ရခိုင်ပြည်နယ်၊ မောင်တောမြို့နယ်မြောက်ပိုင်းသို့  INGO၊ NGO အဖွဲ့အစည်းတွေရဲ့ ခရီးသွားလာခွင့်ကို စစ်ကောင်စီက ယာယီ ရပ်တန့်လိုက်တဲ့အတွက် မြန်မာနိုင်ငံကြက်ခြေအသင်းရဲ့ ဇူလိုင် ၁၆ ရက် ဒီနေ့ ခရီးစဥ်ကို ဖျက်သိမ်းလိုက်ရပါတယ်။

မောင်တောမြို့နယ် ကြက်ခြေနီရုံး တာဝန်ရှိသူတစ်ဦးက "မနေ့ကပြုလုပ်တဲ့ နယ်လုံအစည်းအဝေး ဆုံးဖြတ်ချက်နဲ့ မောင်တောမြောက်ပိုင်းကို သွားလာခွင့်တွေ မပြုတော့တာပါ။  ဒီနေ့ခရီးစဥ်တွေအားလုံး ဖျက်သိမ်းလိုက်ရတယ်” လို့ ပြောပါတယ်။

မြန်မာနိုင်ငံကြက်ခြေနီအသင်းဟာ မောင်တောမြောက်ပိုင်းမှာ ဒေသခံပြည်သူတွေအတွက် အသက်မွေးဝမ်းကြောင်းဆိုင်ရာ လုပ်ငန်းတွေနဲ့  ရွှေ့လျားဆေးကုသမှုတွေကို ကျေးရွာ ၃၀ ကျော်မှာ ပြုလုပ်ပေးနေတာပါ။

အခုလို UN၊NGO၊INGO အဖွဲ့တွေရဲ့ လုပ်ငန်းတွေ ရပ်တန့် လိုက်တာကြောင့် ဝေးလံခေါင်ဖျားတဲ့ မောင်တောမြောက်ပိုင်းဒေသက ပြည်သူတွေ အခက်အခဲ့များစွာ ကြုံတွေ့လာနိုင်တယ်လို့ ဒေသတွေထံက သိရပါတယ်။

ဒေသခံ တဦးက "မောင်တောမြောက်ပိုင်းက ကျေးရွာတွေက WFP နဲ့ ICRC က ရိက္ခာထောက်ပံ့မှုနဲ့ ၂၀၁၇ ခုနှစ်ကတည်းက ရပ်တည်နေကြတာ။ အခုလို တားဆီးလိုက်တယ် ဆိုတော့ ငတ်လို့ သေကြရုံပါပဲ" လို့ပြောပါတယ်။

ဇူလိုင် ၁၅ ရက်က စစ်တွေမြို့မှာ ပြုလုပ်တဲ့ ရခိုင်ပြည်နယ်လုံခြုံရေးနဲ့ နယ်စပ်ရေးရာအစည်းအဝေးမှာ မောင်တောမြို့နယ်မြောက်ပိုင်းသို့ UN အဖွဲ့အစည်းတွေ အပါအဝင် NGO၊ INGO အဖွဲ့တွေနဲ့ အစိုးရဝန်ထမ်းတွေပါ ခရီးသွားခွင့် ယာယီ ရပ်တန့်ဖို့ ဆုံးဖြတ်လိုက်တာဖြစ်တယ်လို့ သက်ဆိုင်ရာ INGO အဖွဲ့တွေထံက သိရပါတယ်။

ဦးဇင်အောင် ခေါင်းဆောင်တဲ့ မြန်မာ့လူ့ဘောင်သစ်ဒီမိုကရက်တစ်ပါတီကို စစ်ကောင်စီဩဇာခံ ရွေးကောက်ပွဲကော်မရှင်ဆီက လာရောက်အစစ်ဆေးမခံတာကြောင့်ဆိုပြီး နိုင်ငံရေးပါတီအဖြစ် မှတ်ပုံတင်ထားတာကနေ တနှစ် ယာယီ ရပ်ဆိုင်းလိုက်ပါတယ်။

