အသက် ၆၆ နှစ်အရွယ် တင်းနစ်အကျော်အမော်ဟောင်း မာတီနာ နာဗရာတီလိုဗာဟာ ၂၀၂၂ ခု နှောင်းပိုင်းက ရင်သားကင်ဆာနဲ့ လည်ချောင်းကင်ဆာရှိနေကြောင်း စစ်ဆေးတွေ့ရှိခဲ့ပြီး မတ်လ ၂၀ ရက်မှာတော့ သူဟာ ကင်ဆာရောဂါ နှစ်ခုလုံးကို ပျောက်ကင်းအောင် ကုသနိုင်ခဲ့ပြီလို့ ကြေညာခဲ့ပါတယ်။
“ကင်ဆာနှစ်ခုလုံး တပြိုင်တည်း ကျော်လွှားနိုင်ခဲ့တာ ကျမရဲ့ ကြီးကျယ်ခမ်းနားတဲ့ အောင်မြင်မှုပဲ။ နယူးယော့ခ်က တနေရာတည်းမှာပဲ ကင်ဆာကို ဖြတ်ကျော်နိုင်ခဲ့တဲ့ ခရစ်အဲဗက်ရဲ့ ခြေရာကို လိုက်ခဲ့တာပါ” လို့ မာတီနာက ပြောပါတယ်။
သူဟာ ပီးယားမော်ဂန်နဲ့ အင်တာဗျူးမှာ သတင်းကောင်းကို ထုတ်ဖော်ပြောကြားခဲ့ပြီး လာမယ့် ခရစ္စမတ်ကို မကြုံတွေ့ရတော့မှာကို စိုးရိမ်ခဲ့ပြီး ရောဂါကို အောင်နိုင်တာဟာ အခက်ခဲဆုံးအရာလို့ ဆိုပါတယ်။
တင်းနစ်မယ်က “လာမယ့် ခရစ္စမတ်ကို မတွေ့ရတော့ဘူးလို့ တွေးပြီး သုံးရက်လုံး ထိတ်လန့်ခဲ့ရတယ်။ စမ်းသပ်မှုတွေလုပ်ပြီးတော့ ရင်သားနဲ့ လည်ချောင်း ကင်ဆာလို့ သိရတယ်။ ငါသေသွားနိုင်တယ်။ ဒါပေမဲ့ ကုသလို့ရတယ်” လို့ ပြောပါတယ်။
လည်ချောင်းကင်ဆာရဲ့ အစားစားချင်စိတ် ပျောက်ဆုံးတာက သူ့ကို စိန်ခေါ်နေတဲ့အရာ ဖြစ်တယ်လို့လည်း ဆိုပါတယ်။
“ကျမက အစားစားရတာ ကြိုက်တယ်။ အစားစားရတာက ဒီကုသမှုတခုလုံးရဲ့ အခက်ခဲဆုံး အစိတ်အပိုင်းတခုပဲ။ ဖြစ်ချင်တာကြောင့်မဟုတ်ဘဲ ခန္ဓာကိုယ်ထဲမှာ အစာလုံလောက်အောင် မရတာကြောင့် ၁၅ ပေါင် ကျသွားတယ်။ ဓာတ်ရောင်ခြည်ကုသမှုကြောင့် လည်ပင်းနဲ့ ပါးစပ်က ကြီးလာတယ်။ သမ်းလို့တောင်မရဘူး” လို့ မာတီနာက ပြောပါတယ်။
ကင်ဆာရောဂါ ခံစားရတာကြောင့် ကလေးမွေးစားဖို့ အစီအစဉ်ကို ယာယီရပ်ဆိုင်းခဲ့ရပြီး မသေခင် လုပ်ချင်တဲ့အရာတွေကို စာရင်းလုပ်ထားတာ ပုံးတပုံးစာတောင် ရှိတယ်လို့လည်း ဆိုပါတယ်။
ဆယ်စုနှစ်လေးခုကြာ ဖြတ်သန်းခဲ့တဲ့ ကမ္ဘာ့တင်းနစ်လောကမှာ အဓိကဆုဖလားပေါင်း ၅၉ ခု ရရှိခဲ့တဲ့ တင်းနစ်ကစားသမား မာတီနာဟာ ၂၀၂၃ ခုနှစ် အစပိုင်းမှာ ကင်ဆာရောဂါ ခံစားနေရကြောင်း လူသိရှင်ကြား ကြေညာခဲ့တာ ဖြစ်ပါတယ်။
