အီတလီနိုင်ငံ တူရင်းမြို့မှာ ကျင်းပတဲ့ ဒီနှစ်အတွက် ယူရိုဗေးရှင်း 2022 Eurovision သီချင်းဆို ပြိုင်ပွဲမှာ ယူကရိန်းဂီတအဖွဲ့က အကောင်းဆုံးဆု ရရှိသွားပါတယ်။
ခါးလက်ရှ် အော်ချက်စတာ Kalush Orchestra အဖွဲ့ရဲ့ အဆိုတော် အိုလာဆွခ် က “ဒီနှစ် ရတဲ့ ဆုဟာယူကရိန်း နိုင်ငံအတွက် အလွန်အရေးကြီးတဲ့အတွက် လှိုက်လှိုက်လှဲလှဲကျေးဇူးတင်ပါတယ်၊ ယူကရိန်းနိုင်ငံ အဓွန့်ရှည်ပါစေ”လို့ ပထမဆုံး သတင်းစာရှင်းလင်းပွဲမှာ ပြောပါတယ်။
ယူရိုဗေးရှင်း Eurovision သီချင်းဆို ပြိုင်ပွဲဟာ ပုံမှန်အားဖြင့် လူ သန်း ၂၀၀ လောက် ကြည့်ရှုအားပေးတဲ့ အစီအစဉ် ဖြစ်ပါတယ်။
သူတို့အဖွဲ့ရဲ့ ပြိုင်ပွဲဝင် သီချင်းကို ယူကရိန်း ဘာသာနဲ့ သီဆိုတာ ဖြစ်ပြီး ရက်ပ်နဲ့ ရိုးရာဂီတ ပေါင်းစပ်ထားတဲ့ ပုံစံဖြစ်ပါတယ်။ အဆိုတော် အိုလာဆွခ်ရဲ့ အမေ အတွက် ရည်ရွယ်တဲ့ မိခင်ဘွဲ့ သီချင်းတပုဒ်ပါပဲ။
ဒါပေမဲ့ သီချင်း သီဆိုဖျော်ဖြေမှု အပြီးမှာ အဆိုတော် အိုလာဆွခ်က “ယူကရိန်းကို ကူညီပေးကြပါ၊ မာရီယူပိုကို ကူညီပေးကြပါ” လို့ မေတ္တာရပ်ခံတဲ့ စကားပြောခဲ့ပါတယ်။
ခါးလက်ရှ် အော်ချက်စတာအဖွဲ့ဟာ အမှတ်ပေးဒိုင်တွေ ပေးတဲ့အမှတ်အရ စတုတ္ထနေရာမှာ ရှိပေမယ့် ပရိသတ်တွေဆီက စာနာမှုကို သိမ်းကျုံးယူသွားပြီး ပရိသတ်ပေးတဲ့ အမှတ်တွေကို ကြေညာပြီးတဲ့အချိန်မှာတော့ ထိပ်ဆုံးအထိ ရောက်သွားတာဖြစ်ပါတယ်။
ဒါပေမဲ့ ယူရိုဗေးရှင်း သီချင်းပြိုင်ပွဲမှာ ယူကရိန်းနိုင်ငံ ကိုယ်စားပြုတဲ့ အဖွဲ့က အရင်ကလည်း ဆု ၂ ကြိမ်ရခဲ့ဖူးတဲ့အတွက် ဒီတကြိမ်ဆုရတာဟာ ပထမဆုံး မဟုတ်ဘူးလို့တော့ ဆိုနိုင်ပါတယ်။