ပါတီအနေနဲ့ ပါတီပိုင် ရန်ပုံငွေ၊ ငွေကြေး၊ ပစ္စည်းစာရင်းတွေနဲ့ ပတ်သက်ပြီး စစ်ဆေးခံနိုင်ရေး လာရောက်ဖို့ ၂ ကြိမ်တိုင်တိုင် အကြောင်းကြားခဲ့ပေမယ့် ပျက်ကွက်ခဲ့​တယ်လို့ စစ်ကောင်စီရဲ့ ကော်မရှင်က ပါတီကို ပေးပို့တဲ့စာမှာ ဖော်ပြထားပါတယ်။

ဒါကြောင့် မေ ၂ ရက်မှာ ပြုလုပ်ခဲ့တဲ့ စစ်ကောင်စီရဲ့ ရွေးကောက်ပွဲကော်မရှင်၊ စီမံခန့်ခွဲရေး ကော်မတီအစည်းအဝေး ဆုံးဖြတ်ချက်အရ မြန်မာ့လူ့ဘောင်သစ်ဒီမိုကရက်တစ်ပါတီကို နိုင်ငံရေးပါတီအဖြစ် မှတ်ပုံတင်ထားတာကနေ တနှစ် ယာယီရပ်ဆိုင်းဖို့ ဆုံးဖြတ်ခဲ့​တယ်လို့ ဆိုပါတယ်။

ယာယီရပ်ဆိုင်းထားတဲ့ မေ ၃ ရက်ကစလို့ တနှစ်ကာလအတွင်း ပါတီအနေနဲ့ ကော်မရှင်က ညွှန်ကြားထားတဲ့ ပါတီပိုင် ရန်ပုံငွေ၊ ငွေကြေး၊ ပစ္စည်းစာရင်းတွေ စစ်ဆေးခံနိုင်ရေးဆောင်ရွက်တာ လွဲလို့ ကျန်လုပ်ငန်းအားလုံးကိုလည်း ရပ်ဆိုင်းထားရမယ်လို့ ဆိုပါတယ်။

ယာယီရပ်ဆိုင်းထားတဲ့ ကာလကုန်ဆုံးတဲ့အထိ လာရောက်အစစ်ဆေးမခံရင်တော့ နိုင်ငံရေးပါတီများ မှတ်ပုံတင်ခြင်းဥပဒေ ပုဒ်မ ၂၄(င)အရ မြန်မာ့လူ့ဘောင်သစ်ဒီမိုကရက်တစ် ပါတီကို နိုင်ငံရေးပါတီအဖြစ် မှတ်ပုံတင်ထားတာကနေ ပယ်ဖျက်ပြီး ပါတီကိုလည်း ဖျက်သိမ်းမယ်လို့ ဆိုပါတယ်။

ဦးဇင်အောင်နဲ့ ဦးသိန်းထွန်းတို့ ခေါင်းဆောင်တဲ့ မြန်မာ့လူ့ဘောင်သစ်ဒီမိုကရက်တစ်ပါတီကို ၂၀၁၁ ခုနှစ်မှာ မှတ်ပုံတင်ထားတာဖြစ်ပါတယ်။

ပြည်ထောင်စုရွေးကောက်ပွဲ ကော်မရှင်မှာ မှတ်ပုံတင်ထားတဲ့ နိုင်ငံရေးပါတီ ၉၀ ကျော်ထဲမှာ လူ့ဘောင်သစ်အမည်ပါတဲ့ ပါတီ စုစုပေါင်း ၃ ပါတီရှိပြီး အဲဒါပါတီတွေကတော့ လူ့ဘောင်သစ်ပါတီ၊ လူ့ဘောင်သစ်ဒီမိုကရက်တစ်ပါတီ(DPNS)နဲ့ မြန်မာ့လူ့ဘောင်သစ်ဒီမိုကရက်တစ်ပါတီတို့ ဖြစ်ကြပါတယ်။