ဧရာ၀တီတိုင်း၊ ငပုတောမြို့နယ်၊ ဟိုင်းကြီးကျွန်းမြို့မှာ စစ်ကောင်စီက ရခိုင်တိုင်းရင်းသား ဒေသခံ ၃၀ ကျော်ကို ရက္ခိုင့်တပ်တော်(AA) နဲ့ ပတ်သက်တယ်လို့ စွပ်စွဲကာ  ဧပြီ ၁၉ ရက်ကတည်းက ဖမ်းဆီးသွားပြီး ဟိုင်းကြီးရေတပ်စခန်းထဲမှာ စစ်ကြောနှိပ်စက်နေတယ်လို့ ဒေသခံတွေက ပြောပါတယ်။

ဖမ်းဆီးခံရသူတွေဟာ ငါးပြေမကျေးရွာအုပ်စု၊ ကညင်ချောင်းကျေးရွာ၊ အဏ္ဏဝါကျေးရွာနဲ့ ဇီးဖြူချောင်းရွာနဲ့ ကျွန်းတဘက်ကမ်းက ရခိုင်တိုင်းရင်းသားတွေဖြစ်ပြီး အများစုက လူငယ်လူရွယ်တွေ ဖြစ်ပါတယ်။

ဒေသခံတဦးက “ဒေသခံလူငယ်တွေကို အေအေက စစ်သင်တန်းပေးနေတယ်ဆိုပြီး စစ်တပ်နဲ့ ရဲက ပိုက်စိပ်တိုက်ဖမ်းနေတာ နေ့တိုင်းလိုလိုဖမ်းနေတာ တပတ်တည်းကို အဖမ်းခံရတာ ၃၀ ကျော်ရှိပြီ” ပြောပါတယ်။

အေအေထံမှာ စစ်သင်တန်းတက်ခဲ့တယ်ဆိုတဲ့ စွပ်စွဲချက်နဲ့ စစ်ကောင်စီတပ်သားတွေနဲ့ ရဲတွေ ဖမ်းဆီးသွားတဲ့ ရခိုင်လူငယ်တွေကို သီတင်း ၂ ပတ်ကျော်ကြာတဲ့အချိန်ထိ မိသားစုနဲ့ တွေ့ခွင့်မပေးဘဲ ဟိုင်းကြီးကျွန်းရှိ ရေတပ်စခန်းထဲမှာ စစ်ကြော နှိပ်စက်နေတယ်လို့ ဒေသခံတွေက ဆိုပါတယ်။

စစ်ကောင်စီတပ်သားတွေက ကျေးရွာတွေကို ဝင်ရောက်ဖမ်းဆီးတဲ့အခါ ရေလုပ်ငန်း လုပ်ကိုင်နေတဲ့ ဒေသခံအမျိုးသားအများစု ဖမ်းဆီးခံရလေ့ရှိတယ်လို့ ဒေသခံတွေက ပြောပါတယ်။

ရခိုင်ပြည်နယ် မောင်​တောမြို့နယ်မှာ ပြီးခဲ့တဲ့ရက်ပိုင်းက ရက္ခိုင့်တပ်တော် (အေအေ) စစ်သင်တန်းတက်ဖို့သွားစဉ် ဖမ်းဆီးခံရတဲ့ ရခိုင်လူငယ် ၃၁ ဦးကို စစ်ကောင်စီက ပြန်လွှတ်ပေးခဲ့ပေမယ့် ဒေသခံ  ကားသမား ၄ ဦးအား ဒီနေ့အထိ ဆက်လက် ဖမ်းဆီးထားတယ်လို့ မိသားစုဝင်တွေဆီက သိရပါတယ်။

မောင်တောမြို့နယ်မြောက်ပိုင်း ရန်အောင်ပြင်ကျေးရွာက ဖမ်းဆီးခံကားသမားတဦးရဲ့ ဖခင် ဦးဘညွန့်က "ဒီနေ့အထိမလွတ်သေးဘူး။ ကျနော်တို့ သွားတွေ့ကြတယ်။ လူတွေကိုတော့ မြင်ရပြတယ်။ စကားပြောခွင့်မပေးဘူး။ ကားသမားတွေဆိုတာ ကားငှားလာ ရင် အငှားလိုက်ရမှာ ပဲလေ၊ ဘာအပြစ်ရှိလို့ အခုလိုမလွှတ်တာလဲဆိုတာ မေးခွန်းထုတ်ချင်တယ်" လို့ ပြောဆိုပါတယ်။

ဖမ်းဆီးခံထားရတဲ့ ကားသမား ၄ ဦးကတော့ မောင်တောမြို့နယ်မြောက်ပိုင်း မင်္ဂလာညွန့်ကျေးရွာက ကိုစိုးဝင်းနိုင်၊ ကိုကျော်နိုင်ဝင်း၊ ကိုစိုမင်းနိုင်နဲ့ ရန်အောင်ပြင်​ကျေးရွာက ကိုသန်းဇော် ၂၂ နှစ်တို့ ဖြစ်​ကြပါတယ်။

ဖမ်းဆီးခံရထားရတဲ့ ကားဒရိုင်ဘာ ကိုစိုးဝင်းနိုင်ရဲ့ ဇနီးဖြစ်သူ မစပယ်က “ကြိမ်ချောင်းရဲစခန်းက ကားလိုင်စင်တောင်းလို့ ဒီနေ့ကားလိုင်စင်ကို သွားပေးပါတယ်။ ပထမ မိတ္တူပေးတယ်။ မိတ္တူနဲ့ မရဘူးဆိုလို့ မူရင်းကိုပေးထားခဲ့တယ်။ ဘာမှတော့မပြောဘူး။ လူတွေကိုတော့ မြင်ခဲ့ရပါတယ်။ စကားပြောခွင့်မရခဲ့ပါဘူး” လို့ ဒီဗွီဘီကို ပြောပါတယ်။

အဆိုပါကားသမား ၄ ဦးအား ကြိမ်ချောင်းကျေးရွာ ရဲစခန်းမှာ ထိန်းသိမ်းထားတာလို့ သိရပါတယ်။

အဆိုပါကားသမား ၄ ဦးဟာ ပြီးခဲ့တဲ့ ဇန်နဝါရီ ၂၈ ရက်​နေ့က အေအေနယ်မြေမှာ စစ်သင်တန်းတက်ရောက်ဖို့ သွားရောက်တဲ့ ရခိုင်လူငယ် ၃၁ ဦးနဲ့အတူ မောင်တောမြို့နယ်ကြိမ်​ချောင်း (၂၄) စစ်​ဆေး​ရေးဂိတ်မှာ ဖမ်းဆီးခံခဲ့ကြရတာပါ။

ဖမ်းဆီးခံလူငယ် ၃၁ ဦးကို ဇန်နဝါရီ ၃၁ ရက်နဲ့ ဖေဖော်ဝါရီ ၁ ရက်နေ့တွေမှာ စစ်ကောင်စီက မိဘအုပ်ထိန်းသူတွေဆီ ဆက်သွယ်အပ်နှံခဲ့ကြပေမယ့် ကားသမား ၄ ဦးနဲ့ ကား ၂ စီးကိုတော့ ဒီနေ့အထိ ပြန်မလွှတ်သေးတာပါ။