းအနားကို မြောက်ဦးမြို့ မြို့တော်ခန်းမမှာ နိုဝင်ဘာ ၂၃ ရက် မနက်က ပထမဆုံးအကြိမ် အကျဉ်းရုံးကျင်းပခဲ့ပါတယ်။

 ပွဲကျင်းပရေးကော်မတီ တာဝန်ရှိသူလည်းဖြစ်၊ ခမီစာပေနှင့် ယဉ်ကျေးမှုအသင်း ဥက္ကဋ္ဌလည်းဖြစ်သူ ဦးလေကျော်အောင်က “ကျနော်တို့က ​အစကတည်းက မြောက်ဦးမှာကျင်းပဖို့ ပြည်နယ်အစိုးရကို ခွင့်ပြုချက် တင်ထားတာ။ ခွင့်ပြုချက်မရရင် စစ်တွေမှာ ကျင်းပမယ်ဆိုပြီး စစ်တွေကို ကျနော်ကိုယ်တိုင် ဆင်းလာပြီး ပြည်နယ်အစိုးရအဖွဲ့နဲ့ သွားတွေ့တယ်။ အစိုးရအဖွဲ့က မြောက်ဦးမှာပဲ လုပ်ပါဆိုပြီး ထောက်ပံ့ငွေတွေပါပေးပြီး တရားဝင်ခွင့်ပြုလိုက်လို့ မြောက်ဦးမှာ ပထမဆုံးအကြိမ် အကျဥ်းရုံး ကျင်းပခဲ့ကြရတယ်။”လို့ပြောပါတယ်။

စိတ်သစ်၊ အတွေးသစ်တွေနဲ့ အဖျားရောဂါတွေ ကင်းဝေးပြီး ဘေးအန္တရာယ် မကျရောက်နိုင်စေဖို့နဲ့ မိသားစုတခုလုံး တရွာလုံး၊ တမျိုးသားလုံး ရှေးယခင် ဘိုးဘွားဘီဘင် လက်ထက်ကတည်းက အခုလိုမျိုး အစဥ်အလာမပျက် ကျင်းပရတာလို့ ခမီတိုင်းရင်းသားလူကြီးတဦးက ​ပြောပါတယ်။

မြောက်ဦးမြို့မှာကျင်းပတဲ့ ခမီ နှစ်သစ်ကူးပွဲ အခမ်းအနားမှာ ရခိုင်နဲ့ ခမီလူမျိုးစုတွေရဲ့ ရိုးရာအကတွေနဲ့ ဖြေဖျော်ခဲ့ကြပြီး ဌာနဆိုင်ရာတွေ အပါအဝင် လူဦးရေ ၂၀၀ ခန့်သာ တက်ရောက်ခဲ့ကြပါတယ်။

အရင်နှစ်တွေက ကျင်းပခဲ့ကြတဲ့ ခမီနှစ်သစ်ကူးနေ့မှာ ရခိုင်မျိုးနွယ်စုဝင်တွေ ဖြစ်ကြတဲ့ မရာမာကြီး၊ သက္ကမ၊ ဒိုင်းနက် စတဲ့ တိုင်းရင်းသားတွေအပြင် ချင်းတိုင်းရင်းသား စာပေနှင့် ယဥ်ကျေးမှုအဖွဲ့ပါ တက်ရောက်နိုင်ခဲ့ကာ စည်ကားစွာ ကျင်းပနိုင်ခဲ့ပြီး အခုနှစ်မှာတော့ လမ်းပန်းဆက်သွယ်ရေးနဲ့ လုံခြုံရေးအခြေအနေအရ တက်ရောက်နိုင်ခြင်းမရှိကြဘူးလို့ ဦးလေကျော်အောင်က ဆိုပါတယ်။

နတ်တော်လဆန်း ၁ ရက်မှာ ကျရောက်တဲ့ ခမီနှစ်သစ်ကူးနေ့ ပထမအကြိမ်နဲ့ ဒုတိယအကြိမ်ကို ဘူးသီးတောင်မြို့နယ် လောင်းချောင်းကျေးရွာမှာ ကျင်းပခဲ့ပြီး တတိယအကြိမ်ကို ပုဏ္ဏားကျွန်းမြို့နယ် ကျင်းပခဲ့ကြပါတယ်။

စတုတ္ထအကြိမ်ကို ကိုဗစ်ကာလကြောင့် ကျင်းပနိုင်ခြင်းမရှိခဲ့ဘဲ ပဥ္စမအကြိမ်မြောက်ကိုတော့ စစ်တွေမြို့မှာ ပြုလုပ်ခဲ့ပြီး အခုနှစ်မှာတော့ မြောက်ဦးမြို့မှာ ပထမဆုံးအကြိမ် ပြုလုပ်တာ ဖြစ်ပါတယ်။

ခမီလူမျိုးတွေဟာ ရခိုင်ပြည်နယ်အတွင်း မြောက်ဦးအပါအဝင် ကျောက်တော်၊ ပုဏ္ဏားကျွန်း၊ ပေါက်တောနဲ့ ဘူးသီးတောင်မြို့နယ်တွေမှာ နေထိုင်ကြပြီး တပြည်လုံးမှာ လူဦးရေ ၁ သိန်းကျော်ရှိတယ်လို့ သိရပါတယ်။