အမေရိကန် အမျိုးသားလုံးခြုံရေးအကြံပေး ဂျိတ်ခ်ဆူလီဗန်က တရုတ်ထိပ်တန်းသံတမန် ယန်ကျဲချီ နဲ့ အီတလီနိုင်ငံ ရောမမြို့မှာ  မတ်လ ၁၄ ရက်က တွေ့ဆုံခဲ့ပါတယ်။

ရုရှား-ယူကရိန်းစစ်ပွဲမှာ တရုတ်အစိုးရက ရုရှားကို အကူအညီပေးခဲ့ရင် တရုတ်အပေါ်  ပြင်းထန်တဲ့ စီးပွားရေးအရေးယူမှုတွေ လုပ်သွားမယ်လို့ သတိပေးဖို့ ဆူလီဗန်က ယန်ကို တွေ့ဆုံခဲ့တာပါ။

အမေရိကန်နဲ့ မဟာမိတ်နိုင်ငံတွေက ယူကရိန်းအရေးမှာ တရုတ်ကို ကင်းကင်းရှင်းရှင်းနေဖို့ ပြောဆိုထားကြတာပါ။

ရုရှားဘက်က ဝင်ကူခဲ့ရင် ကုန်သွယ်ရေးနဲ့ နည်းပညာဆိုင်ရာ ဒဏ်ခတ်အရေးယူပိတ်ဆို့မှု အကျိုးဆက်တွေ ခံရပါလိမ့်မယ်။

ရုရှားက ယူကရိန်းကျူးကျော်စစ်ပွဲအတွက် စစ်လက်နက်အကူအညီ တရုတ်ထံ တောင်းခံနေတယ်လို့ အမေရိကန်အရာရှိတွေက မတ် ၁၃ ရက်က ပြောပါတယ်။

လက်ရှိစစ်ပွဲကာလအတွင်း တရုတ်က ရုရှားကို စီးပွားရေးနဲ့ စစ်ရေးအကူအညီတွေ ဘယ်လောက်ထောက်ပံ့နေသလားဆိုတာ အမေရိကန်က အသေချာ စောင့်ကြည့်နေတယ်လို့ ဆူလီဗန်က ပြောဆိုပါတယ်။

ယူကရိန်းစစ်ပွဲနဲ့ပတ်သက်လို့ ရုရှားရဲ့ စစ်ရေးကျူးကျော်မှုလို့ ခေါ်ဆိုဖို့  တရုတ်အစိုးရက ငြင်းဆန်ထားတာပါ။

ပြီးခဲ့တဲ့အပတ်ကတော့ သမ္မတရှီကျင့်ဖျင်က ရုရှားအပေါ် အနောက်ရဲ့ စီးပွားရေး ပိတ်ဆို့အရေးယူမှုတွေက ကမ္ဘာ့စီးပွားရေးကိုလည်း  သက်ရောက်မှုရှိလာနိုင်တယ်လို့ စိုးရိမ်ပြခဲ့ပါတယ်။