ဟောလိဝုဒ်သရုပ်ဆောင်တွေ ပိုင်ဆိုင်ထားတဲ့ ရက်စ်ဟမ်းအသင်းဟာ ဧပြီ ၂၂ရက်၊ စနေနေ့က ဘော်ရမ်ဝုဒ် အသင်းကို ၃ ဂိုး ၁ဂိုးနဲ့ အနိုင်ရရှိခဲ့ပြီးနောက် တရားဝင်ဘောလုံးလိဂ်တခုကို ၁၅ နှစ် အကြာမှာ ပြန်လည် တက်လှမ်းလာနိုင်ခဲ့ပြီ ဖြစ်ပါတယ်။
ဟောလိဝုဒ်သရုပ်ဆောင်တွေဖြစ်ကြတဲ့ ရိုင်ယန် ရေးနိုးလ်စ် နဲ့ ရော့ဘ် မက်ကယ်ဟန်နီ တို့ရဲ့ ဝေးလ်ကလပ်အသင်းကို ပရိသတ်အများအပြားက စောင့်ကြည့်နေခဲ့ကြတာပါ။
ရက်စ်ဟမ်းအသင်းဟာ ပွဲစဉ်အစ ၁ မိနစ်မှာတင် အဖွင့်ဂိုးပေးလိုက်ရပေမယ့်လည်း နောက်ပိုင်းမှာ ၃ ဂိုးဆက်တိုက် သွင်းယူနိုင်ခဲ့တာကြောင့် အင်္ဂလန်နိုင်ငံရဲ့ အနိမ့်ဆုံးဘောလုံးပြိုင်ပွဲဖြစ်တဲ့ နေရှင်းလိဂ် ချန်ပီယံဆုကို ရယူနိုင်ခဲ့ပြီး နောက်တဆင့်ဖြစ်တဲ့ လိဂ်တူးကိုပါ တက်ရောက် နိုင်ခဲ့ပါတယ်။
တဖက်မှာလည်း အမှတ်ပေးဇယား ရပ်တည်မှုအတွင်း ဒုတိယနေရာက နော့တ်ကောင်တီ အသင်းဟာ မိတ်စတုန်း အသင်းကို ၅ ဂိုး ၂ ဂိုးနဲ့ ဂိုးပြတ် အနိုင်ရရှိခဲ့ပေမယ့် ရက်စ်ဟမ်း အသင်းကသာ ချန်ပီယံဆုကို သိမ်းပိုက်နိုင်ခဲ့ပါတယ်။
ဒီရာသီမှာ ရက်စ်ဟမ်း အသင်းဟာ ရမှတ်ပေါင်း ၁၁၀ နဲ့အတူ ဇယားထိပ်ဆုံးမှာ ရပ်တည်နိုင်ခဲ့ပြီး နော့တ်ကောင်တီအသင်းကတော့ ရမှတ်ပေါင်း ၁၀၆ မှတ်နဲ့အတူ ၄ မှတ်အကွာမှာ ကပ်လျက်ရှိနေခဲ့ပါတယ်။
"Deadpool" မင်းသားလို့ လူသိများတဲ့ ရေးနိုးလ်စ်ဟာ နောက်ထပ် အမေရိကန် သရုပ်ဆောင် တဦးနဲ့အတူ ရက်စ်ဟမ်းအသင်းကို ၂၀၂၀ ခုနှစ်၊ နိုဝင်ဘာလမှာ အပြီး သတ်ဝယ်ယူခဲ့တာပါ။
သူတို့ ၂ ဦး စတင်ဝယ်ယူချိန်ကတည်းက အားလုံးသော အသင်းပရိသတ်တွေရဲ့ ထောက်ခံ အားပေးမှုကိုပါ ရရှိခဲ့ကြောင်း သိရပါတယ်။
