ဧရာဝတီတိုင်း၊ ရေကြည်မြို့နယ်၊ ငါးသိုင်းချောင်းမြို့မှာ ဧပြီလ ၂၇ ရက် မနက်ပိုင်းက မှုခင်းသတင်းထောက်တယောက် သေနတ်နဲ့ပစ်သတ်ခံခဲ့ရတယ်လို့ ဒေသခံတွေထံက သိရပါတယ်။
မရင်းကူးကျေးရွာမှာနေထိုင်တဲ့ မှုခင်းသတင်းထောက် ဦးတင်သန်းဟာ မနက် ၇ နာရီလောက်မှာ သေနတ်နဲ့ ၂ ချက်အပစ်ခံရပြီး သေဆုံးခဲ့တာဖြစ်တယ်လို့ ဒေသခံတွေကပြောပါတယ်။
“သူက အမှုပွဲစားလည်းလုပ်တယ်၊ မှုခင်းသတင်းထောက်လို့လည်းပြောတယ်၊ တွေ့တာတော့ စစ်တပ်နဲ့ရော ရဲနဲ့ရော အမြဲတွေ့ရတယ်၊ သူ့ကြောင့် အဖမ်းခံရတာလည်းရှိတော့ အဲ့တာကြောင့် အရှင်းခံရတာဖြစ်နိုင်တယ်”လို့ ဒေသခံတစ်ဦးက ပြောပါတယ်။
မှုခင်းသတင်းထောက် ဦးတင်သန်းကို အမည်မသိလက်နက်ကိုင်အဖွဲ့က သူနေထိုင်ရာ နေအိမ်မှာ လာရောက်ပစ်ခတ်သွားတာဖြစ်ပြီး ရင်ဘတ်ကိုထိကာ သေဆုံးခဲ့တာလို့ ဆိုပါတယ်။
ဒေသခံအများစုကတော့ မှုခင်းသတင်းထောက် ဦးတင်သန်းဆိုသူဟာ အမှုပွဲစား လုပ်သလို စစ်ကောင်စီတပ်သားတွေနဲ့ပေါင်းပြီး မကျေနပ်တဲ့သူတွေကို ခေါ်ဖမ်းခိုင်းတာမျိုးတွေရှိ တာကြောင့် ကျေးရွာနေပြည်သူတွေက သူ့ကိုကြောက်လန့်နေရတာမျိုး ရှိတယ်လို့ ဆိုပါတယ်။
မှုခင်းသတင်းထောက် ဦးတင်သန်းကို ပစ်ခတ်ရှင်းလင်းတာနဲ့ ပတ်သက်ပြီး ဘယ်အဖွဲ့အစည်းက လုပ်တယ်ဆိုတာ မသိရသေးသလို ပုသိမ်ခရိုင်အတွင်းက တော်လှန် ရေးအင်အားစုတွေဘက်ကလည်း သတင်းထုတ်ပြန်တာ မရှိသေးပါဘူး။
ရန်ကုန်တိုင်း၊ လှည်းကူးမြို့နယ်၊ ငြိမ်းချမ်းရေးရပ်ကွက်မှာ စက်တင်ဘာ ၄ ရက် နေ့လယ်ပိုင်းက မှုခင်းသတင်းထောက် တယောက်ရဲ့ နေအိမ် ဓားပြတိုက်ခံရတယ်လို့ ဒေသခံတွေဆီက သိရပါတယ်။
လှည်းကူးမြို့နယ်၊ ငြိမ်းချမ်းရေးရပ်ကွက် အောင်မင်္ဂလာ ၂ လမ်းရှိ နေအိမ်တအိမ်ကို မနေ့နေ့လယ် သုံးနာရီဝန်းကျင်က အမည်မသိ အမျိုးသား လေးယောက်က သေနတ်တွေကိုင်ဆောင် ဓားပြတိုက်ခဲ့တာဖြစ်တယ်လို့ ရပ်ကွက်နေသူတယောက်က ဒီဗွီဘီကို ပြောပါတယ်။
"ဓားပြတိုက်ခံရတဲ့အိမ်က မှုခင်းသတင်းထောက်အိမ်။ ပြောရရင် Informer (သတင်းပေး) အိမ်။ သူမရှိတုန်း သူမိန်းမနဲ့ ကလေးတွေပဲရှိနေတဲ့အချိန် ဓားပြတိုက်သွားတာ ရွှေငွေလက်ဝတ်လက်စား သိန်းသုံးရာဖိုးလောက် ပါသွားတယ်လို့ ကြားတယ်။”
အဆိုပါနေအိမ်မှာ အမျိုးသမီးတယောက်နဲ့ ကလေးငယ်တွေပဲရှိနေတဲ့အချိန် သေနတ်သမားတွေက ရွှေငွေလက်ဝတ်စားတွေကို ယူဆောင်သွားတာဖြစ်တယ်လို့ အုပ်ချုပ်ရေးနဲ့ နီးစပ်သူက ပြောပါတယ်။
"သေနတ်နဲ့ပစ်တာလည်းမဟုတ်၊ သေနတ်ဖောက်သံလည်း မကြားတော့ ဓားပြတိုက်မှန်းမသိဘူး။ နောက်မှသိတာ သိန်းသုံးရာဖိုးလောက်ပါသွားတယ်ဆိုတာ ကာယကံရှင်ကပြောတာပါ။”
လတ်တလောမှာ စစ်ကောင်စီတပ်တွေနဲ့ ရဲတွေက လှည်းကူးတာဆုံနဲ့ ငြိမ်းချမ်းရေးရပ်ကွက်ရှိ လမ်းဆုံတွေမှာ စစ်ဆေးနေတယ်လို့ မြို့ခံတွေဆီက သိရပါတယ်။
လှည်းကူးမြို့နယ်မှာ ပြီးခဲ့တဲ့လတွေက သတင်းပေးတွေကြောင့် နိုင်ငံရေး တက်ကြွလှုပ်ရှားသူတွေနဲ့ CDM ဝန်ထမ်းတချို့ ဖမ်းဆီးထိန်းသိမ်းခံခဲ့ရပါတယ်။
