အမွေအနှစ်ဆိုင်ရာ ကြားကာလ စီမံအုပ်ချုပ်မှု ဗဟိုအဖွဲ့နဲ့ မကွေးတိုင်း ပြည်သူ့အုပ်ချုပ်ရေးအဖွဲ့တို့ ညှိနှိုင်းအစည်းဝေး ကျင်းပပြီး ဒေသတွင်းက အမွေအနှစ်အဖြစ် သတ်မှတ်ထားတဲ့ နေရာ၊ ဒေသ၊ အဆောက်အအုံပေါင်း ၂၅ ခုကျော် ထုတ်ပြန် ကြေညာလိုက်ပါတယ်။

ဒါဟာ ပထမအကြိမ် ထုတ်ပြန်တာဖြစ်ပြီး အဲဒီနေရာတွေမှာ “ကုန်းကြောင်း၊ လေကြောင်း၊ ကြည်းကြောင်းနဲ့ စစ်ရေးပြုလုပ်ခြင်း၊ စခန်းချခြင်း၊ မီးရှို့ခြင်း မလုပ်ရဘူးဆိုတဲ့ အချက်တွေ အပါအဝင် လိုက်နာရန်အချက် ၅ ချက် ထုတ်ပြန်ပါတယ်။

ဖောက်ဖျက်ကျူးလွန်ရင် ယဥ်ကျေးမှုအမွေအနှစ်ဒေသများ ကာကွယ်စောင့်ရှောက်ရေးဥပဒေ ၂၀၁၉၊ ရှေးဟောင်းအဆောက်အအုံများ ထိန်းသိမ်းကာကွယ်ရေးဥပဒေ ၂၀၁၅၊ အကြမ်းဖက်မှု တိုက်ဖျက်ရေးဥပဒေ ၂၀၁၄ တို့ အပါအဝင် နိုင်ငံတကာ ဆက်စပ်ဥပဒေတွေနဲ့ အရေးယူ ဆောင်ရွက်မယ်လို့ ထည့်သွင်းရေးသားပါတယ်။

ဒါ့အပြင် ထုတ်ပြန်လိုက်တဲ့ အမွေအနှစ်စာရင်းမှာ ဘာသာရေးပေါင်းစုံရဲ့ အဆောက်အဦတွေ၊ ကိုလိုနီခေတ် အဆောက်အဦတွေ၊ ခံတပ်အဆောက်အဦတွေ စုံစုံလင်လင် ပါဝင်လာတာ တွေ့ရပါတယ်။

အာဏာသိမ်းခဲ့တဲ့ ၂၀၂၃ ခုနှစ် ဖေဖော်ဝါရီ ၁ ရက်နေ့နောက်ပိုင်း စစ်ကောင်စီတပ်ဟာ စစ်ကိုင်းတိုင်း ရွှေဘိုခရိုင် ရေဦးမြို့နယ် ချမ်းသာကျေးရွာရှိ နှစ်ပေါင်း ၁၂၉ နှစ် သက်တမ်းကြာ ကက်သလစ်ခရစ်ယာန် မယ်တော်သခင်မကျောင်းနဲ့ ရွှေဘိုခရိုင် ဝက်လက်မြို့နယ်ရှိ ရှေးဟောင်းအမွေအနှစ်စာရင်းဝင် ဟံလင်းပျူမြို့ဟောင်းတို့ အပါအဝင် အမွေအနှစ်စာရင်းဝင် အဆောက်အဦ၊ နေရာဒေသတွေကို မီးရှို့ဖျက်ဆီးခဲ့ပါတယ်။

ထိုင်းနိုင်ငံက အာဆီယံဒေသတွင်း နိုင်ငံတွေထဲမှာ အမွေအနှစ်အတွက် အကောင်းဆုံး ထိပ်တန်းနိုင်ငံဖြစ်လာခဲ့တယ်လို့ နေးရှင်းသတင်းတပုဒ်မှာ ဖော်ပြပါတယ်။

အမေရိကန်အခြေစိုက် မီဒီယာကုမ္ပဏီ ယူအက်စ်နယူးစ်က ထုတ်ပြန်တဲ့ အခုနှစ် ၂၀၂၁ ခုနှစ်အတွက် ယဉ်ကျေးမှုအမွေအနှစ်အတွက် အကောင်းဆုံးကမ္ဘာ့နိုင်ငံတွေ စာရင်းမှာ ထိုင်းနိုင်ငံက အဆင့် ၇ နေရာက ပါဝင်လာခဲ့ပြီး အာဆီယံဒေသတွင်း နိုင်ငံတွေထဲမှာတော့ ထိပ်ဆုံးမှာ ရှိနေခဲ့တာ ဖြစ်ပါတယ်။

ခုလိုအဆင့်သတ်မှတ်ချက်တွေကိုတော့ နိုင်ငံ့အမွေအနှစ်တွေ၊ ယဉ်ကျေးမှုနဲ့ ကြွယ်ဝတဲ့ သမိုင်းကြောင်း၊ အစားအစာ၊ ပထဝီနဲ့ ယဉ်ကျေးမှုဆိုင်ရာ ဆွဲဆောင်မှုတွေနဲ့ အခြေခံ အမှတ်ပေးတွက်ချက်ထားတာဖြစ်ပြီး မြန်မာနိုင်ငံကတော့ အဆင့် ၆၂ နေရာမှာ ရှိနေတာပါ။

ထိပ်ဆုံး ၅ နိုင်ငံစာရင်းမှာတော့ စပိန်၊ အီတလီ၊ ဂရိ၊ ပြင်သစ်၊ မက္ကဆီကိုနိုင်ငံတွေ ရှိနေပြီး အဆင့် ၆ နေရာမှာတော့ အာရှနိုင်ငံတနိုင်ငံဖြစ်တဲ့ အိန္ဒိယနိုင်ငံက ရပ်တည်နေ တာ ဖြစ်ပါတယ်။       အဲဒီနောက်မှာတော့ ထိုင်းနိုင်ငံက အဆင့် ၇ နေရာမှာ ရှိနေပြီး အီဂျစ်၊ တူရကီ၊ ဂျပန်နိုင်ငံတွေက  ထိပ်ဆုံး ၁၀ နိုင်ငံထဲ အသီးသီး ပါဝင်နေတာ ဖြစ်ပါတယ်။