ရခိုင်ပြည်နယ်၊ ကျောက်တော် အခြေစိုက် စစ်ကောင်စီတပ်ရင်းတခုက တပ်သား ၃၈ ယောက်ဟာ စက်တင်ဘာ ၂၂ ရက် ညပိုင်းမှာ ရက္ခိုင်တပ်တော် (ULA/AA) ဆီမှာ အလင်းဝင်ပူးပေါင်းခဲ့ကြတယ်လို့ AA နဲ့ နီးစပ်သူတွေက ပြောပါတယ်။

“အဲဒီ စစ်ကောင်စီတပ်သားတွေ အလင်းဝင်လာတာတော့ သေချာပါတယ်၊ ၃၈ ယောက်ပါ။ လက်နက်ခဲယမ်းတွေလည်း ပါလာပေမယ့် အရေတွက်တော့ မသိရသေးဘူး။ ဒီကိစ္စကတော့ အထက်လူကြီးတွေ မသိသေးဘဲ သတင်းပေါက်ကြားသွားတော့ AA တပ်ဖွဲ့ဝင်တွေ အဆူခံရတာတွေ ရှိတယ်။” 

ချင်းပြည်နယ် ပလက်ဝမြို့နယ်ထဲက ​စစ်ကောင်စီစစ်ကြောင်းတွေက လက်နက်ခဲယမ်းတွေနဲ့ ပူးပေါင်းလာတဲ့ အရာရှိစစ်သည် ၁၀ ယောက်ထက်မနည်းရှိပြီး တခြားမြို့နယ်တွေမှာလည်း စစ်ကောင်စီဘက်က လက်နက်ခဲယမ်းတွေနဲ့ ပူးပေါင်းလာတာတွေရှိလို့ အရေအတွက်အနေနဲ့ ရာဂဏန်းလောက်ရှိတယ်လို့ ရက္ခိုင်တပ်တော်ရဲ့ ပြောရေးဆိုခွင့်ရှိသူ ဦးခိုင်သုခက ပဥ္စမအကြိမ်မြောက် ULA/AA သတင်းစာရှင်းလင်းပွဲမှာ ပြောဆိုထားပါတယ်။

အဲဒီပူးပေါင်းလာသူတွေဟာ တိုက်ပွဲမဖြစ်ခင် လာရောက်ပူးပေါင်းသူတွေရှိသလို တိုက်ပွဲတွေဖြစ်ပြီးတဲ့နောက်ပိုင်း ရက္ခိုင်တပ်တော် AA ဆီမှာ လာရောက်ပူးပေါင်းသူတွေက ပိုမိုများပြားလာတယ်လို့ ဆိုပါတယ်။

စစ်ကောင်စီဘက်က ထပ်မံအလင်းဝင်ဖို့ ULA/AA ကို ဆက်သွယ်လာသူတွေလည်း အများအပြားရှိနေပြီး ပူပေါင်းလာသူတွေကိုလည်း ကောင်းကောင်းမွန်မွန်စောင့်ရှောက်ပေးထားကာ ထပ်မံပူးပေါင်းလိုတဲ့ စစ်ကောင်စီတပ်သားတွေကို ဖိတ်ခေါ်ထားပါတယ်။

စစ်အာဏာသိမ်းပြီးနောက် စစ်ကောင်စီတပ်ကို အာဏာဖီဆန်ပြီး ပြည်သူ့ရင်ခွင် ခိုလှုံလာတဲ့ စစ် သားနဲ့ ရဲတပ်ဖွဲ့ဝင် အရေအတွက် သောင်းနဲ့ချီရှိနေပြီဖြစ်ပါတယ်။

လက်ရှိမှာတော့ ပြည်သူလူထုကို အကြမ်းဖက်သတ်ဖြတ်နေတဲ့ စစ်ကောင်စီရဲ့ လုပ်ရပ်တွေကို မလိုလား မနှစ်မြို့ကြတဲ့ အရာရှိ၊ စစ်သည်တွေနဲ့ ရဲတပ်သားတွေဟာ သူတို့ရဲ့ ဂုဏ်သိက္ခာ၊ မျိုးဆက်တွေရဲ့ ဂုဏ်သိက္ခာကို ပြန်လည်ရယူဖို့ စစ်အာဏာရှင်ရဲ့ လက်ကိုင်တုတ်အဖြစ်က ရုန်းထွက်ပြီး ပြည်သူ့ဘက် ကူးပြောင်းရပ်တည်လာတာ တဖြည်းဖြည်း များပြားလာနေတာပါ။

တပ်မတော်ကို အလွဲသုံးစားပြုလုပ်နေတဲ့ လက်တဆုပ်စာ စစ်ဗိုလ်ချုပ်တစုရဲ့ လက်ကိုင်တုတ် ခါးပိုက်ဆောင်တပ်အဖြစ်မှ ရုန်းထွက်ပြီး ပြည်သူ့ရင်ခွင် အမြန်ဆုံးခိုဝင်ကြဖို့ တပ်မတော်သားတွေ၊ ရဲတပ်သားတွေကို အမျိုးသားညီညွတ်ရေးအစိုးရ (NUG) က လည်း တိုက်တွန်းနှိုးဆော်ထားပါတယ်။

ဒါ့အပြင် တိုင်းရင်းသား လက်နက်ကိုင်အဖွဲ့တွေဖြစ်ကြတဲ့ ကချင်လွတ်မြောက်ရေး တပ်မတော် (ကေအိုင်အေ)နဲ့ ကရင်အမျိုးသားအစည်းအရုံး (ကေအန်ယူ) တို့လို အဖွဲ့အစည်းတွေကလည်း စစ်အာဏာရှင် ဆန့်ကျင်ကာ ပူးပေါင်းလိုတဲ့ ရှေ့တန်းရောက် မြန်မာ့တပ်မတော်သားတွေ၊ ရဲတပ်သားတွေကို လက်ကမ်းကြိုဆိုနေကြပါတယ်။

