မွန်ပြည်သစ်ပါတီ၊ ထိန်းချုပ်နယ်မြေ ရေးချောင်းဖျားဒေသ မွန်အမျိုးသားပညာရေးဗဟိုဌာန ညီစားစခန်းမှာဖွင့်လှစ်ထားတဲ့ မွန်အမျိုးသားကောလိပ် (Mon National College)က  ၂၀၂၃-၂၄ ပညာသင်နှစ်အတွက် သင်တန်းသားသစ်တွေ ခေါ်ယူနေပါတယ်။

သင်တန်းလျှောက်လွှာတွေကို မွန်အမျိုးသားပညာရေးဌာနတွေနဲ့ မွန်ပြည်သစ်ပါတီ ဆက်ဆံရေးရုံးတွေမှာ သွားရောက်ထုတ်ယူနိုင်ပြီး မွန်အမျိုးသားကောလိပ်ရဲ့ အင်တာနက် စာမျက်နှာမှာလည်း ဒေါင်းလုပ်ပြုလုပ်ကာ မေ ၁၅ ရက် နောက်ဆုံးထား လျှောက်ထားနိုင်ကြောင်း သိရပါတယ်။

ပြီးခဲ့တဲ့ ပညာသင်နှစ်မှာ Social Science၊ Mass Media and Journalism၊ Leadership and Management၊ Education Teaching၊ Education Management၊ Mon Literature စတဲ့ဘာသာရပ် ၆ ခုကို သင်ကြားခဲ့ပြီး အခုနှစ်မှာ Nursing ဘာသာရပ်ကိုပါ ထည့်သွင်းသင်ကြားမယ်လို့ သိရပါတယ်။

ပြီးခဲ့တဲ့ ပညာသင်နှစ်အတွက် ကျောင်းဝင်ကြေး ပထမနှစ် ကျပ် ၁၀ သိန်း၊ ဒုတိယနှစ် ၁၂ သိန်း သတ်မှတ်ထားပေမဲ့ အခုနှစ်မှာ ကုန်စျေးနှုန်းအခြေအနေကြောင့် ပထမနှစ် ၁၅ သိန်း၊ ဒုတိယနှစ် ၂၃ သိန်း ပြောင်းလဲသတ်မှတ်ခဲ့တယ်လို့ သိရပါတယ်။

ကျောင်းကတာဝန်ရှိသူက “Language တခုကို Focus လုပ်ထားတယ်။ အင်္ဂလိပ်စာနဲ့ ကွန်ပျူတာ အဓိကပေါ့၊ သင်တန်းကြေးကလည်း တခါတည်း သွင်းစရာမလိုဘူး။ တတ်နိုင်သလောက် ခွဲသွင်းလို့ ရပါတယ်” လို့ ပြောပါတယ်။

လျှောက်ထားသူတွေဟာ ဝင်ခွင့်စာမေးပွဲ ဖြေဆိုရမှာဖြစ်ပြီး တတ်ရောက်ခွင့်ရသူတွေဟာ ကောလိပ်မှာ ၃ နှစ် ပညာသင်ကြားရပြီး ၂ နှစ် ပြန်လည်တာဝန်ထမ်းဆောင်ရမယ်လို့ သိရပါတယ်။

အခုနှစ်သင်တန်းကို ၂၀၂၃ ခုနှစ် ဇွန်လမှာ စတင်ဖွင့်လှစ်မှာဖြစ်ပြီး မွန်အမျိုးသားကျောင်းအသီးသီးမှ ၁၀ တန်းအောင်မြင်ပြီး ကျောင်းသား၊ ကျောင်းသူတွေကို နိုင်ငံခြားတက္ကသိုလ်တွေဆီ သွားရောက် ပညာသင်ကြားဖို့ ရည်ရွယ်ထားတယ်လို့ သိရပါတယ်။

ပထမဦးဆုံးသော မွန်အမျိုးသားကောလိပ်ကို လာမယ့် ဇွန်လအတွင်း စတင် ဖွင့်လှစ်တော့မယ်လို့ မွန်အမျိုးသားပညာရေး ကော်မတီ MNEC  တာဝန်ရှိသူတွေက  ပြောပါတယ်။

