တရုတ်နိုင်ငံအတွင်းပိုင်း မွန်ဂိုလီးယားဒေသမှာ အကြီးစား ကျောက်မီးသွေးတွင်း ပြိုကျမှုကြောင့် လူ ၂ ဦးထက်မနည်း သေဆုံးပြီး ၆ ဦး ဒဏ်ရာရရှိကာ ၅၃ ဦးထက်မနည်း ပျောက်ဆုံးနေတယ်လို့ နိုင်ငံပိုင်မီဒီယာက ဖေဖော်ဝါရီ ၂၃ ရက်မှာ ထုတ်ပြန်ခဲ့ပါတယ်။
ရှင်းကျင်း ကျောက်မီးသွေးတူးဖော်ရေး ကုမ္ပဏီက လုပ်ဆောင်နေတဲ့ အလ်ရှာလိဂ်မြို့က ကျောက်မီးသွေးမိုင်းတွင်းရဲ့ တွင်းပေါက်ဝဟာ ဖေဖော်ဝါရီ ၂၂ ရက်က ပြိုကျခဲ့တာပါ။
တွင်းပြိုကျပြီးနောက် သမ္မတ ရှီကျင့်ဖျင်က ကယ်ဆယ်ရေးလုပ်ဆောင်ဖို့ အမိန့်ပေးခဲ့ပြီး ရွှံ့မြေပြိုကျမှုတွေကြောင့် ကယ်ဆယ်ရေးလုပ်ရာမှာ အနှောင့်အယှက် ဖြစ်ရပါတယ်။
ပျောက်ဆုံးနေသူတွေကို ကယ်ဆယ်ဖို့နဲ့ ဒဏ်ရာရသူတွေကို ကုသဖို့ တတ်နိုင်သမျှ အားထုတ်ရမယ်လို့ သမ္မတရှီက ပြောပါတယ်။
အာဏာပိုင်တွေဟာ ကယ်ဆယ်ရေးလုပ်ငန်းမှာ ပါဝင်ဖို့ မီးသတ်သမား ၂၃၀ ကျော်၊ မီးသတ်ကား ၄၁ စီးနဲ့ ကယ်ဆယ်ရေးခွေး ၆ ကောင်တို့ကို စေလွှတ်ခဲ့ပါတယ်။
ဖေဖော်ဝါရီ ၂၃ ရက်မှာ လူ ၂၀၀ လောက်ရှိမယ့် အဖွဲ့တွေ ထပ်ရောက်လာမယ်လို့ မျှော်လင့်ထားကြောင်း နိုင်ငံပိုင်မီဒီယာက ဆိုပါတယ်။
အတွင်းမွန်ဂိုလီးယားဒေသဟာ နိုင်ငံရဲ့ ထိပ်တန်းကျောက်မီးသွေးထုတ်လုပ်ရာ နေရာဖြစ်ပြီး ဒေသတွင်း ရောင်းလိုအား မြှင့်တင်ရေးနဲ့ ဈေးနှုန်းတည်ငြိမ်စေရေးတို့အတွက် အစိုးရရဲ့ တောင်းဆိုမှုအောက်မှာ တရုတ်နိုင်ငံရှိ တခြားဒေသတွေလိုပဲ အရင်နှစ်ကထက် ထုတ်လုပ်မှုကို မြှင့်တင်နေတာ ဖြစ်ပါတယ်။
