ယူကရိန်းနိုင်ငံအရှေ့ပိုင်းရှိ ရုရှားထိန်းချုပ်ထားရာ နယ်မြေက အာဏာပိုင်တွေဟာ ယူကရိန်းရဲ့ အမြောက်နဲ့ပစ်ခတ်မှု ၂ ကြိမ်အတွင်း အရပ်သားစုစုပေါင်း ၇ ဦး သေဆုံးခဲ့တယ်လို့ အတည်ပြုပြောဆိုကြောင်း ရုရှားသတင်းအေဂျင်စီတွေမှာ ဖော်ပြပါတယ်။
ဒွန်ညက်ခ်မြို့က ကားပါကင်တခုကို အမြောက်ထိမှန်ရာက အရပ်သား ၄ ဦး သေဆုံးခဲ့ပြီး နောက်ထပ် ၆ ဦး ထိခိုက်ဒဏ်ရာရရှိခဲ့တယ်လို့ တက်စ်သတင်းအေဂျင်စီက ဖော်ပြခဲ့ပါတယ်။
နောက်ပိုင်းမှာ အာအိုင်အေ သတင်းဌာနကလည်း ဒွန်ညက်ခ်မြို့ရဲ့ အရှေ့မြောက်ဘက် ၇၅ မိုင် အကွာမှာရှိတဲ့ လီဆိုက်ချန့်ခ်မြို့က ဘတ်စ်ကားမှတ်တိုင်တခုမှာ ပေါက်ကွဲမှုကြောင့် လူ ၃ ဦး သေဆုံးခဲ့တယ်လို့ ဖော်ပြထားပါတယ်။
ရိုက်တာသတင်းဌာနအနေနဲ့ကတော့ ဒီသတင်းဖော်ပြချက်တွေအပေါ်မှာ သီးခြား အတည်ပြုနိုင်ခြင်း မရှိသေးပေမဲ့ ပြီးခဲ့တဲ့ ကြာသပတေးနေ့က ဒွန်ညက်ခ်မြို့မှာ ရိုက်ကူးထားတဲ့ ဗီဒီယိုမှတ်တမ်းအရ အဆောက်အအုံတွေနဲ့ ယာဉ်တွေ ပျက်စီးနေတာကိုတော့ တွေ့ရပါတယ်။
ယူကရိန်းကာကွယ်ရေးအရာရှိတွေကို ဒီဖြစ်ရပ်နဲ့ပတ်သက်ပြီး မှတ်ချက်ပေးဖို့ တောင်းဆိုရာမှာ ချက်ချင်းတုံ့ပြန်မှုမရှိသေးပါဘူး။
ရုရှားသြဇာခံတပ်ဖွဲ့တွေဟာ ယူကရိန်းနိုင်ငံပိုင် ဒွန်ညက်ခ်ပြည်နယ်ရဲ့ မြို့တော် ဒွန်ညက်ခ်ကို ၂၀၁၄ ခုနှစ်ကတည်းက ထိန်းချုပ်ထားတာဖြစ်ပြီး ယူကရိန်းနဲ့ ရုရှားအကြား ရှေ့တန်း စစ်မျက်နှာပြင်နဲ့လည်း နီးကပ်နေတာကြောင့် အဲ့ဒီဒေသမှာ ယူကရိန်းတပ်ဖွဲ့တွေရဲ့ ပုံမှန်ပစ်ခတ်မှုရှိနေတာ ဖြစ်ပါတယ်။
