close

ယာယီစျေး

close

November 16, 2021

မီးလောင်နတ်မောက်မြို့မဈေး ဆိုင်ခန်းရှင်များအတွက် ယာယီစျေးဆောက်လုပ်နေ

နိုဝင်ဘာ ၁၃ ရက်နေ့ညဦးပိုင်းမှာ မီးလောင်ခဲ့တဲ့ မကွေးတိုင်း၊ နတ်မောက်မြို့၊ မြို့မစျေးက ဆိုင်ခန်းပိုင်ရှင်တွေအတွက် နတ်မောက်မြို့က ဆုတောင်းပြည်ဘုရားကြီးကွင်းမှာ နိုဝင်ဘာ ၁၅ ရက်နေ့ကစတင်ပြီး ယာယီစျေးတည်ဆောက်နေတယ်လို့ သိရပါတယ်။

နတ်မောက်မြို့နယ်စည်ပင်သာယာရေးအဖွဲ့ရဲ့ တာဝန်ရှိသူက “မီးလောင်ခံရတဲ့ ဆိုင်ခန်းပေါင်း ၂၄၂ ခန်းအတွက် အခုလောလောဆယ်တော့ ဆုတောင်းပြည့်ဘုရားကွင်းပြင်မှာ ယာယီစျေးဖွင့်ထားပေးဖို့ ယာယီဆိုင်ခန်းတွေဆောက်လုပ်နေပါတယ်” လို့ ပြောပါတယ်။

နတ်မောက်မြို့မဈေးကြီးကို နိုဝင်ဘာ ၁၃ ရက်ည ၉ နာရီ ၄၃ မိနစ်က မီးစတင်လောင်ကျွမ်းခဲ့တာဖြစ်ပြီး ည ၁၁ နာရီ ၁၅ မိနစ်အထိ ၁ နာရီခွဲနီးပါး မီးလောင်ကျွမ်းခဲ့တာလို့ မီးသတ်တပ်ဖွဲ့က ထုတ်ပြန်ထားပါတယ်။

ဆိုင်ခန်းအားလုံးနီးပါး မီးလောင်ခံရပြီး အပြင်ဘက်တိုက်တန်းတွေသာ ကျန်ရစ်ကာ မီးမလောင်ဘဲ ကျန်နေတဲ့ ဆိုင်ခန်းတွေထဲက ပစ္စည်းတွေဟာလည်း အားလုံးနီးပါးပျက်စီးသွားသလို ပျောက်ဆုံးတာတွေလည်းရှိတယ်လို့ ဆိုင်ပိုင်ရှင်တချို့ဆီက သိရပါတယ်။

နတ်မောက်မြို့နယ် မီးသတ်ဦးစီးမှူးရုံးတာဝန်ခံက “မြို့မစျေးကြီးမီးလောင်မှုကြောင့် ဆိုင်ခန်းပေါင်း ၂၄၂ ခန်း မီးလောင်ပျက်စီးခဲ့ပြီး တန်ဖိုးငွေ ကျပ်သိန်းလေးရာတစ်ဆယ့်နှစ်သိန်းလေးသောင်းခန့် မီးလောင်ဆုံးရှုံးခဲ့ရပါတယ်။ ဘာကြောင့် လောင်ကျွမ်းတယ်ဆိုတာတော့ စုံစမ်းနေဆဲဖြစ်ပါတယ်” လို့ ထုတ်ပြန်ပြောဆိုထားပါတယ်။

