ရန်ကုန်ကားဝယ်ရောင်းဈေးကွက်မှာ ငွေကြေးပိုလျှံတဲ့သူတွေက လာရောက်ကစားနေတဲ့အတွက် ကားဈေးတွေဟာ အရင်ကထက် နှစ်ဆနီးပါး မြင့်တက်သွားပြီး အရောင်းအဝယ်လည်း သွက်နေတယ်လို့ ဝယ်ရောင်းလုပ်ကိုင်နေသူတွေက ပြောပါတယ်။
ပြည်တွင်းမှာ နိုင်ငံခြားငွေကြေး အမေရိကန်ဒေါ်လာ လိုအပ်ချက် ရှိနေတာကြောင့် ပြည်ပကနေ ကားတင်သွင်းခွင့်ကို ပြီးခဲ့တဲ့နှစ် စက်တင်ဘာလကစပြီး စစ်ကောင်စီက ပါမစ်ထုတ်မပေးတော့ဘဲ ရပ်ဆိုင်းပြီးတဲ့နောက် ရန်ကုန်ကားဝယ်ရောင်းဈေးကွက်မှာ ကားဈေးတွေဟာ မြင့်တက်လာခဲ့တယ် ဆိုပေမဲ့ ရာခိုင်နှုန်းနဲ့သာ မြင့်တက်ခဲ့တာပါ။ ဒါပေမဲ့ အခုလို အဆနဲ့ချီပြီး ဈေးမြင့်တက်တာမျိုး မရှိခဲ့ပါဘူး။
လက်ရှိဖြစ်ပေါ်နေတဲ့ ရန်ကုန်ကားဈေးကွက် အခြေအနေနဲ့ ပတ်သက်ပြီး တနိုင်တပိုင် ကားဝယ်ရောင်းလုပ်ကိုင်နေသူတေယာက်က “အခုဟာက ရွှေသမားကပါ လာကစားတဲ့ပုံစံ ဖြစ်နေတယ်နော်။ ဘာလို့လဲဆို အခု လာဝယ်ကြတဲ့သူတွေဆိုရင် တချို့က အပြင်ကလူတွေဗျ။ သူတို့က လူလွှတ်ပြီး လာဝယ်ကြတာ။ ဘယ်နှစ်စီးရမလဲ၊ ရသလောက်ယူမယ်ဆိုပြီး လာကြတာ။ ပေါက်ဈေးတွေ ဘာတွေ မသိဘူး။ သူတို့က ဝယ်ပြီးတာနဲ့ ခြံထဲ အကုန်မောင်းသွင်း အဲ့လိုလုပ်နေကြတာ။ အဲ့တော့ ကိုယ်တွေလို တပိုင်တနိုင်သမားတွေ အကုန်ဒုက္ခရောက်ကုန်တာပေါ့။ ဆိုလိုတာက ဒီလောကထဲမှာ ပုံမှန်လုပ်စားနေတဲ့သူတွေ အကုန် ခွကြကုန်တာပေါ့ဗျာ။ အခုဟာ သူတို့က ဈေးကွက်ကို လက်ဝါးကြီးအုပ်ပြီး ကစားနေတာလေ။ ပြီးရင်တော့ သူတို့က လှည့်ထွက်သွားကြမှာ။ ပုံမှန် ဝယ်ရောင်းလုပ်နေတဲ့ သူတွေကတော့ အကုန်လုံး ကမောက်ကမဖြစ်ပြီး ကျန်ခဲ့ကြမှာပဲ။ အဲ့လိုမျိုးတွေ ဖြစ်နေတယ်” လို့ ဒီဗွီဘီကို ပြောပါတယ်။
ကားဈေးနှုန်းတွေ အခုလို အဆမတန် ဖြစ်ပေါ်နေတာဟာ ဝယ်ရောင်းဈေးကွက်အတွက် ကောင်းတဲ့လက္ခဏာမဟုတ်လို့ တည်ငြိမ်တဲ့ဈေးကွက်ကိုသာ အလိုရှိတယ်လို့ ကားဝယ်ရောင်းသမားတွေက ဆိုပါတယ်။
