စစ်ကိုင်းတိုင်း၊ ယင်းမာပင်မြို့နယ်မှာ စစ်ကောင်စီတပ်ကို ဆရာစံ PDF ပြောက်ကျားတပ်ဖွဲ့နဲ့ ယင်းမာပင်ပြောက်ကျားတပ်ဖွဲ့တို့ ပူးပေါင်းတိုက်ခိုက်ခဲ့တယ်လို့ ဆရာစံ PDF တာဝန်ရှိသူက ဒီဗွီဘီကို ပြောပါတယ်။

မေ ၃ ရက် ညနေ ၅ နာရီခွဲက လည်ငေါက်ရွာ အရှေ့ဘက်ရှိ ယာခင်းတွေကိုဖြတ်ပြီး ယင်းမာပင်ဘက် ဦးတည်ထွက်ခွာလာတဲ့ စစ်ကောင်စီတပ်ဖွဲ့ဝင်တွေ လိုက်ပါလာတဲ့ ယာဉ် ၃ စီးကို ပူးပေါင်းတပ်က ဒရုန်းအပါအဝင် လက်နက်ငယ်တွေနဲ့ အနီးကပ် ပစ်ခတ်တိုက်ခိုက်ခဲ့တာကြောင့် စစ်ကောင်တပ်ဖွဲ့ဝင် ၃ ဦး သေဆုံးပြီး ဆရာစံ PDF အဖွဲ့ရဲ့ ဒရုန်းတခု ရာသီဥတု အခြေအနေကြောင့် ဆုံးရှုံးသွားတယ်လို့ ဆိုပါတယ်။

“စစ်(--) တွေက ကားလမ်းအတိုင်းလာတာ မဟုတ်ဘူး၊ ယာခင်းတွေထဲက ဖြတ်လာတာ။ ကျနော်တို့က ကြားဖြတ်တိုက်ခိုက်တာပါ။ အနီးကပ်ပစ်ရတာဆိုတော့ စစ်သား ၃ ယောက် သေသွားတာ သေချာပါတယ်။ ဒရုန်းနဲ့ တိုက်ခိုက်နေတဲ့အချိန် သူတို့ဘက်က ပြန်ပစ်ခတ်လာတော့ ဒရုန်းကို ထိန်းလို့မရလိုက်ဘဲ ပျောက်ဆုံးသွားတယ်။”

ပျောက်ဆုံးသွားတဲ့ ဒရုန်းဟာ ၃၂ သိန်း တန်ကြေးရှိပြီး စစ်ကောင်စီတပ်ဖွဲ့တွေ တပ်စွဲထားတဲ့ အထိုင်စခန်းတွေ၊ ရဲစခန်းတွေနဲ့ တိုက်ပွဲတွေမှာ အသုံးပြုခဲ့တာရှိလို့ ရဲဘော်ရဲဘက်တဦး ကျဆုံးသွားသလို စိတ်မကောင်းဖြစ်ရပြီး ဝယ်ယူရတာ ခက်ခဲလွန်းတာကြောင့် ကြီးမားတဲ့ ဆုံးရှုံးမှုတခု ဖြစ်တယ်လို့ ဆိုပါတယ်။

ဆရာစံ PDF ဟာ ငွေကြေးကုန်ကျစရိတ် သက်သာနိုင်ဖို့ မိုင်တဲလ်မမ အပါအဝင် တာဝေးပစ် ဒုံးကျည်တွေနဲ့ တခြားလက်နက်ငယ်တွေကို ကိုယ်တိုင်ထုတ်လုပ်ပြီး တော်လှန်ရေးမှာ တိုက်ပွဲဝင်နေတာ ဖြစ်ပါတယ်။