မွန်အမျိုးသားကောလိပ် ဖွင့်လှစ်ဖို့အတွက် ပြီးခဲ့တဲ့ မေလ တတိယအပတ်က အွန်လိုင်းကနေ ဝင်ခွင့်လျှောက်လွှာခေါ်ယူခဲ့ပြီး လျှောက်ထားသူ ၃၀၀ ကျော်ကို မွန်ပြည်သစ်ပါတီ ထိန်းချုပ်နယ်မြေ မွန်ပညာရေးဌာန ဗဟို(ညီစား)နဲ့ မြို့နယ်ဆက်ဆံရေးမှူးတွေမှာ အရည်အချင်း စစ်ဆေးခဲ့တာပါ။

ဒါပေမဲ့ နေရာအခက်အခဲကြောင့် မွန်အမျိုးသားကောလိပ် ပထမနှစ်သင်တန်းကို ကျောင်းသူ၊ကျောင်းသား ၁၀၀ လောက်နဲ့ စတင်ဖွင့်လှစ်သွားဖို့ ပြင်ဆင်ထားတယ်လို့ မွန်အမျိုးသားပညာရေး ကော်မတီ MNEC ပရိုဂမ် မန်နေဂျာ မင်းအောင်ဇေက ပြောပါတယ်။

မွန်အမျိုးသားကောလိပ်မှာ ခေါင်းဆောင်မှုစွမ်းရည်မြှင့်တင်မှုနဲ့ စီမံခန့်ခွဲမှုဘာသာရပ်၊ ဆရာ့အတတ်သင်ဘာသာရပ်၊ သတင်းမီဒီယာဘာသာရပ်၊ မွန်ဘာသာရပ်တို့ကို သင်ကြားပေးဖို့ စီစဉ်ထားပါတယ်။

ဒါ့အပြင် မဖြစ်မနေသင်ယူရမယ့် ဘာသာရပ်တွေမှာတော့ မွန်ယဉ်ကျေးမှုဆိုင်ရာဘာသာရပ်၊ အင်္ဂလိပ်စာ၊ ကွန်ပျူတာ၊ မွန်သမိုင်း၊ ကမ္ဘာ့လူမှုရေးဘာသာရပ်၊ လူ့အခွင့်အရေးဆိုင်ရာဘာသာရပ်၊ သဘာဝပတ်ဝန်းကျင်ဆိုင်ရာဘာသာရပ်၊ သုတေသနပြုဘာသာရပ်နဲ့ ယုတ္တိဗေဒဘာသာရပ်တို့ ပါဝင်ပါတယ်။

မွန်အမျိုးသားကောလိပ်ဟာ မွန်လူမျိုးတွေ အင်္ဂလိပ်စာ ကောင်းမွန်လာစေရေး၊ နိုင်ငံတကာမှာ ပညာသင်ယူနိုင်ရေး၊မွန်စာပေပညာရှင်တွေ ပေါ်ထွန်းရေးနဲ့ စာသင်ကြားမယ့် ကျောင်းဆရာ၊ဆရာမတွေစတဲ့ လူ့စွမ်းအားအရင်းမြစ်ကောင်းတွေကို မွေးထုတ်ပေးနိုင်ဖို့ ရည်ရွယ်တယ်လို့ ဆိုပါတယ်။

မွန်အမျိုးသားကောလိပ်မှာတော့ ပထမနှစ်၊ ဒုတိယနှစ်၊ တတိယနှစ်ဆိုပြီး သုံးနှစ်တာ ပညာသင်ကြားရမှာဖြစ်ပြီး သင်တန်းပြီးနောက် လုပ်ငန်းအတွေ့အကြုံရဖို့အတွက် ၂ နှစ် ပြန်လည် တာဝန်ထမ်းဆောင်ပေးရမှာ ဖြစ်ပါတယ်။

မွန်အမျိုးသားပညာရေးကော်မတီ (MNEC)မှာ မွန်အမျိုးသားကောလိပ်အပြင် မွန်အမျိုးသားစာသင်ကျောင်းပေါင်း ၁၄၀ ကျော်ရှိနေတာ ဖြစ်ပြီး ကျောင်းသား၊ကျောင်းသူပေါင်း ၂၀၀၀၀ နီးပါး တက်ရောက်သင်ကြားနေပါတယ်။