မကွေးတိုင်း၊ နတ်မောက်မြို့၊ မြို့မရပ်ကွက်မှာရှိတဲ့ နိုဝင်ဘာ ၁၃ ရက်နေ့ညဦးပိုင်းမှာ မီးလောင်ခံခဲ့ရတဲ့ နတ်မောက်မြို့မစျေးကို ၅ လနဲ့ အပြီးတည်ဆောက်ပေးမယ်လို့ နိုဝင်ဘာ ၁၄ ရက်နေ့မှာ မကွေးတိုင်းစည်ပင်တာဝန်ရှိသူက ပြောဆိုသွားပြီး မီးလောင်ခံခဲ့ရတဲ့မြို့မ စျေးကြီးကိုလည်း ရှင်းလင်းရေးတွေ ဆောင်ရွက်နေတာ မြင်တွေ့ရတယ်လို့ ဒေသခံတွေက ပြောပါတယ်။

12 mins Ago

June 7, 2020

ချောက်မြို့၌ ယာယီစျေးအတွင်း မရောင်းဘဲ လမ်းဘေးရောင်းသူများကို အရေးယူ 

မကွေးတိုင်း ချောက်မြို့မှာ ကိုဗစ်-၁၉ ကာလ ပျံကျစျေးသည်အတွက် ယာယီဖွင့်လှစ်ပေးထားတဲ့ ဘောလုံးကွင်းအတွင်း ရွှေ့ပြောင်းမရောင်းချတဲ့ ပျံကျစျေးသည်တွေကို ပစ္စည်းသိမ်းဆည်းတာ၊ စျေးရောင်းချခွင့် ပိတ်တာတွေ ပြုလုပ်မယ်လို့ မြို့နယ်စည်ပင်သာယာ အမှုဆောင်အရာရှိ ဦးနေမန်းက ပြောပါတယ်။ “အခုလည်း ခေါ်ပြောနေတာတွေ လုပ်နေတယ်၊ မနေ့ကလည်း စစ်လို့တွေ့တဲ့ ဆိုင်သုံးဆိုင်က ပစ္စည်းတချို့ သိမ်းခဲ့တယ်။”  ချောက်မြို့မှာ ကိုဗစ်ကာလ ဧပြီလလယ်ပိုင်းက စတင်ပြီး မြို့မစျေးနဲ့ ပျံကျစျေးတန်းတွေ ပိတ်သိမ်းထားခဲ့ပြီး မေလဆန်းပိုင်းမှာ တိုင်းဒေသကြီးအစိုးရ ညွှန်ကြားချက်နဲ့ မြို့နယ်အားကစားကွင်းအတွင်းမှာ ယာယီစျေးကို ဖွင့်လှစ်ထားရှိခဲ့ကာ အချို့စျေးသည်တွေက လူသွားလာများတဲ့ လမ်းဘေးတွေ ရောင်းချတာတွေ ရှိနေတာပါ။ ယာယီစျေးအတွင်း ရောင်းချနေတဲ့ စျေးသညိတဦးက “ကျမတို့က ​ဒီထဲကို ထွက်ခိုင်းကတည်းက စည်းနဲ့ကမ်းနဲ့ သုံးပေခြားဆို ခြားတယ်၊ Mask တပ်ဆို တပ်တယ်၊ လက်ဆေးဆို ဆေးတယ်။ ဒီထဲမှာပဲ နေဆိုနေတယ်။ ဒါပေမဲ့ ဒီအထဲမှာ ရောင်းနေတဲ့ပစ္စည်းတွေက အပြင်မှာ ထွက်နေတဲ့ လူတွေဆီမှာ အကုန်ဝယ်ရနေတော့ ဒီအထဲက လူတွေက မရောင်းရဘူး” လို့ ပြောပါတယ်။ မေ ၃၀ ရက်နေ့က မြို့မစျေးကို ပြန်လည်ဖွင့်လိုက်လို့ ယာယီစျေးမှာ ရောင်းချနေသူတွေ အခက်အခဲများ ရှိလာပြီး နဂိုမူလပျံကျစျေေးနေရာမှာ စည်းကမ်းနဲ့အညီ ပြန်လည် ရောင်းချစေလိုတယ်လို့ ယာယီစျေးမှ စျေးသည်တွေက ပြောပါတယ်။ ကိုလင်း(ချောက်)
1 year Ago
Up