မွန်ပြည်နယ်လွှတ်တော် ဥက္ကဋ္ဌ ဒေါ်တင်အိရဲ့ သားဖြစ်သူ ကိုသဲဟိန်းကို စစ်ကောင်စီတပ်ဖွဲ့တွေက လာရောက် ဖမ်းဆီးသွားတယ်လို့ မိသားစုနဲ့ နီးစပ်သူတွေက ပြောပါတယ်။

ကိုသဲဟိန်းဟာ ပြည်သူ့ကာကွယ်ရေးတပ်ဖွဲ့ PDF တွေကို ငွေကြေးထောက်ပံ့တယ်ဆိုတဲ့ စွပ်စွဲချက်တွေနဲ့ စစ်ကောင်စီတပ်ဖွဲ့တွေက မေ ၁၁ ရက်က နေအိမ်မှာ လာရောက်ဖမ်းဆီးသွားတာ ဖြစ်ပါတယ်။

ရှေ့နေတဦးဖြစ်တဲ့ ကိုသဲဟိန်းကို စစ်ကောင်စီက သံဖြူဇရပ်မြို့နယ်ရှိ စစ်တပ်တခုရဲ့ စစ်ကြောရေးမှာ စစ်ဆေးမေးမြန်းနေပြီး အကြမ်းဖက်မှု တိုက်ဖျက်ရေး ဥပဒေတွေနဲ့ အမှုဖွင့်သွားဖို့ စီစဉ်နေတယ်လို့ စစ်ကောင်စီနဲ့ နီးစပ်သူတွေ အဆိုအရ သိရပါတယ်။

မွန်ပြည်နယ်လွှတ်တော် ဥက္ကဋ္ဌ ဒေါ်တင်အိဟာ ၂၀၁၅ ခုနှစ်ကနေ ၂၀၂၀ ခုနှစ်ထိ မွန်ပြည်နယ်လွှတ်တော်မှာ ဥက္ကဋ္ဌအဖြစ် တာဝန်ထမ်းခဲ့တာဖြစ်ပြီး လက်ရှိမှာတော့ သံဖြူဇရပ်မြို့ နေအိမ်မှာ နေထိုင်နေတာ ဖြစ်ပါတယ်။

ပြီးခဲ့တဲ့ ဇန်နဝါရီ ၃ ရက်က မွန်ပြည်နယ်ဝန်ကြီးချုပ် ဒေါက်တာအေးဇံရဲ့ ဇနီးဖြစ်သူ ဒေါ်ခင်အေးမူနဲ့ သားဖြစ်သူ ကိုနေဖြိုးဇံတို့ကိုလည်း စစ်ကောင်စီတပ်ဖွဲ့ဝင်တွေက သိမ်ဇရပ်မြို့၊ သုံးခွကျေးရွာ နေအိမ်မှာ လာရောက် ပစ်ခတ်ဖမ်းဆီးခဲ့ပြီး ဇန်နဝါရီ ၅ ရက်နေ့မှာ ပြန်လွှတ်ပေးခဲ့ပါတယ်။

မွန်ပြည်နယ်လွှတ်တော်အနီးနဲ့ မော်လမြိုင်မြို့အဝင် ၆ မိုင် စစ်ဆေးရေးဂိတ်မှာ  အောက်တိုဘာ ၁၃ ရက် မနေ့ ညပိုင်းက ဗုံးပေါက်ကွဲခဲ့တယ်လို့  ဒေသခံတွေက ဒီဗွီဘီကို ပြောပါတယ်။

မွန်ပြည်နယ်လွှတ်တော်အနီး ညောင်လေးပင်မှာ မနေ့ည  ည ၈ နာရီခွဲလောက်က  ဗုံးပေါက်ကွဲမှု ဖြစ်ပေါ်ခဲ့တာဖြစ်ပြီး ၊ ဗုံးပေါက်ကွဲကြောင့် ထိခိုက်ဒဏ်ရာရတာ မရှိပါဘူး။ 

မော်လမြိုင် ၆ မိုင် စစ်ဆေးရေးဂိတ်မှာလည်း မနေ့ ည ၆ နာရီလောက်က  ဗုံးပေါက်ကွဲခဲ့ပြီး  ထိခိုက်ဒဏ်ရာရတာ မရှိဘူးလို့ ဒေသခံတွေက ဆိုပါတယ်။

မော်လမြိုင် ၆ မိုင် စစ်ဆေးရေးဂိတ်ဟာ မြို့အတွင်း ဝင်ရောက် လာသူတွေကို အဓိက စစ်ဆေးနေတဲ့ ဂိတ်ဖြစ်ပြီး ပြည်သူတွေကို မောက်မာစွာ ဆက်ဆံနေတဲ့ စစ်ဆေးရေးဂိတ် တစ်ခုဖြစ်ပါတယ်။

အဲဒီစစ်ဆေးရေးဂိတ် ဗုံးဖောက်ခွဲမှုကို မွန်ပြည်နယ် နွေဦးတော်လှန်းရေးတပ်ဦး၊ မော်လမြိုင်ပြည်သူကာကွယ်ရေးအဖွဲ့နဲ့ မိတ်ဖက်အဖွဲ့အစည်းတွေ ပူးပေါင်းပြီး ဆောင်ရွက်ခဲ့တာ ဖြစ်တယ်လို့ ထုတ်ပြန်ပါတယ်။

မွန်ပြည်နယ် လွှတ်တော်အနီးဗုံးပေါက်ကွဲမှုကတော့  သူတို့ လုပ်ဆောင်တာ မဟုတ်ဘူးလို့ ပြည်သူ့ကာကွယ်ရေးတပ်ဖွဲ့တွေက ထုတ်ပြန်ထားပါတယ်။

စစ်ကောင်စီတပ်ဖွဲ့ဝင်ဟာဗုံးပေါက်ကွဲမှုတွေဖြစ်ပြီးနောက် မော်လမြိုင်မြို့ပေါ် ရပ်ကွက်တွေမှာ ပိတ်ဆို့ရှာဖွေ စစ်ဆေးတာတွေ လုပ်ဆောင်သလို ဒီကနေ့ အောက်တိုဘာ ၁၄ ရက်နေ့မှာတော့ လုံခြုံရေးတွေ တိုးမြှင့်ချထားတယ်လို့ ဒေသခံတွေ ပြောပါတယ်။