စစ်ကိုင်းတိုင်း ယင်းမာပင်ခရိုင် ယင်းမာပင်မြို့နယ်မှာ ဧပြီ  ၂၁ ရက် နေ့လယ်  ၂ နာရီလောက်က စစ်ကောင်စီတပ်နဲ့ PDF ပူးပေါင်းအဖွဲ့တို့ ထိတွေ့တိုက်ပွဲဖြစ်ပွားခဲ့တယ်လို့ ဒေသခံတွေက ပြောပါတယ်။

ယင်းမာပင်မြို့နယ် ဆုံရွာကျေးရွာဘက်ကနေ မင်းမကုန်းကျေးရွာဘက်လာတဲ့ အင်အား ၁၀၀ လောက်ရှိ စစ်ကောင်စီတပ်ဖွဲ့ကို မင်းမကုန်းကျေးရွာနဲ့ ကြိုးကြာဝင်းကျေးရွာအကြားမှာ PDF ပူးပေါင်းအဖွဲ့က တိုက်ခိုက်ရာကနေ နှစ်ဖက် အပြန်အလှန် ပစ်ခတ်မှု ဖြစ်ပွားခဲ့တာလို့ ဆိုပါတယ်။

အပြန်အလှန်ပစ်ခတ်မှုဟာ မိနစ် ၂၀ လောက် ကြာမြင့်ခဲ့ပြီး စစ်ကောင်စီဘက်က ထိခိုက်မှုအခြေအနေ မသိရသေးဘဲ PDF ပူးပေါင်းအဖွဲ့ဘက်က ရဲဘော် ၁ ဦး ကျဆုံးခဲ့တယ်လို့ PDF တပ်ဖွဲ့ဝင် ဗိုလ်သူရိန်က ပြောပါတယ်။

Unity Fighter PDF အဖွဲ့မှ အသက် ၃၀ ဝန်းကျင်ရှိ ရဲဘော် စန်းမြင့်ဌေးဟာ လက်မောင်းကို ကျည်ထိမှန်ခဲ့ရာက အချိန်မီ ဆေးကုသမှု မပေးနိုင်တာကြောင့် သွေးထွက်လွန်ပြီး အသက်ဆုံးရှုံးခဲ့ရတာလို့ ဆိုပါတယ်။

အဲဒီရဲဘော်ဟာ ကျေးရွာအတွင်းက ဒေသခံပြည်သူတွေ ထွက်ခွာနိုင်ဖို့ စစ်ကောင်စီတပ်ဖွဲ့ကို ကာကွယ်ပစ်ခတ်ရင်းကနေ စစ်ကောင်စီတပ်ရဲ့ ပစ်ခတ်မှုခံခဲ့ရတာလို့ တိုက်ခိုက်ရေးမှာပါဝင်တဲ့ PDF ရဲဘော်တဦးက ပြောပါတယ်။

လက်ရှိအချိန်မှာ စစ်ကောင်စီတပ်ဖွဲ့တွေဟာ ကြိုးကြာဝန်းကျေးရွာ ဘုန်းကြီးကျောင်းဝင်း အတွင်းမှာ ရှိနေတယ်လို့ သိရပါတယ်။

စစ်ကိုင်းတိုင်း ယင်းမာပင်မြို့နယ်အတွင်း ဖေ​ဖော်ဝါရီ ၁၆ ရက်​နေ့က ဖြစ်ပွားခဲ့တဲ့တိုက်ပွဲမှာ စစ်​ကောင်စီဘက်က ထိခိုက်ကျဆုံးမှုများခဲ့ပြီး ​လေ​ကြောင်းပစ်ကူ​ပေးခဲ့ရသလို ​ဒေသခံပြည်သူ ၁ ဦးနဲ့ အိမ်​မွေးတိရစ္ဆာန်တွေကိုလည်း သတ်ဖြတ်သွားတယ်လို့ သိရပါတယ်။

ဖေ​ဖော်ဝါရီ ၁၆ ရက် နေ့လယ်ပိုင်း​လောက်မှာ ဆည်​​မြောင်း လက်တံအမှတ် (၅) က​နေ တက်လာတဲ့ စစ်​ကောင်စီတပ်ဖွဲ့ကို PDF ပူး​ပေါင်းအဖွဲ့​တွေက တိုက်ခိုက်ခဲ့တာဖြစ်ပြီး စစ်​ကောင်စီတပ်သား ၁၅ ​ယောက်​ခန့်သေဆုံးပြီး ၃၀ အထက် ဒဏ်ရာရရှိခဲ့ကာ  ၁၅ ​ယောက်လောက်က ဒဏ်ရာပြင်းထန်တယ်လို့ PDF ​ခေါင်း​ဆောင် ဆရာစံက ​ပြောပါတယ်။

