close

ယီမင်ပြည်သူ

close

April 5, 2022

အပစ်အခတ်ရပ်စဲရေးကို ယီမင်ပြည်သူများ ကြိုဆို

ကုလသမဂ္ဂက ကျောထောက်နောက်ခံပေးတဲ့ ၂ လကြာ အပစ်အခတ်ရပ်စဲရေးကို ယီမင် ပြည်သူတွေက ကြိုဆိုလိုက်ပြီး အနာဂတ်မှာ မသေချာပေမယ့် သူတို့ရဲ့ မျှော်လင့်ချက်တွေကို ဆောင်ကြဉ်းလာပြီလို့လည်း ပြောပါတယ်။

စနေနေ့ ဒေသစံတော်ချိန် ည ၇ နာရီမှာ စတင် အာဏာသက်ရောက်တဲ့ ၂ လကြာ အပစ်အခတ် ရပ်စဲရေးကို ကုလသမဂ္ဂရဲ့ ယီမင်နိုင်ငံဆိုင်ရာ အထူးသံတမန် ဟန်စ် ဂရန်းဘာ့ဂ်က သောကြာနေ့မှာ ကြေညာခဲ့တာပါ။

ယီမင်နိုင်ငံအတွင်းနဲ့ ဆော်ဒီအာရေဗျ ယီမင်နယ်စပ်တွေမှာ ဘယ်လို စစ်ရေးလှုပ်ရှားမှု ပုံစံ အားလုံးကိုမဆို ရပ်ထားဖို့ ကြေညာခဲ့ပါတယ်။

“ဒါဟာ အောင်မြင်နိုင်မယ်လို့ မျှော်လင့်တယ်။ ဒါဟာ အားလုံးကျေနပ်မယ့် နိုင်ငံရေး အဖြေကို ဦးတည်နိုင်မယ်လို့လည်း မျှော်လင့်တယ်။ တီဗီမှာ ပြောနေမယ့်အစား ဒီအပစ်အခတ်ရပ်စဲရေးဟာ သိသိသာသာ အပြောင်းအလဲဖြစ်လာမယ်လို့ မျှော်လင့်တယ်”လို့ အေဒင်မြို့ခံ အဗ်ဒူခါလစ်က ပြောပါတယ်။

ပြည်လုံးကျွတ် အပစ်အခတ်ရပ်စဲရေးဟာ မွတ်စလင်တို့ရဲ့ ရာမာဒန် ဥပုသ်လ စချိန်နဲ့လည်း တိုက်ဆိုင်နေပါတယ်။

ဒါဟာ ၂၀၁၄ နှောင်းပိုင်း ယီမင်ပြည်တွင်းစစ် စတင်တည်းက ပထမဆုံး အပစ်အခတ်ရပ်စဲရေး ကာလပါ။ ကုလသမဂ္ဂနဲ့ ပင်လယ်ကွေ့ ပူးပေါင်းဆောင်ရွက်ရေး ကောင်စီတို့က ကျောထောက်နောက်ခံ ပေးထားတဲ့ ယီမင်ငြိမ်းချမ်းရေး ဆွေးနွေးပွဲတွေကို ရီယာ့ဒ်မြို့မှာ အင်္ဂါနေ့က စပြီး တံခါးပိတ် ဆွေးနွေးခဲ့တာပါ။

ဧပြီ ၇ ရက်နေ့ထိ ဆက်ပြီး ဆွေးနွေးဖို့ မျှော်လင့်ထားပါတယ်။ အီရန်က ကျောထောက်နောက်ခံ ပေးထားတဲ့ ဟူသီပြည်သူ့စစ်တွေက ယီမင်မြောက်ပိုင်းပြည်နယ် အတော်များများကို သိမ်းပိုက်လိုက်တဲ့ ၂၀၁၄ နှောင်းပိုင်းကတည်းက ယီမင်မှာ ပြည်တွင်းစစ် စခဲ့တာပါ။

ဆော်ဒီ ကျောထောက်နောက်ခံ ပေးထားတဲ့ သမ္မတ အဘ်ဒယ် ရာဘူ မန်ဆော်ဟာဒီ ဦးဆောင်တဲ့ အစိုးရဟာ ဆာနာမြို့ဆီကို ဆုတ်ခွာခဲ့ရပါတယ်။

ယီမင်စစ်ပွဲကြောင့် လူထောင်သောင်းချီသေဆုံးခဲ့ ရပြီး လူ ၄ သန်းလောက် အိုးအိမ်စွန့်ခွာထွက်ပြေး ခဲ့ရလို့ နိုင်ငံဟာ အငတ်ဘေးဆိုက်လုနီးပါး ဖြစ်နေတယ်လို့ ကုလသမဂ္ဂက ပြောထားပါတယ်။

1 min Ago
Up