ယူကရိန်းကို ပြန်လည်တည်ဆောက်ရေးဟာ မျိုးဆက်တွေနဲ့ချီပြီး လုပ်ရမယ့်အလုပ် ဖြစ်လိမ့်မယ်လို့ ဂျာမနီအဓိပတိ အောလော့ ရွှိုက်ဇ်က အောက်တိုဘာ ၂၅ ရက်မှာ ပြောလိုက်ပါတယ်။
ရွှိုက်ဇ်က အခု ၉ လကြာနေပြီဖြစ်တဲ့ ယူကရိန်းစစ်ပွဲအပြီး ယူကရိန်းနိုင်ငံ ပြန်လည်တည်ဆောက်ရေးဆိုင်ရာ ကွန်ဖရင့်တခုမှာ ပြောလိုက်တာပါ။
“ပျက်စီးသွားတဲ့ အိမ်တွေ၊ လမ်းတွေကို ပြန်ဆောက်ရမယ်။ စက်မှုလုပ်ငန်းတွေကို ပြုပြင်ရမယ်။ အဲဒါက မျိုးဆက်တွေအတွက် အလုပ်တခုပဲ” လို့ ရွှိုက်ဇ်က ပြောပါတယ်။
ဥရောပကော်မရှင်ဥက္ကဋ္ဌ အာဆူလာ ဗွန်ဒါလေယန်က ယူကရိန်းရဲ့ အီးယူအဖွဲ့ဝင်ဖြစ်ရေး လမ်းကြောင်းကို ခင်းကျင်းဖို့ ပြုပြင်ပြောင်းလဲမှုတွေနဲ့ ပြန်လည်တည်ဆောက်ဖို့ လိုအပ်တဲ့ ရင်းနှီးမြှုပ်နှံမှုတွေကို ချိတ်ဆက်ရေးဟာ ယူကရိန်းရဲ့ အကျိုးစီးပွားအတွက် ဖြစ်တယ်လို့ ပြောပါတယ်။
ယူကရိန်းဝန်ကြီးချုပ် ဒန်းနစ် ရှမစ်ဟယ်က အီးယူအဖွဲ့ဝင်တာဟာ ယူကရိန်းရဲ့ ရည်မှန်းချက်ဖြစ်ပေမဲ့ နိုင်ငံရင်ဆိုင်နေရတဲ့ အတားအဆီးတွေကို ထောက်ပြပြောဆိုခဲ့ပါတယ်။
“အခုနှစ်ထဲမှာ ကျနော်တို့ရဲ့ စီးပွားရေး စုစုပေါင်း ပြည်တွင်းထုတ်ကုန် GDP ရဲ့ ၃၅ ကနေ ၄၅ ရာခိုင်နှုန်းအထိ ဆုံးရှုံးခဲ့ရတယ်။ ရုရှားက သူတို့ရဲ့ အကြမ်းဖက်နည်းဗျူဟာကို ဆက်သဘောပေါက်ပြီး ကျနော်တို့ရဲ့ အခြေခံအဆောက်အအုံ၊ အပူနဲ့ စွမ်းအင်ရင်းမြစ်တွေကို ဖျက်ဆီးခဲ့တယ်” လို့ ရှမစ်ဟယ်က ပြောပါတယ်။
စစ်ပွဲကြောင့် လူထောင်ပေါင်းများစွာ အသက်ဆုံးရှုံးခဲ့ရပြီး လူနေအိမ်တွေ၊ ဆေးရုံတွေ၊ စာသင်ကျောင်းတွေနဲ့ စက်ရုံတွေ ပျက်စီးသွားလို့ စစ်ပွဲကြောင့် ပျက်စီးဆုံးရှုံးမှုတွေကို ပြန်ပြင်ရင် ဒေါ်လာ ၇၅၀ ဘီလီယံ ကုန်ကျမယ်လို့ ယူကရိန်းက ပြောပါတယ်။
ပြန်လည်တည်ဆောက်ရေး ကုန်ကျစရိတ်မှာ ဒေါ်လာ ၃၄၉ ဘီလီယံရှိမယ်လို့ ကမ္ဘာ့ဘဏ်က ခန့်မှန်းထားပါတယ်။
