စစ်ကိုင်းတိုင်း၊ ခင်ဦးမြို့နယ်မှာ ဧပြီ ၃ ရက်က ရွှေဘို-မြစ်ကြီးနား လမ်းပေါ်မှာ အမြန်ယာဥ်မှန်လုံကားပေါ်ကနေ စစ်ကောင်စီ ရဲတပ်ဖွဲ့ဝတ်စုံနဲ့ ပစ္စည်းတွေကို ရှာဖွေစစ်ဆေးတွေ့ရှိခဲ့တယ်လို့ မြို့နယ်ပကဖ တာဝန်ရှိသူတဦးက ဒီဗွီဘီကို ပြောပါတယ်။

မြို့နယ်ပြည်သူ့ကာကွယ်ရေးတပ်ဖွဲ့က သတင်းအရ ကြိုတင်စောင့်ဆိုင်း ရှာဖွေစစ်ဆေးရာ ရွှေဘို-မြစ်ကြီးနား လမ်းပေါ်မှာ မုံရွာကနေ မြစ်ကြီးနားကိုသွားမယ့် ရွှေကချင် မှန်လုံအမြန်ကားရဲ့ အောက်ခန်းအတွင်း သိုဝှက်သည်ဆောင်လာတဲ့ စစ်ကောင်စီလက်အောက်ခံ ရဲတပ်ဖွဲ့ရဲ့ ဝတ်စုံ အသုံးအဆောင်ပစ္စည်းနဲ့ ဆက်သွယ်ရေး စက်ပစ္စည်းတချို့ သိမ်းဆည်းရမိခဲ့တယ်လို့ ဆိုပါတယ်။

ကားသမားနဲ့ ခရီးသည်တွေရှေ့မှာ ရှာဖွေဖော်ထုတ်ခဲ့ပြီး နောက်နောင် ကားသမားတွေအနေနဲ့ စကစနဲ့ပတ်သက်တဲ့ ပစ္စည်းတွေ မသယ်ယူဖို့ သတိပေး တားမြစ် ခံဝန်ထိုးခိုင်းပြီး ပြန်လွှတ်ပေးခဲ့ကာ သိမ်းဆည်းရမိပစ္စည်းတွေကိုတော့ အသေးစိတ် မထုတ်ပြန်သေးဘူးလို့ ဒေသကာကွယ်ရေးတပ်ဖွဲ့ဝင်တဦးက ပြောပါတယ်။

မတ်လ ၃၁ ရက်ကလည်း ရွှေဘို-မြစ်ကြီးနား ကားလမ်းပေါ်မှာ မြို့နယ် ပြည်သူ့အုပ်ချုပ်ရေးအဖွဲ့ လမ်းညွှန်ချက်နဲ့ ကြိုတင်သတင်းအရ စကစထုတ် ဘီယာတွေကို သိမ်းဆည်းရမိ ဖျက်ဆီးခဲ့ပြီး စကစနဲ့ပတ်သက်တဲ့ ထုတ်ကုန်တွေကို မသယ်ဆောင်ဖို့ ခံဝန်ထိုးခိုင်းကာ ကားသမားတွေကို ပြန်လွှတ်ပေးခဲ့တာတွေရှိပြီး မြို့နယ်ပြည်သူ့အုပ်ချုပ်ရေးအဖွဲ့က စစ်ကောင်စီထုတ်ကုန်တွေကို သယ်ယူဖြန့်ဖြူးရောင်းချတာတွေ မပြုလုပ်ကြဖို့ သတိပေးချက် ထုတ်ပြန်ထားပါတယ်။

ရှမ်းမြောက်ပိုင်း၊ သီပေါမြို့နယ်၊ နမ့်လန်မြို့၊ နမ့်လန်- သီပေါလမ်းမ၊ ကောင်းဟက်ကျေးရွာအနီးရှိ ချောက်ထဲကို  ခရီးသည်တင် မှန်လုံကားတစ်စီး  ဧပြီ ၂ရက် ညနေပိုင်းက ပြုတ်ကျခဲ့တာကြောင့် ယာဉ်ပေါ်ပါလာသူ ၄ ဦးသေဆုံးခဲ့တယ်လို့ မြို့ခံ ပရဟိတအသင်းက ပြောပါတယ်။

အဲ့ဒီနေ့က သီပေါဘက်က လာတဲ့ မှန်လုံကားဟာ လူ ၄ ဦးလိုက်ပါလာတာဖြစ်ပြီး ကုန်းအဆင်းမှာ အရှိန်မထိန်းနိုင်ဘဲ ချောက်ထဲ ထိုးကျခဲ့တာကြောင့် ယာဉ်မောင်း ၁ ဦး၊ ယာဉ်နောက်လိုက် ၁ ဦး၊ ခရီးသည် ၂ ဦး စုစုပေါင်း ၄ ဦး ပွဲချင်းပြီး သေဆုံးသွားတာပါ။