စစ်ကိုင်းတိုင်း ကလေးမြို့နဲ့ ယင်းမာပင်မြို့နယ်တို့မှာ တိုက်ပွဲတွေဖြစ်ပွားနေပြီး စစ်ကောင်စီတပ်က လက်နက်ကြီးတွေနဲ့ ပစ်ခတ်နေတာကြောင့် ဒေသခံတွေ ထွက်ပြေးတိမ်းရှောင်နေရကာ စားဝတ်နေရေး အခက်အခဲ ကြုံနေကြရတယ်လို့ သိရပါတယ်။
အခုနှစ် ဇန်နဝါရီလဆန်းပိုင်းက စတင်ပြီး စစ်ကောင်စီတပ်နဲ့ ဒေသခံ ပြည်သူ့ကာကွယ်ရေးအဖွဲ့တွေရဲ့ တိုက်ပွဲတွေကြောင့် ကလေးမြို့ နတ်ချောင်း၊ နတ်မြောင်းနဲ့ ချောင်းခွ စတဲ့ အနီးအနားရွာတွေက ဒေသခံတွေဟာ ဘေးလွတ်ရာဒေသတွေကို ထွက်ပြေး တိမ်းရှောင်နေကြရပါတယ်။
ကလေးမြို့ပေါ် ရောက်ရှိလာကြတဲ့ စစ်ရှောင်တွေဟာ ဆွေမျိုးအိမ်မှာ ခိုလှုံနေကြ‌တာတွေ ရှိကြသလို အိမ်ငှားနေထိုင်တဲ့ သူတွေလည်း ရှိကြပါတယ်။
သူတို့ဟာ နေရပ်စွန့်ခွာပြီး အဝတ်တထည် ကိုယ်တခုနဲ့ ပြေးလာရတဲ့အပြင် ငွေကြေးအလုံအလောက် မရှိတာကြောင့် အိမ်ငှားရမ်းခ ပေးနေရတာတွေပါ အခက်အခဲ ဖြစ်နေသလို ကူညီထောက်ပံ့ပေးတဲ့ အဖွဲ့အစည်းနဲ့ ပရဟိတအသင်းတွေလည်း မရှိတာကြောင့် ပိုပြီးခက်ခဲနေကြတယ်လို့လည်း ဆိုပါတယ်။
စစ်ကောင်စီတပ်တွေဟာ နတ်ချောင်းကျေးရွာအတွင်းက လူနေအိမ်တွေကို မီးရှို့ဖျက်ဆီးခဲ့ကြပြီး ‌ရွာသူရွာသားတွေကိုလည်း ခြိမ်းခြောက်စာတွေ ရေးသားခဲ့ပါတယ်။
စစ်ဘေးရှောင်တွေဟာ ဘေးလွတ်ရာ တောတောင်တွေနဲ့ ကျေးရွာတွေ မြို့တွေကို ထွက်ပြေးတိမ်းရှောင်နေကြရတဲ့အတွက် စစ်ရှောင်လူဦးရေ ဘယ်လောက်ရှိတယ်ဆိုတာတာ့ သီးခြား အတည်မပြုနိုင်သေးပါဘူး။
ယင်းမာပင်ခရိုင် ယင်းမာပင်မြို့နယ်မှာလည်း မတ် ၂၉ ရက်ညပိုင်းက စစ်ကောင်စီတပ်ဖွဲ့ လက်နက်ကြီးနဲ့ ရမ်းသမ်းပစ်ခတ်တာကြောင့် အိမ်မွေးတိရစ္ဆာန်နဲ့ ပစ္စည်းအချို့ ထိခိုက်ပျက်စီးခဲ့ပြီး ပြည်သူတွေ ညတွင်းချင်း ထွက်ပြေးခဲ့ကြရတယ်လို့ ဒေသခံတွေက ပြောပါတယ်။
ယင်းမာပင်မြို့မှာ တပ်စွဲနေတဲ့ စစ်ကောင်စီတပ်ဖွဲ့က မြို့အတွင်းကနေ အခြားကျေးရွာတွေဘက်ကို ည ၉ နာရီလောက်က စတင်ပြီး ရမ်းသမ်းပစ်ခတ်ခဲ့တာလို့ ဆိုပါတယ်။
အဲဒီလိုပစ်ခတ်မှုကြောင့် ရွာသာယာကျေးရွာအတွင်းကို လက်နက်ကြီး ကျရောက်ပေါက်ကွဲခဲ့ကာ နွား ၁ ကောင်နဲ့ ဆိုင်ကယ် ၁ စီး ထိမှန်ခဲ့တယ်လို့ ဒေသခံတဦးက ပြောပါတယ်။
စစ်ကောင်စီတပ်ရဲ့ ရမ်းသမ်းပစ်ခတ်မှုတွေကြောင့် ရွာသာယာရွာ၊ နှောရိုးရွာ၊ ကောင်းဆင့်ရွာ၊ ရွာထောင်ရွာ၊ လေးရွာနဲ့ မြို့ကြီးရွာ စတဲ့ ကျေးရွာနေပြည်သူတွေ ညတွင်းချင်း အိုးအိမ်စွန့်ခွာ ထွက်ပြေးခဲ့ကြရတယ်လို့ ဆိုပါတယ်။
စစ်ကောင်စီတပ်ဖွဲ့တွေဟာ ယင်းမာပင်မြို့နယ်အတွင်း တပ်ဖြန့်နေရာယူထားတာကြောင့် သူတို့နဲ့ အနီးနားမှာရှိတဲ့ ဒေသခံပြည်သူတွေ နေအိမ်တွေမှာ မနေရဲကြတာကြောင့် ထွက်ပြေးနေကြရပြီး စားဝတ်နေရေး အခက်ကြုံနေရတယ်လို့ ပြောပါတယ်။
အဲဒီလို တပ်စွဲနေထိုင်တဲ့ စစ်ကောင်စီတပ်တွေကို ဒေသခံ PDF ပူပေါင်းအဖွဲ့တွေက တိုက်ခိုက်တာတွေ ရှိခဲ့ပြီး မတ် ၂၉ ရက် ညပိုင်းကလည်း ယင်းမာပင်မြို့တွင်းမှာရှိတဲ့ စစ်ကောင်စီတပ်ဖွဲ့ အပါအဝင် အောင်ဇေယျကွက်သစ်အနီးမှာရှိတဲ့ စစ်ကောင်စီတပ်ဖွဲ့တွေကို PDF အဖွဲ့တွေက တိုက်ခိုက်ခဲ့ပြီး ထိခိုက်ဒဏ်ရာမှု အခြေအနေကိုတော့ မသိရသေးပါဘူး။