ရခိုင်ပြည်လွတ်မြောက်ရေးပါတီ (ALP) က ဗဟိုအလုပ်အမှုဆောင်ကော်မတီဝင် ဒုတိယဗိုလ်မှူးကြီး ခိုင်ပေါ်လင်းနဲ့ သားဖြစ်သူ အဋ္ဌမတန်းကျောင်းသား မောင်စိုးမင်းနိုင်တို့ကို ရက္ခိုင်တပ်တော် (ULA/AA) တပ်က ဩဂုတ် ၂ ရက် ညနေ ၆ နာရီလောက် စစ်တွေမြို့ရှိ နေအိမ်ကနေ ဖမ်းဆီးသွားတယ်လို့ ALP က ထုတ်ပြန်ထားပါတယ်။

အခုလိုဖမ်းဆီးတာဟာ ရခိုင်အမျိုးသားစည်းလုံးညီညွတ်ရေးကို ထိပါးစေပြီး ရခိုင့်တော်လှန်ရေးအဖွဲ့ အချင်းချင်းကြားမှာ လုံးဝမဖြစ်သင့်တဲ့ ဖြစ်ရပ်လို့ ရှုမြင်ကြောင်း၊ ရက္ခိုင်တပ်တော်က ဖမ်းဆီးထားတဲ့ ALP ပါတီက ခေါင်းဆောင်တချို့နဲ့ ပါတီဝင်ရဲဘော်တချို့ကို ဒီနေ့အချိန်ထိ ပြန်မလွှတ်ပေးသေးကြောင်း ထုတ်ပြန်ချက်မှာ ဖော်ပြထားပါတယ်။

ရခိုင်ပြည်လွတ်မြောက်ရေးပါတီ (ALP/ALA) နဲ့ ရက္ခိုင်အမျိုးသားအဖွဲ့ချုပ် (ULA/AA) တို့မှာ လူမျိုးတမျိုးတည်းဖြစ်ပြီး ပန်းတိုင်တခုတည်းကို ချီတက်နေကြတဲ့ အဖွဲ့အစည်းတွေဖြစ်ကြောင်း၊ လက်ရှိ နိုင်ငံရေးအကျပ်အတည်းကာလမှာ ရခိုင့်တော်လှန်ရေးအဖွဲ့အစည်း အချင်းချင်းကြား အခုလို ဖြစ်ပေါ်နေတာဟာ တိုင်းရင်းသားမဟာမိတ်တွေနဲ့ နိုင်ငံတကာ အသိုက်အဝန်းအကြားမှာ ရခိုင့်လူမျိုးတွေရဲ့ ဂုဏ်သိက္ခာကို ကျဆင်းစေတယ်လို့ ဆိုထားပါတယ်။

ဒါကြောင့် အမျိုးသားညီညွတ်ရေးကို ပျက်ပြားစေမယ့် မလိုလားအပ်တဲ့ လုပ်ဆောင်ချက်တွေကို ရှောင်လွှဲကြဖို့နဲ့ ဒုတိယဗိုလ်မှူးကြီး ခိုင်ပေါ်လင်း၊ အဋ္ဌမတန်းကျောင်းသား မောင်စိုးမင်းနိုင် အပါအဝင် အရင်က ဖမ်းဆီးခံထားရတဲ့ ပါတီခေါင်းဆောင်တွေနဲ့ ပါတီဝင်ရဲဘော်တွေကို ပြန်လွှတ်ပေးဖို့ အလေးအနက် တောင်းဆိုတယ်လို့ ထုတ်ပြန်ချက်မှာ ဖော်ပြထားပါတယ်။

ပြီးခဲ့တဲ့ ၂၀၂၀ ခုနှစ် ဩဂုတ်လအတွင်းက ပုဏ္ဏားကျွန်းမြို့နယ်အတွင်းမှာ ရခိုင်ပြည်လွတ်မြောက်ရေးပါတီက တွဲဖက်အတွင်းရေးမှူး ခိုင်အောင်စိုးသန်းနဲ့ ခိုင်မျိုးဇံ အပါအဝင် ဆေးတပ်သား ၃ ဦးကို အေအေက ဖမ်းဆီးခဲ့ပြီး ဆယ်ရက်ကျော်ကြာမှ ပြန်လည် လွှတ်ပေးခဲ့ပါတယ်။

ရခိုင်ပြည်လွတ်မြောက်ရေးပါတီ (ALP) ကို ကရင်အမျိုးသားအစည်းအရုံး (KNU) ရဲ့ အကူအညီနဲ့ ၁၉၆၈ ခုနှစ် နိုဝင်ဘာလမှာ စတင်ဖွဲ့စည်းခဲ့ပြီး တနိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) မှာ လက်မှတ်ရေးထိုးတဲ့ တိုင်းရင်းသား လက်နက်ကိုင် အဖွဲ့အစည်းတခုလည်း ဖြစ်ပါတယ်။

ALP ဟာ အာဏာသိမ်းစစ်ကောင်စီက ဖိတ်ခေါ်တဲ့ ငြိမ်းချမ်းရေးဆွေးနွေးပွဲကို တက်ရောက်ခဲ့တဲ့အပေါ်လည်း ရက္ခိုင်ပြည်ကျောင်းသားသမဂ္ဂ အပါအဝင် အရပ်ဘက်အဖွဲ့အစည်း ၂၉ ခုက ကန့်ကွက်မှုတွေ ရှိခဲ့ကြပါတယ်။