ယီမင်နိုင်ငံက လယ်သမားတွေဟာ မူးယစ်ဆေးတမျိုးဖြစ်ပြီး စိတ်ကြွစေတတ်တဲ့ စိမ်းလန်းတဲ့ ကတ်ဆိုတဲ့အပင်ကို စိုက်ဖို့ မြို့တော်တဝိုက်မှာ မြေအောက်ရေကို စွန့်ထုတ်ပြီး မြေဆီတွေကို ဖယ်ရှားနေပါတယ်။

ရာသီဥတုဒဏ် မခံနိုင်တဲ့ ယီမင်နိုင်ငံအတွင်း အဖိုးတန်သယံဇာတတွေ ကုန်ခန်းသွားမယ့် ဘေးက ခြိမ်းခြောက်နေပါတယ်။

၇ နှစ်ကြာ စစ်ပွဲကြောင့် စီးပွားရေးပြိုလဲခဲ့တဲ့အပြင် နိုင်ငံသားတွေ တကွဲတပြားစီဖြစ်ကုန်တဲ့ ယီမင်နိုင်ငံမှာ ဆိုးရွားလှတဲ့ လူသားချင်း စာနာထောက်ထားမှုဆိုင်ရာ အကျပ်အတည်းကို ဖြစ်စေခဲ့ပြီး လူသန်းပေါင်းများစွာ ငတ်မွတ်မှုနဲ့ ရင်ဆိုင်ခဲ့ရပါတယ်။

ကတ်အရွက်ကို ဝါးတာဟာ နိုင်ငံအတွင်း ရှေးခေတ်တည်းက အစဉ်အလာပါ။ ကတ်အပင်ဟာ တခြားသီးနှံတွေ စိုက်လို့ရတဲ့ ဝင်ငွေထက် သုံးဆရပေမဲ့ ငွေကြေးစီးဆင်းမှု တည်ငြိမ်ရင် ပိုစျေးကြီးပါတယ်။

အခါးအရသာရှိတဲ့ အပင်ဟာ မြေအောက်ရေကိုသုံးဖို့ လိုအပ်လို့ ယီမင်နိုင်ငံရဲ့ ရေရှားပါးမှု ပြဿနာကို ပိုမိုဆိုးရွားစေပါတယ်။

ပဋိပက္ခကြောင့် ရေဆိုင်ရာ အခြေခံအဆောက်အအုံတွေ ပျက်စီးခဲ့ပြီး သန်းနဲ့ချီတဲ့လူတွေ သောက်သုံးဖို့၊ သီးနှံတွေစိုက်ပျိုးဖို့ ဘေးကင်း လုံလောက်တဲ့ရေ မရှိခဲ့ပါဘူး။

မိုးနည်းပြီး တောင်တန်းထူထပ်တဲ့ အာရေဗျကျွန်းဆွယ်မှာ စားနပ်ရိက္ခာနဲ့ အသက်မွေးဝမ်းကျောင်းအဖြစ် သုံးတဲ့ ရိုးရာ လယ်ယာစနစ်ကိုလည်း ပစ်ပယ်ထားခဲ့ပါတယ်။

မြို့တော် စာနာရဲ့ အပြင်ဘက်မှာ သစ်သီးဝလံနဲ့ အစေ့အဆန်တွေ စိုက်ပျိုးတဲ့ အယ်လ် ဟာဝေရီနဲ့ ဘိတ်အယ်လ် ဒါဖစ်ဖ် မြို့တွေမှာရှိတဲ့ လယ်သမားတွေဟာ အခု လယ်ကွင်းတွေကနေ တူးယူထားတဲ့ မြေသားနဲ့ အသစ်တည်ဆောက်ထားတဲ့ လှေကားထစ်တွေမှာ ကတ်အပင်တွေကို စိုက်ပြီး နောက်မှာတော့ မြေကျင်းကြီးတွေကို စွန့်ပစ်ထားခဲ့ပါတယ်။