ရန်ကုန်တိုင်း၊ မှော်ဘီမြို့နယ်၊ ကုလားကုန်းကျေးရွာရှိ  မြွေဆိပ်ဖြေဆေးထုတ်လုပ်ရေးဌာနခွဲမှာ မတ်လ ၂၇ ရက်  ဒီနေ့ မနက်က ဗုံးနှစ်လုံးဆင့်ကာ ပေါက်ကွဲခဲ့တယ်လို့ ဒေသခံတွေဆီက သိရပါတယ်။

မြွေဆိပ်ဖြေဆေးထုတ်လုပ်ရေးဌာနခွဲ မြင်းမွေးမြူရေးခြံ၊ အနောက်ဘက်ရှိ မြောင်းတကာနဲ့ ကြက်ဖြူကန်ကို လျှပ်စစ်ဓာတ်အားပေးနေတဲ့ လျှပ်စစ်ဓာတ်အားပေးတာဝါတိုင်မှာ ဗုံးပေါက်ခဲ့တာလို့ ဒေသခံတစ်ဦးက ​ပြောပါတယ်။

"ဗုံးက နှစ်လုံးဆင့်ပေါက်တာ စစ်တပ်က ဗုံးပေါက်ပြီးမှ ရောက်လာတာ တာဝါတိုင်က ပြိုကျသွားတယ် စစ်တပ် ရောရ်လာပြီး အဲ့နားမှာ ဗုံးလေးလုံးထပ်တွေ့သေးတယ်" လို့ပြောပါတယ်။

ဗုံးပေါက်ပြီးနောက် စစ်ကောင်စီတပ်တွေ ရောက်လာပြီးရှာဖွေခဲ့ရာ မပေါက်သေးတဲ့ လက်လုပ်ဗုံး ၄ လုံးကို တွေ့ရှိခဲ့တယ်လို့ ရပ်မိရပ်ဖတစ်ဦးက ပြောပါတယ်။

"ဗုံးပေါက်တာ ၆ နာရီ အဲ့မှာရှိတဲ့သူတွေက စစ်တပ်ကိုလှမ်းခေါ်တော့ ရွာသားတွေလည်း သွားမကြည့်ရဲဘူးသေတာ ဒဏ်ရာရတာ ဘယ်သူမှမသိဘူး"လို့ ပြောပါတယ်။

လတ်တလောမှာ စစ်ကောင်စီတပ်တွေဟာ မှော်ဘီ-မြောင်းတကာ ကားလမ်းမတလျှောက် စစ်ဆေးနေတဲ့အပြင် ကုလားကုန်းကျေးရွာမှာလည်း စစ်ဆေးနေတယ်လို့ ဒေသခံတွေဆီက သိရပါတယ်။ 

ရန်ကုန်တိုင်း၊ မှော်ဘီ စစ်တပ်အုပ်ချုပ်မှုသင်တန်းကျောင်းမှာ မတ်လ ၂၀ ရက် ဒီနေ့ မနက်ပိုင်းက စတင်ပြီး စစ်ကောင်စီတပ်သားတွေနဲ့ ဇနီး သားသမီးတွေကို ယဥ်ကျေးလိမ္မာသင်တန်းပေးနေတယ်လို့  စစ်တပ်နဲ့နီးစပ်သူတွေဆီက သိရပါတယ်။

အာဏာသိမ်းစစ်ခေါင်းဆောင်က မိန့်ခွန်းတွေမှာ စစ်သားများ အရက်သေစာသောက်စားတာတွေ၊ မိုက်ရိုင်းဆဲဆိုတာတွေမလုပ်ဖို့ ယဥ်ကျေးလိမ္မာဖို့ ပြောခဲ့ပြီးနောက် တိုင်းစစ်ဌာနချုပ်များတွင် ယဥ်ကျေးလိမ္မာသင်တန်းဖွင့်တာဖြစ်တယ်လို့ စစ်မှုထမ်းဟောင်းတစ်ဦးက ဒီဗွီဘီကိုပြောပါတယ်။

“စစ်တပ်က လူတွေကို ၃၈ ဖြာမင်္ဂလာတရား သွားသင်နေလည်း အပိုပဲ။ တချို့ဆို မတက်ချင် တက်ချင်နဲ့ တက်ရတာ။ ဒီနေ့မနက် သင်တန်းလုပ်နေရင်းတောင် မူးပြီးဆဲတဲ့ တပ်ကြပ်တစ်ဦးကို အချုပ်ချထားရတယ်။ တိုက်မယ် ခိုက်မယ်ဆိုပြီး တပ်ထဲဝင်လာတဲ့သူတွေကို ဘုရား တရား လုပ်ခိုင်းတယ်ဆိုတော့ အဆင်မပြေဘူး”လို့ ပြောပါတယ်။

မှော်ဘီ တပ်မတော်အုပ်ချုပ်မှုသင်တန်းကျောင်းမှာ မတ်လ ၂၀ ရက်မှ ၃၁ ရက်အထိ ၁၀ ရက်တာ ယဥ်ကျေးလိမ္မာသင်တန်းကို စစ်တပ်မှ ကလေးငယ်များနဲ့အတူ အရာခံဗိုလ်မှ စတင်ကာ တပ်သားအထိ တက်ရတယ်လို့ စစ်တပ်နဲ့နီးစပ်သူတစ်ဦးက ဒီဗွီဘီကို ပြောပါတယ်။

“ခမရ ရော ခလရ ရောတက်ရတယ် အရာခံဗိုလ်ကစပြီး တပ်သားအဆင့်အထိ တက်ရတယ်။ ကလေးတွေနဲ့အတူပေါ့ မင်းအောင်လှိုင်က အရိပ်အမြွက်လောက်ပဲ ပြောတာ။ မျက်နှာလိုချင်တော့ တိုင်းမှူးတွေက သူ့စကားအတိုင်းလုပ်တာ” လို့ ပြောပါတယ်။

အဆိုပါယဥ်ကျေးလိမ္မာသင်တန်းကို ဓမ္မဂုဏ်ရည်ဆရာတော်က ဦးဆောင်ဟောပြောပြီး အုပ်ချုပ်မှုသင်တန်းကျောင်းများမှ အရာရှိကြီးတွေကလည်း သင်ပေးတာတွေရှိတယ်လို့ သိရပါတယ်။

ဒီနှစ် ဇန်နဝါရီလပိုင်းကလည်း အာဏာသိမ်းစစ်ခေါင်းဆောင် ပဲခူတိုင်းကို ရောက်လာပြီး မိန့်ခွန်းပြောခဲ့ရာ တောင်ပိုင်းတိုင်းစစ်ဌာနချုပ်ရှိ တပ်ရင်းတပ်ဖွဲ့များ အားလုံး ယဥ်ကျေးလိမ္မာသင်တန်း တက်ခဲ့ပါတယ်။