စစ်ကိုင်းတိုင်း၊ အင်းတော်မြို့နယ်မှာ တိုက်ပွဲပြင်းထန်နေလို့ ဩဂုတ် ၂၀ ရက် ညပိုင်းက စပြီး အင်းတော်-ကျောင်းကုန်းလမ်းပိုင်းကို ရက်အကန့်အသတ်မရှိ ယာယီပိတ်ထားလိုက်တယ်လို့ Indaw Revolution-IR အဖွဲ့က ထုတ်ပြန်ပါတယ်။

IR အဖွဲ့တာဝန်ရှိသူ တဦးက "တိုက်ပွဲအတွင်း ရောက်လာလို့ သေဆုံးခဲ့ရတဲ့ ခရီးသွားတွေ ရှိခဲ့ဖူးပါတယ်။ ခရီးသွားတွေ အန္တရာယ်ကင်းဖို့ သတိပေးချက်တွေ ထုတ်ပြန်နေရတာကို နားလည်ပေးကြပါ"လို့ ပြောပါတယ်။

ကုန်တင်ကား၊ ခရီးသည်ကား၊ သုံးဘီးအပါအဝင် ဘယ်ကား မဆို လုံးဝ ဖြတ်သန်းသွားလာတာ မပြုလုပ်ဖို့ ထုတ်ပြန်ချက်မှာ သတိပေး ထားပါတယ်။

တိုက်ပွဲနဲ့ နီးစပ်သူက "တိုက်ပွဲက မနက်တည်းက ဖြစ်နေတာ။ တိုက်ပွဲအခြေအနေက ပြောလို့ မရသေးဘူး။ နှစ်ဖက် ထိခိုက်အကျအဆုံး‌ ရှိတယ်။ ညပိုင်းအထိ အခြေအနေက တင်းမာ နေတုန်း"လို့ ဆိုပါတယ် ။

ဗန်းမောက်လမ်းပိုင်းကိုလည်း ဆက်လက်ပိတ်ထားဆဲဖြစ်ပြီး လမ်းဖွင်လို့ အသုံးပြုနိုင်ပါက ပြန်ကြေညာမှာဖြစ်ပြီး အင်တာနက် လိုင်းရတဲ့သူတွေက အသိပေး လက်ဆင့်ကမ်းပြောပေးဖို့ IR အဖွဲ့က တောင်းဆိုထားပါတယ်။

မကွေးတိုင်း၊ ဂန့်ဂေါမြို့နယ်က ဂန့်ဂေါ-ကလေးကားလမ်းကို ရက်အကန့်အသတ်မရှိ ပိတ်ထားလိုက်တယ်လို့ ဂန့်ဂေါမြို့နယ်ပြည်သူ့အုပ်ချုပ်ရေးအဖွဲ့နဲ့ ယောဒေသပြည်သူ့ကာကွယ်ရေး တပ်ဖွဲ့ (YDF) တို့က ဒီဇင်ဘာ ၁၉ ရက်နေ့မှာ ကြေညာချက် အသီးသီးထုတ်ပြန်ခဲ့ပါတယ်။

ယောဒေသပြည်သူ့ကာကွယ်ရေးတပ်ဖွဲ့ (YDF) တာဝန်ခံက “ယောဒေသအတွင်းမှာ အကြမ်းဖက်စစ်တပ်က အရပ်သားအပြစ်မဲ့ ပြည်သူတွေကို ရဟတ်ယာဉ်တွေအသုံးပြုပြီး အကြောင်းမဲ့ ပစ်ခတ်တိုက်ခိုက်ပြီးတော့ လူသားမဆန်တဲ့စစ်ရာဇဝတ်မှုတွေ ကျူးလွန်နေတဲ့အတွက် အခုလို ဂန့်ဂေါ-ကလေးကားလမ်းကို ရက်အကန့်အသတ်မရှိ ပိတ်ပင်ထားလိုက်တာဖြစ်ပါတယ်။ လမ်းပြန်ဖွင့်ပေးမယ့်ရက်ကိုတော့ စာထုတ်ပြီး ပြန်လည်ကြေညာပေးမှာပါ” လို့ အတည်ပြုပြောပါတယ်။

ဂန့်ဂေါမြို့နယ်၊ နှမ်းခါးကျေးရွာထဲကို စစ်ကောင်စီတပ်တွေဟာ ဒီဇင်ဘာ ၁၇ ရက်နေ့၊ မွန်းလွဲ ၂ နာရီးဝန်းကျင်က ရဟတ်ယာဉ်တွေသုံးပြီး ဝေဟင်ကနေစက်သေနတ်တွေနဲ့ အဆက်မပြတ်ပစ်ခတ်လို့ ဒေသခံပြည်သူတွေ သေဆုံး၊ ဒဏ်ရာရရှိတာတွေများပြားတယ်လို့ ဒေသခံတွေက  ပြောပါတယ်။

“စစ်သားတွေက ရွာအဝင်အထွက်ပေါက်တွေကိုလည်း ပိတ်ထားတယ်။ ရွာထဲမှာလည်း တပ်စွဲထားတယ်။ ရဟတ်ယာဉ်တွေနဲ့ပစ်လို့ သေဆုံးသူတွေကိုလည်း အလောင်းမကောက်နိုင်သေးဘူး။ အရေအတွက်ကတော့ အတိအကျမသိဘူး များမယ်ထင်တယ်။ စစ်သားတွေက ရွာကလူနေအိမ်တွေကိုလည်း မီးရှို့နေတယ်” လို့ ထွက်ပြေးလာတဲ့ ဒေသခံတဦးက ပြောပါတယ်။

နှမ်းခါးကျေးရွာအတွင်း စစ်ကောင်စီတပ်သားတွေနဲ့ ပျူစောထီးအဖွဲ့ဝင်တွေ တပ်စွဲထားကာ ဒေသခံကျေးရွာသားတွေကို ဖမ်းဆီးထားပြီး လူသားဒိုင်းသဖွယ်ပြုလုပ်နေသလို ဒေသခံတွေ ပိုင်ဆိုင်တဲ့ ပစ္စည်းတွေကိုလည်း ဖောကားကြီးတွေနဲ့တင်ကာ ယူဆောင်သွားကြတယ်လို့ ထွက်ပြေးလာတဲ့ဒေသခံတွေက ပြောပါတယ်။