ကိုရီးယား ၂ နိုင်ငံကြား ပူးပေါင်းဆောင်ရွက်ရေးဟာ လာမယ့် ရွေးကောက်ခံ သမ္မတသစ်ရဲ့ အစိုးရ အပေါ်မူတည်မှာဖြစ်လို့ ဆက်လက်ပူးပေါင်းဆောင်ရွက်သွားဖို့ တောင်ကိုရီးယား သမ္မတ မွန်းဂျေအင်းက မြောက်ကိုရီးယား ခေါင်းဆောင်ကို ဧပြီ ၂၂ ရက်မှာ တိုက်တွန်းလိုက်ပါတယ်။

သမ္မတမွန်းဟာ  သူ့ရဲ့ သမ္မတအဖြစ် နောက်ဆုံးရေးတဲ့ စာအနေနဲ့ မြောက်ကိုရီးယား ခေါင်းဆောင်ဆီ စာတစောင် ပေးပို့ခဲ့ရာမှာ ထိပ်တိုက်တွေ့တဲ့ခေတ်ကို ဆွေးနွေးပွဲတွေက တဆင့် ကျော်လွှားသင့်ပြီလို့ ဖော်ပြထားပါတယ်။

မြောက်ကိုရီးယားနဲ့ အမေရိကန်အစိုးရတွေကြား နျူကလီးယားလက်နက် ဖြုတ်သိမ်းရေး ဆွေးနွေးပွဲ အမြန်ပြန်စဖို့ မျှော်လင့်ကြောင်းလည်း မွန်းက စာထဲမှာ ဖော်ပြထားတယ်လို့ သမ္မတ ပြောခွင့်ရ ပတ်ခ်ကယွန်းမီက သတင်းစာရှင်းလင်းပွဲမှာ ပြောပါတယ်။

၂၀၁၉ မှာ မြောက်ကိုရီးယား အမေရိကန် ထိပ်သီးညီလာခံ မအောင်မြင်ခဲ့ပြီးတည်းက နယ်စပ်ဖြတ်ကျော် ဆက်ဆံရေး မချောမွေ့ချိန်မှာ စာတွေ ဖလှယ်ခဲ့ကြတာပါ။

အရင်လက မြောက်ကိုရီးယားအစိုးရက တိုက်ချင်းပစ် ပဲ့ထိန်းဒုံးကျည် ပစ်လွှတ်ခဲ့အပြီး တင်းမာမှု မြင့်တက်ခဲ့ပါတယ်။

မြောက်ကိုရီးယားဆိုင်ရာ အမေရိကန်သံတမန်က ဒီသီတင်းပတ်ထဲမှာ တောင်ကိုရီးယားမြို့တော် ဆိုးလ်မှာ တောင်ကိုရီးယားအရာရှိတွေနဲ့ ဆွေးနွေးနေတာပါ။

သူဟာ ကြိုတင်ကန့်သတ်ချက်မရှိဘဲ မြောက်ကိုရီးယားနဲ့အတူ ထိုင်ပြီး ဆွေးနွေးဖို့ လမ်းဖွင့်ထားတယ်လို့ ပြောပါတယ်။