ရုရှားကျူးကျော်စစ်ကို ရင်ဆိုင်တိုက်ခိုက်နေကြတဲ့ ယူကရိန်းစစ်သည်တွေဟာ သြစတြေးလျနိုင်ငံ မဲလ်ဘုန်းအခြေစိုက် ကုမ္ပဏီတခုရဲ့ အကူအညီနဲ့ စက္ကူကတ်ထူပြားတွေ အသုံးချ တည်ဆောက်ထားတဲ့ ဒရုန်းတွေ အသုံးပြုလာနိုင်ကြတယ်လို့ သိရပါတယ်။

Precision Payload Delivery System (PPDS) လို့ နာမည်ပေးထားတဲ့ အဲဒီဒရုန်းကို စက္ကူကတ်ထူပြားတွေ၊ သားရေကြိုးတွေနဲ့ အလွယ်တကူ တပ်ဆင်နိုင်ပြီး လောက်လွှဲလို ကိရိယာနဲ့ ပစ်လွှတ်နိုင်ပါတယ်။

ကီလိုမီတာ ၁၂၀ (၇၅ မိုင်) ပတ်လည် အကွာအဝေးအထိ ပျံသန်းနိုင်ပြီး ရှေ့တန်းစစ်မြေပြင်ဆီကို ဆေးဝါးနဲ့ ထောက်ပို့ပစ္စည်းတွေ ပေးပို့ရာမှာ အသုံးချနိုင်ပါတယ်။​

ရန်သူတပ်အခြေအနေကို  ကင်းထောက်နိုင်ပြီး အပေါ့စား ဖောက်ခွဲရေးပစ္စည်းတွေလည်း သယ်ဆောင်နိုင်ပါတယ်။

အဲဒီကတ်ထူပြားဒရုန်းကို တပ်ဆင်ဖို့ ဘက်ထရီ မော်တာနဲ့ အစိတ်အပိုင်းတွေ ၂၄ စင်းစာပါဝင်တဲ့ အထုပ်ဟာ ပီဇာထုပ်ပိုးတဲ့ ဘူးပြားလောက်ပဲ ရှိပါတယ်။

GPS လမ်းညွှန်အကူအညီနဲ့လည်း မောင်းနှင်ပျံသန်းနိုင်ပြီး ရုရှားစစ်တပ်ဘက်က GPS Jamming နည်းပညာနဲ့ ရေဒီယိုအချက်ပြမှုတွေ နှောင့်ယှက်ခံရတဲ့အခါမှာလည်း ဒရုန်းဟာ အလိုအလျောက် ဆက်လက်ပျံသန်းနိုင်ပါတယ်။

သြစတြေးလျအစိုးရရဲ့ အကူအညီနဲ့ ပြီးခဲ့တဲ့ ဖေဖော်ဝါရီလကစပြီး လစဉ် အစင်း ၁၀၀ လောက် ယူကရိန်းနိုင်ငံကို ပို့ဆောင်ပေးနေခဲ့တယ်လို့ သိရပါတယ်။

အဲဒီဒရုန်းရဲ့ ရောင်းစျေးကို ကုမ္ပဏီက မကြေညာထားပေမဲ့ ဒေါ်လာ ၁,၀၀၀ အထက်မှာ ရှိနိုင်တယ်လို့ ခန့်မှန်းကြပါတယ်။​

ရုရှားရဲ့ အမြောက်နည်းဗျူဟာကို တုံ့ပြန်ရေး ကူညီဖို့ ဗြိတိန်အစိုးရက ပံ့ပိုးထားတဲ့ အတွဲလိုက်ပစ်လွှတ်နိုင်တဲ့ ဒုံးကျည်စနစ် (MLRS) အပါအဝင် လက်နက်အသုံးပြုရေး  ဗြိတိန်နိုင်ငံထဲမှာ လေ့ကျင့်နေတဲ့ စစ်သင်တန်းတွေကို ရာချီတဲ့ ယူကရိန်းစစ်သည်တွေ တက်ရောက်လေ့ကျင့်တာ ပြီးဆုံးသွားပါပြီ။