“အခုလို ဈေးတက်နေတဲ့ အနေအထားက ကောင်းတဲ့လက္ခဏာမှ မဟုတ်တာ။ ဘယ်လိုလုပ် ကောင်းနိုင်မှာလဲ။ ကောင်းဖို့လက္ခဏာ အလားအလာ လုံးဝမရှိဘူး။ ကျနော်တို့လည်း မကြိုက်ဘူး။ အရမ်းဆိုးတယ် ဒီအနေအထားက။ ကျနော်တို့က ဈေးကွက် တည်တည်ငြိမ်ငြိမ် ရှိတာကိုပဲ ကြိုက်တာ။ ပုံမှန်လေး ရောင်း၊ ပုံမှန်လေး ဝယ်တာကိုပဲ ကြိုက်တာ။ အကျိုးအမြတ် ကိုလည်း ပုံမှန်လေးရနေရင် ကျနော်တို့က ကျေနပ်တယ်။ ဒါကြီးက အကျိုးအမြတ်မှ မဟုတ်တာ။ တကယ်ဖြစ်လာပြီဆိုရင် သွားမှာ အကုန်လုံးက။ လုံးဝ မဖြစ်နိုင်တဲ့ ဈေးတွေလေ အခုဟာက။ တကယ့်ကို ကမောက်ကမ ဖြစ်နေတဲ့ အခြေအနေပါ။”
တဖက်မှာလည်း ကားဈေး အတက်အကျဟာ ပေါ်လစီနဲ့သာ တိုက်ရိုက် သက်ဆိုင်နေတာကြောင့် ပေါ်လစီ မပြောင်းသရွေ့ ကားဈေးတွေဟာ ကျလာဖို့မရှိတဲ့ အခြေအနေပါ။
ကားအရောင်းစင်တာ ဖွင့်လှစ်ထားတဲ့ လုပ်ငန်းရှင်တေယာက်ကတော့ “အဓိကက ငွေတန်ဖိုး ကျတာကိုပဲ ပြောရမှာပေါ့။ ကားတန်ဖိုးတက်လာတာ မဟုတ်ဘူး။ နောက်ပြီး ကားဈေးက ရွှေဈေး၊ ဒေါ်လာဈေးနဲ့လည်း မတူဘူး။ သူက ပေါ်လစီနဲ့ပဲ ဆိုင်တယ်။ သိတယ် မဟုတ်လား။ ပေါ်လစီ တချက်ပြောင်းလိုက်တာနဲ့ ဒီကောင်က လုံးဝ ထိုးကျသွားမှာပဲ။ ပေါ်လစီ မပြောင်းမချင်းကတော့ သူက ရွှေဈေး၊ ဒေါ်လာဈေးတက် ပိုတက်နေမှာ။ တကယ်လို့သာ ကားသွင်းခွင့်ပေးတာတို့ ဒါမှမဟုတ် လိုင်စင်မဲ့ကားတွေကို လိုင်စင်ထုတ်ပေးမယ်လို့ ပြောလိုက်ရင်တော့ ကားဈေးက တဖုန်းဖုန်းနဲ့ ပြုတ်ကျလာမှာပဲ” လို့ ဒီဗွီဘီကို ပြောပါတယ်။
ရန်ကုန်ကားဝယ်ရောင်းစျေးကွက်မှာ အရောင်းအဝယ်တွေ အေးနေပြီး အမြင့်စျေးနဲ့ မိထားတဲ့သူတွေအနေနဲ့ စျေးချရောင်းနိုင်မှသာ အရောင်းအဝယ်ဖြစ်မယ်လို့ ကားဝယ်ရောင်း လုပ်ကိုင်သူတွေက ပြောပါတယ်။
စစ်ကောင်စီက ပြည်တွင်းမှာ အမေရိကန်ဒေါ်လာလိုအပ်ချက်ရှိနေတာကြောင့် ကားပါမစ် (ပြည်ပမှ ကားအသစ်တင်သွင်း ခွင့်) တွေကို ပြီးခဲ့တဲ့ စက်တင်ဘာလမှာ ရပ်ဆိုင်းလိုက်ပါတယ်။
ဒီအကျိုးဆက်ကြောင့် ရန်ကုန်ကားဝယ်ရောင်းစျေးကွက်မှာ ကားစျေးက တက်သွားခဲ့ပြီး အရောင်းအဝယ်လည်း လိုက်ခဲ့တာ တွေ့ရတယ်လို့ ကားဝယ်ရောင်းလုပ်ကိုင်သူတဦးက ပြောပါတယ်။