ဟောလိဝုဒ်သရုပ်ဆောင်တွေဖြစ်ကြတဲ့ ရိုင်ယန်ရေးနိုးလ်နဲ့ ရော့ဘ် မက်ကယ်ဟန်နီ တို့ ပိုင်ဆိုင်တဲ့ ရက်စ်ဟမ်း (Wrexham)အသင်းဟာ ဧပြီ ၂၁ ရက်မှာ တရားဝင်ဘောလုံးလိဂ်တစ်ခုကို အလိုအလျောက် တက်လှမ်းနိုင်ဖို့ မျှော်လင့်နိုင်ပြီ ဖြစ်ပါတယ်။
အင်္ဂလန်နိုင်ငံရဲ့ အနိမ့်ဆုံးဘောလုံးလိဂ်မှာ ယှဉ်ပြိုင်ကစားနေတဲ့ ဝေးလ်မြောက်ပိုင်းအသင်းဟာ ဒုတိယနေရာက နော့တ်ကောင်တီအသင်းကို ၄ မှတ်ဖြတ်ကာ ဇယားထိပ်ဆုံးမှာ ရပ်တည် နေတာဖြစ်ပြီး လက်ကျန်ပွဲစဉ်ကလည်း ၂ ပွဲသာ ကျန်ရှိတော့ပါတယ်။
ဒါကြောင့် ရက်စ်ဟမ်းအသင်းဟာ ချန်ပီယံဆုရယူနိုင်ဖို့ အခြေအနေကောင်းနေသလို ၂၀၀၈ ခုနှစ် နောက်ပိုင်း ပထမဆုံးအကြိမ်အဖြစ် တရားဝင်ဘောလုံးလိဂ်တစ်ခုကိုပါ တက်လှမ်းနိုင်တော့မှာ ဖြစ်ပါတယ်။
"Deadpool" မင်းသားဆိုပြီး လူသိများတဲ့ ရေးနိုးလ် နဲ့ "It's Always Sunny in Philadelphia" အမည်ရ ဟာသဇာတ်လမ်းတွဲမှာ ဖန်တီးသူလည်းဖြစ်၊ သရုပ်ဆောင်လည်း ဖြစ်တဲ့ မက်ကယ်ဟန်နီတို့က ရက်စ်ဟမ်းအသင်းကို ၂၀၂၁ ခုနှစ်အတွင်း အပြီးသတ်ဝယ်ယူခဲ့တာပါ။
အင်္ဂလန်နိုင်ငံက ထိပ်တန်းလိဂ်တွေအထိ တက်လှမ်းနိုင်အောင် အသင်းအနေနဲ့ ဦးတည်ထားတယ် လို့လည်း ဒီနာမည်ကြီး သရုပ်ဆောင်တွေက ပြောပါတယ်။
ဒီဟောလိဝုဒ်သရုပ်ဆောင်တွေဟာ ပွဲကြည့်စင်ပေါ်ကနေ အသင်းကို တောက်လျှောက် အားပေးလာခဲ့တာ တွေ့ရသလို မန်စီးတီးအသင်းနဲ့ နယူးကာဆယ်အသင်းတို့ကို ပိုင်ဆိုင်ထားတဲ့ ဘီလီယံနာပိုင်ရှင်တွေနဲ့လည်း အတော်ကွာခြားတယ်လို့ ဆိုကြပါတယ်။
ဒါ့အပြင် ရက်စ်ဟမ်းအသင်းရဲ့ ကံကြမ္မာ အလှည့်အပြောင်းနဲ့အတူ အသင်းပိုင်ရှင်တွေရဲ့ ကြိုးစား အားထုတ်မှုအပေါ် အခြေခံကာ "Welcome to Wrexham" မှတ်တမ်းရုပ်ရှင်စီးရီးအဖြစ် ဒစ်စနေးရုပ်သံ ပလက်ဖောင်းမှာ ဗြိတိန်နိုင်ငံအတွင်းပြသဖို့ စီစဉ်နေတယ်လို့လည်း သိရပါတယ်။