မြို့ခံ ပရဟိတအသင်းဝင်တယောက်က "ကားက သီပေါက လာတာ၊ ခရီးသည်တင်ကားပါ၊ ကောင်းဟက်ရွာနားက ချောက်ထဲကျတာ၊ အဆင်းလမ်းမှာ ကွေ့လို ‌ဖြစ်နေတော့ အရှိန်နဲ့ကျတာ၊ ကားကတော့ ရှေ့ဘက် ပွင့်ကျသွားတယ်။ တစ်ဦးကတော့ အပြင်ရောက်မှ DB ဖြစ်သွားပုံရပါတယ်၊ လည်ပင်းကျိုးက နှစ်ယောက်ရှိတယ်" လို့ ပြောပါတယ်။

ယာဉ်တိမ်းမှောက်မှုကြောင့် မှန်လုံးကားရဲ့ ရှေ့ခေါင်းခြမ်းပွင့်ထွက်သွားပြီး ယာဉ်‌မောင်းနဲ့ ခရီးသည် ၁ ဦးမှာ လည်ပင်းကျိုး ဒဏ်ရာ၊ တစ်ဦးမှာ ဦးခေါင်းကွဲအက်ဒဏ်ရာနဲ့ ယာဉ်နောက်လိုက်မှာ ရေမြောင်းထဲ ပြုတ်ကျပြီး ရေနစ်မွန်းဒဏ်ရာတွေနဲ့ သေဆုံးသွားတယ်လို့ သိရပါတယ်။

သေဆုံးသူတွေကို နမ့်လန်ဆေးရုံပို့ဆောင်ထားကာ ပြီးခဲ့တဲ့ မတ်လ ၂၃ ရက်ကလည်း နမ့်လန်- ကျောက်ဂူလမ်းမပေါ်မှာ ထော်လာဂျီယာဉ်တိမ်းမှောက်လို့ ယာဉ်မောင်းသေဆုံးခဲ့ပါတယ်။

စစ်ကိုင်းတိုင်းဒေသကြီး၊ ဆားလင်းကြီးမြို့နယ်၊ ရေကာချောင်းမြောက်ဘက် မုံရွာ-ပုသိမ်လမ်းမကြီးပေါ်မှာ စစ်ကောင်စီတပ်သားတွေ လိုက်ပါလာတဲ့ မှန်လုံကားတစီး မိုင်းဆွဲတိုက်ခံခဲ့ရတယ်လို့ သိရပါတယ်။

ဆားလင်းကြီးမြို့ကနေထွက်လာတဲ့ စစ်ကောင်စီတပ်သားတွေတင်ဆောင်လာတဲ့ Express မှန်လုံကားကို ပဒေသာမိုင်း ၃၅ လုံးနဲ့ တိုက်ခိုက်ခဲ့တာဖြစ်ပြီး ၃၀ ထက်မနည်း သေဆုံးကာ အများအပြား ဒဏ်ရာရခဲ့တယ်လို့ မုံရွာဗန္ဓုလအဖွဲ့က ထုတ်ပြန်ထားပါတယ်။

“စစ်ကောင်စီတပ်သားတွေတင်လာတဲ့ Express ကားတစ်စီး ဆားလင်းကြီးမြို့ကနေ မြောက်ဘက်ကို ပုသိမ်-မုံရွာလမ်းအတိုင်းထွက်လာတာ။ ကျနော်တို့ ပွိုင့်တွေနားအရောက်မှာ ပဒသောမိုင်းဆွဲ တိုက်ခိုက်လိုက်တာ Express ကားကိုထိတယ်။ အဲ့ဒီကားပေါ်ကနေ ၆ ယောက်လောက်ပဲ အောက်ကိုဆင်းလာနိုင်တယ်၊ ကားကလည်း မှန်တွေကွဲပြီး စုတ်ပြတ်သွားတယ်။ နောက်တော့ Expressကားကို ဆားလင်းကြီးကနေ ကားအသေးလေးနဲ့လာပြီး ဆားလင်းကြီး စခန်းကို ပြန်ဆွဲသွားတာမြင်တယ်" လို့ မုံရွာဗန္ဓုလအဖွဲ့ဝင်တဦးက ဒီဗွီဘီကိုပြောပါတယ်။

Express ကားကို မုံရွာ ဗန္ဓုလအဖွဲ့သားများ LDF၊ Monywa Lightning PDF၊ Monywa Peregrine PDF နဲ့ One Star Test Force တို့ ပူးပေါင်းပြီး  မိုင်းဆွဲတိုက်ခိုက်ခဲ့တာလို့ ဆိုပါတယ်။

မှန်လုံကား မိုင်းဆွဲတိုက်ခိုက်ခံရတာနဲ့ ပတ်သက်ပြီး စစ်ကောင်စီဘက်ကတော့ သတင်းထုတ်ပြန်တာ မတွေ့ရသေးပါဘူး။