ထိုင်းနိုင်ငံ၊ ပရာကျွတ်ခီရီကန်ခရိုင်မှာ ဖေဖော်ဝါရီ ၆ ရက်က ထိုင်းရိုးရာလက်ဝှေ့နေ့အထိမ်းအမှတ် အခမ်းအနားတရပ်မှာ မွေထိုင်းလက်ဝှေ့သမား အယောက် ၃,၆၆၀ လာရောက်စုဝေးခဲ့ပါတယ်။

အဲဒီနောက် မွေထိုင်း သရုပ်ပြကစားမီ ဆရာတွေ၊ မိဘတွေ၊ ဘိုးဘေးတွေကို ရိုသေလေးစားကြောင်းပြသတဲ့ ဝိုင်ခရူလို့ခေါ်တဲ့ အကကို စုရုံးကခုန်ရင်း ဂင်းနစ်ကမ္ဘာ့စံချိန်သစ် တင်ခဲ့ပါတယ်။

ဒီလူစုလူဝေးလိုက် စွမ်းဆောင်ခဲ့ကြတဲ့ လက်ဝှေ့သမားတွေကို ထိုင်းမွေထိုင်းချန်ပီယံ ဆုံမ်ဘတ် ဘန်ချာမက်ခ်က ဦးဆောင်ခဲ့ပါတယ်။

ဝိုင်ခရူ ကန်တော့ပွဲအတွက် အရင်စံချိန်က လူအယောက် ၂၅၀ ဖြစ်တယ်လို့ ဂင်းနစ် အကဲဖြတ်လူကြီး ကာဇာယိုရှိ ခိရိမူရက ပြောပါတယ်။

မွေထိုင်း လက်ဝှေ့သမားတွေဟာ ပြိုင်ဘက်ကို လက်သီး၊ တံတောင်၊ ဒူး၊ ခြေထောက်တွေနဲ့ တိုက်ခိုက်ဖို့ ခွင့်ပြုထားလို့ ခြေလက်အင်္ဂါ ရှစ်ချက်ပါတဲ့ အနုပညာလို့လည်း မွေထိုင်း ကိုယ်ခံပညာကို လူသိများပါတယ်။

ထိုင်းနိုင်ငံမှာ ဖေဖော်ဝါရီ ၆ ရက်ဟာ မွေထိုင်းနေ့ဖြစ်ပြီး ကျားမင်းလို့ အဓိပ္ပာယ်ရတဲ့ ဖရာ့ချောင်ဆူအာလို့ သိကြတဲ့ အဋ္ဌမမြောက်ဘုရင်ကို ဂုဏ်ပြုတဲ့အနေနဲ့ သူနန်းတက်တဲ့ ၁၇၀၂ ခုနှစ် ဖေဖော်ဝါရီ ၆ ရက်ကိုယူပြီး အမှတ်တရ ကျင်းပတာလည်း ဖြစ်ပါတယ်။