“ကျ​နော်တို့အဖွဲ့က သူတို့(စစ်​ကောင်စီတပ်ဖွဲ့) နား​နေတဲ့ မန်ကျည်းပင်အနီးသွား​ရောက်ကာ ဂန်းအစစ် ၁၀ လက်အပါအဝင် တူမီး၊ ခွန်ထိုးများနဲ့ စပစ်ပြီး လက်ပစ်ဗုံးနဲ့ လှမ်းပစ်လိုက်တာ၊ သူတို့နဲ့ ကျ​နော်တို့အဖွဲ့နဲ့ လယ်တစ်ကွက်ခြားမှာရှိပြီး ​လက်ပစ်တစ်ပစ်ကို မှီတယ်၊ သူတို့ပြန်မ​ထောင်နိုင်တဲ့ အ​ခြေ​နေအ​ရောက်မှာ ​လေယာဥ်က ​ရောက်ချ​လာ​တော့ ကျ​နော်တို့အဖွဲ့လည်း ​နောက်ဆုတ်လာခဲ့တာ။” 

တိုက်ပွဲမှာ ကိုယ်တိုင်ပါဝင်ခဲ့တဲ့ PDF ရဲ​ဘော် တစ်ဦးက "သူတို့(စစ်​ကောင်စီ)အဖွဲ့တွေ ပိတ်မိ​နေတဲ့အချိန် ​လေယာဥ်က လာ​ရောက်ကယ်တင်ပစ်ကူ​ပေးပြီး စား​​တော်ပြင်ရွာဘက်ကို သူ့လူ​​​တွေသွားနိုင်​အောင် လုပ်သွားတာ၊ ​လေယာဥ်နဲ့ကြတော့ ကျ​နော်တို့က ဘယ်လိုမှ အဆင်မ​ပြေ​တော့ဘူး" လို့ ​ပြောပါတယ်။

ဖေ​ဖော်ဝါရီ ၁၆ ရက် ညပိုင်းကလည်း စား​တော်ပြင်​ကျေးရွာအတွင်းမှာ စစ်​ကောင်စီတပ်ဖွဲ့ရှိ​နေဦးမယ်လို့ ယူဆပြီး PDF အဖွဲ့က ဝင်​ရောက် စီးနင်းတိုက်ခိုက်ခဲ့​ပေမယ့် စစ်​ကောင်စီတပ်က ညတွင်းချင်း င​မောင်း​ကျေးရွာဘက်ကို ​ထွက်သွားကြတယ်လို့ သိရ​ကြောင်း၊ စစ်​ကောင်စီတပ်ဟာ ​ဒေသခံပြည်သူ​ ၁ ဦးကို လက်ပြန်ကြိုးတုပ် နှိပ်စက်ထားပြီး ရက်ရက်စက်စက်သတ်ဖြတ်သွားသလို ပြည်သူ​တွေ​ မွေးမြူထားတဲ့ သိုး၊ ဆိတ်၊ ကြက် ​​တွေကိုပါ သတ်ဖြတ်သွားကာ ဆိုင်ကယ် ၉ စီးကိုလည်း မီးရှို့ဖျက်စီးသွားတယ်လို့ ဆိုပါတယ်။ 

ယင်းမာပင်မြို့နယ်မှာ ဖေ​ဖော်ဝါရီ ၁၇ ရက် မနက်ပိုင်းကလည်း စစ်ရဟတ်ယာဥ်​တွေ ပျံဝဲ​နေတာကြောင့် ကျဆုံးတပ်သား​တွေ လာ​ရောက်သယ်​ဆောင်တာ (သို့မဟုတ်) အင်အားလာဖြည့်တာဖြစ်နိုင်တဲ့အတွက် စစ်​ရေးအ​ခြေ​နေ တင်းမာလာနိုင်တယ်လို့ ​ဒေသခံ​တွေက ​ပြောပါတယ်။

ယင်းမာပင်မြို့နယ် တိုက်ပွဲနဲ့ပတ်သက်ပြီး ထိခိုက်ကျဆုံးအခြေအနေကို စစ်ကောင်စီဘက်က သတင်းထုတ်ပြန်တာ မတွေ့ရသေးပါဘူး။