ကမ္ဘာ့အကြီးဆုံး ရေအားလျှပ်စစ်စီမံကိန်းဖြစ်တဲ့ တရုတ်နိုင်ငံရှိ လျှိုမြောင်သုံးသွယ် ရေကာတာကြီးထဲကနေ သင်္ဘောတွေ ဖြတ်သန်းသွားလာမှုဟာ ၂၀၂၃  ခုနှစ် ပထမသုံးလပတ်မှာ စံချိန်သစ်တင်ခဲ့တယ်လို့ တရုတ်ရေလမ်းကြောင်း အာဏာပိုင်တွေက ပြောပါတယ်။

တရုတ်နိုင်ငံ ယန်ဇီမြစ်ပေါ်မှာရှိတဲ့ ဒီရေကာတာ ပေါ်ကနေ အခုနှစ် ပထမ သုံးလအတွင်း စုစုပေါင်း ကုန်စည် တန်ချိန် သန်း ၄၀ နီးပါး သယ်ယူပို့ဆောင်ခဲ့ပြီး တစ်နှစ်ထက်တစ်နှစ် ၂၂ ရာခိုင်နှုန်း တိုးလာခဲ့တာပါ။

ကာလတူမှာ ကုန်စည်အများဆုံး သယ်ယူနိုင်တဲ့ ပမာဏအဖြစ် မှတ်တမ်းဝင်ခဲ့တယ်လို့ စီစီတီဗီ သတင်းဌာနက သတင်းထုတ်ပါတယ်။

ဒီစီမံကိန်းကို လွန်ခဲ့တဲ့နှစ် ၂၀ ကစပြီးအကောင်အထည်ဖော်ခဲ့ပြီး ဒီဆည်မှာ ဘက်စုံသုံး ရေထိန်းချုပ်မှုစနစ်သုံးထားကာ ရေလမ်းခွင့်ပြုပေးတဲ့အပြင် စွမ်းအင် ကီလိုဝပ် ၂၂ သန်းခွဲ  ထုတ်လွှတ်နိုင်ပါတယ်။

ဩအရှေ့ဘက်ကမ်းရိုးတန်းမြို့ ရှန်ဟိုင်းမြို့ကနေ အနောက်တောင်ဘက် ကုန်းတွင်းပိုင်းက ချုံချင်းမြို့ထိ ကုန်စည်တွေကို ပို့ဆောင်ပေးနိုင်ပါတယ်။

တပြိုင်တည်းမှာဒေသတွင်း စီးပွားရေးတက်ကြွမှုအတွက် အရေးကြီးတဲ့ ညွှန်ပြချက်ဖြစ်တဲ့ ယန်ဇီမြစ်တစ်ခုလုံးရဲ့ နှစ်စဉ်ကုန်တင် စီးဆင်းမှုဟာလဲ တန်ချိန်  ၃ ဘီလီယံခွဲ အထိရောက်ခဲ့ပါတယ်။

ယန်ဇီမြစ်ဟာ ကမ္ဘာ့ရေကြောင်းလမ်းတွေထဲမှာ ကုန်စည်စီးဆင်းမှု ပထမအဆင့် နေရာမှာ ၁၈ နှစ်ဆက်တိုက် ရပ်တည်ခဲ့ပါတယ်။

တရုတ်နိုင်ငံအနောက်တောင်ပိုင်း ချုံချင်းမြို့နားက ယန်ဇီမြစ်ထဲမှာ ရေကျနေလို့ နှစ်ပေါင်း ၆၀၀ သက်တမ်းရှိပြီလို့ ယူဆရတဲ့ ရုပ်ပွားတော်တွေကို ဖော်ထုတ်နိုင်ခဲ့တယ်လို့ နိုင်ငံပိုင်မီဒီယာ ဆင်ဟွာက ဖော်ပြပါတယ်။

ရုပ်ပွားတော် ၃ ဆူကို မင်နှင့် ချင်မင်းဆက်တွေအတွင်း တည်ဆောက်ခဲ့တဲ့ ဖှိုးယဲ့လျန် လို့ခေါ်တဲ့ ကျွန်းကျောက်တန်းရဲ့ အမြင့်ဆုံးအပိုင်းမှာ တွေ့ခဲ့တာပါ။

ရုပ်ပွားတော်တွေထဲကတစ်ခုကတော့ ကြာပန်းခုံပေါ်မှာ ထိုင်နေတဲ့ ရဟန်းတစ်ပါးကို ပုံဖော်ထားပါတယ်။

တရုတ်နိုင်ငံ အနောက်တောင်ပိုင်းဒေသမှာ မိုးခေါင်ပြီး အပူလှိုင်းကြောင့် ယန်ဇီမြစ်ရေ အမြန်ကျဆင်းနေပါတယ်။

ချုံချင်းမြို့မှာရှိတဲ့ ခရိုင် ၃၄  ခရိုင်မှာ  မြစ် ၆၆ စင်းလောက် ခန်းခြောက်သွားပြီလို့ နိုင်ငံပိုင်ရုပ်သံ CCTV ကကြေညာပါတယ်။

ဥရောပမှာ သီတင်းပတ်တွေအတွင်း မိုးခေါင်ရေရှားလို့ တိုက်ကြီးတစ်ခွင်လုံးမှာ နှစ်ရှည်လများ ရေမြုပ်နေတဲ့ ရတနာတွေ ပေါ်ထွက်ခဲ့ ပါတယ်။

စပိန်မှာ ရှေးဟောင်းသုတေသနပညာရှင်တွေဟာ စပိန်ရဲ့ စတုန်းဟန်းလို့ နာမည်ပေးထားတဲ့  သမိုင်းမတင်မီက ကျောက်တုံးစက်ဝိုင်းတစ်ခု ပေါ်လာလို့ ဝမ်းမြောက်ခဲ့ကြပါတယ်။

ဥရောပရဲ့ အားကြီးတဲ့ မြစ်တွေထဲက တစင်းဖြစ်တဲ့ ဒါနုဘေမြစ်ဟာ ရာစုနှစ်တစ်ခုနီးပါးအတွင်း အနိမ့်ဆုံးအဆင့်ထိ မြစ်ရေ ကျဆင်းသွားခဲ့တာပါ။

ဒါကြောင့် ဒုတိယကမ္ဘာစစ်အတွင်း နစ်မြုပ်သွားတဲ့ ဂျာမန်စစ်သင်္ဘော အစီး ၂၀ ကျော် ဟာ ဆားဘီးယားနိုင်ငံက မြစ်ဆိပ်ကမ်းမြို့ ပရာဟိုဗိုနားမှာ ပြန်ပေါ်လာခဲ့ဖူးပါတယ်။