အင်္ဂလန် ဆာလစ်ဘူရီမြို့က လေ့ကျင့်ရေးအတွင်း ယူကရိန်းစစ်သည်တွေက ၁၀၅ မမ သေနတ်တွေကို ကျည်ထည့်ပစ်ခတ်ပုံကို ဒီအပတ်အစောပိုင်းမှာ ရုပ်သံရိုက်ကူးခဲ့ကြပါတယ်။ ဒီသင်တန်းဟာ ယူကရိန်းအပေါ် နိုင်ငံတကာရဲ့ပံ့ပိုးမှု အစိတ်အပိုင်းဖြစ်ပါတယ်။

ဒီနှစ်အစောပိုင်းမှာ ယူကရိန်းကို ကျူးကျော်ခဲ့တဲ့ ရုရှားတပ်တွေကို ပြန်တွန်းလှန်နိုင်ဖို့ အနောက်နိုင်ငံတွေက အဆင့်မြင့်လက်နက်တွေနဲ့ အသုံးပြုနည်းတွေ ယူကရိန်းကို ပံ့ပိုးနေကြပါတယ်။

MLRS ဟာ ခြေရာခံယာဉ်ဖြစ်ပြီး သူတို့ရဲ့ ဒုံးပျံစနစ်တွေက ဘီးတပ်ထားတာကြောင့် ပိုရှောင်လွှဲနိုင်တဲ့အတွက် သူတို့ရဲ့ ရှင်သန်နိုင်မှုမှာ အထောက်အကူဖြစ်စေမယ်လို့ ပါဝင်သင်တန်းပေးသူ တော်ဝင်အမြောက်တပ်က ဗိုလ်ကြီး ဂျိမ်းစ် အိုလီဖန့်က ပြောပါတယ်။

ရုရှားက ရှေ့တန်းအတော်များများမှာ ပိုပြင်းပြင်းထန်ထန် တိုက်ခိုက်လာနေလို့ ကာကွယ်ဖို့ ငွေနဲ့ လက်နက်တွေ ပိုလိုတယ်လို့ ယူကရိန်းသမ္မတ ဗိုလိုဒီမာ ဇလန်းစကီးက နေတိုး စစ်ရေးမဟာမိတ်အဖွဲ့ကို ဇွန် ၂၉ ရက်မှာ ပြောခဲ့ပါတယ်။

ဒီလအစောပိုင်းမှာ ယူကရိန်းမြို့တော် ကိယက်ဗ်ကို အံ့ဩစရာ လာရောက်လည်ပတ်ခဲ့တဲ့ ဗြိတိန်ဝန်ကြီးချုပ် ဘောရစ်ဂျွန်ဆင်က ယူကရိန်းသမ္မတ ဇလန်းစကီးကို ‘သူငယ်ချင်းကောင်း’ အဖြစ် ချီးကျူးပြီး ယူကရိန်းတပ်ဖွဲ့တွေအတွက် ရက်ပေါင်း ၁၂၀ အတွင်း စစ်သား အယောက်တသောင်းအထိ လေ့ကျင့်ပေးနိုင်တဲ့ သီးခြားလေ့ကျင့်ရေးစစ်ဆင်ရေးကို ကြေညာခဲ့ပါတယ်။

ဗြိတိန်သင်တန်းမှူးတွေက ယူကရိန်းသင်တန်းမှူးတွေရဲ့ စိတ်နေသဘောထားကို ချီးကျူးခဲ့ကြပါတယ်။

တပ်မှူးကိုယ်တိုင်က သူ့အယူဝါဒနဲ့ နည်းပရိယာယ်တွေအောက်မှာ သူ့တပ်တွေကို လေ့ကျင့်နေတဲ့ အနေအထားမှာ အခု ရှားရှားပါးပါး ဖြစ်နေပြီလို့လည်း ပြောခဲ့ကြပါတယ်။