“ကားပါမစ် ပိတ်ပိတ်ချင်းကာလတုန်းက နည်းနည်းဝယ်လိုအားများခဲ့တယ်။ တဘက်ကလည်း အဲ့အချိန်က ဒေါ်လာတန်ဖိုးက တက်နေတာလည်း ပါတာပေါ့နော်။ ဒါကြောင့် တချို့ကလည်း ဒေါ်လာအစား ကားဝယ်လိုက်ကြတာပေါ့နော်။ ပြီးတော့ နောက်တချက်က ကားပါမစ်ပိတ်ပေမယ့် SKD ကတော့ မပိတ်ထားဘူးနော်။ ဒါပေမဲ့ SKD ထုတ်ကားတွေက ကိုဗစ်ကြောင့် စက်ရုံတွေ မလည်နိုင်ကြသေးဘူး။ အခုတော့ စက်ရုံတွေက ပြန်လည်နေကြပြီနော်။ အဲ့တော့ ကျနော် ထင်တယ်။ ဒီဇင်ဘာအကုန်လောက်ဆိုရင် SKD ထုတ်ကားတွေ ပြန်ထွက်ကြလိမ့်မယ်။ ကားရှားသွားတဲ့ အကြောင်းအရင်းကလည်း SKD မလည်ကြတဲ့ အချက်တခုလည်းပါတယ်။ SKD စက်ရုံတွေကိုတော့ ဘယ်သူမျှပိတ်ခိုင်းတာတော့မဟုတ်ဘူး။ ကိုယ့်ဘာသာပိတ်ကြတာလေ။ အဲ့အချက်တွေစုံပြီးတော့ ကားစျေးက တက်သွားခဲ့တာပါ။ အရောင်းအဝယ်တွေလည်း ကောင်းခဲ့တယ်။ ပြီးခဲ့တဲ့ စက်တင်ဘာလကုန်နဲ့ အောက်တိုဘာလဆန်းအချိန်တုန်းကလေ။ ဒါပေမယ့် အခုနောက်ပိုင်းကျတော့ ဒေါ်လာစျေးတွေလည်း ပြန်ကျသွားပြီ။ အခုဆိုရင် အရောင်းအဝယ်တွေကလည်း ပြန်အေးသွားပြီနော်။ စျေးကတော့ မကျဘူး။ ဘာလို့လဲဆို ဝယ်ထားတဲ့သူက နှစ်ဆင့်ဖြစ်သွားလို့လေ။ လက်ရှိကားစျေးက အေးပါတယ်။ အခုရောင်းချင်ရင်တော့ လျှော့ရောင်းမှ ရမယ်။ ပေါက်စျေးနဲ့တော့ ဘယ်သူမျှမဝယ်ကြဘူးနော်။”
ပြည်တွင်းမှာ SKD စနစ်နဲ့ထုတ်လုပ်ပြီး ရောင်းချနေတဲ့ ဆူဇူကီးကားကုမ္ပဏီနဲ့ ဟွန်းဒိုင်းကားကုမ္ပဏီတို့ရှိကြရာ ယင်းကုမ္ပဏီတွေက ထုတ်တဲ့ကားသစ်တွေကို လူကြိုက်များပြီး လက်ခံလာတဲ့အတွက်ကြောင့် ရန်ကုန်ကားဝယ်ရောင်းစျေး ကွက်မှာ ဂျပန်တပတ်ရစ် အဟောင်းကား (ဂျပန် used car) နဲ့ ပြည်တွင်းမှာ SKD စနစ်နဲ့ တပ်ဆင်ထုတ်လုပ်တဲ့ ကားသစ် ဆိုပြီး စျေးကွက် ၂ မျိုးနဲ့ အရောင်းအဝယ်ရှိနေတာပါ။
အသစ်ကားစျေးကွက်မှာ SKD တွေက ၇၀ ရာခိုင်နှုန်းလွှမ်းမိုးထားတာဖြစ်ပြီး SKD ထုတ် ကားတွေပြန်ထွက်လာပါက ကားအသစ်စျေးကွက်က ပုံမှန် ပြန်ဖြစ်သွားမယ်ထင်တယ်လို့ ကားအရောင်းစင်တာပိုင်ရှင်တဦးက ပြောပါတယ်။
“SKD ထုတ်ကားတွေကို ဒေါ်လာနဲ့ပဲရောင်းရောင်း၊ ကျပ်ငွေနဲ့ပဲ ရောင်းရောင်း စျေးကသိပ်မကွာပါဘူး။ ဒေါ်လာစျေးကလည်း ဗဟိုဘဏ်သတ်မှတ်ရည်ညွှန်းနှုန်းနဲ့ အကြမ်းဖျဉ်း ၁၇၀၀ ကျော်နဲ့ တွက်ကြတာလေ။ အခုက ဒေါ်လာစျေးနဲ့ အများကြီးစျေးတင်ပြီးရောင်းလို့မှ မရတာ။ ကားစျေးတက်တယ်၊ ကျတယ်ဆိုတာ ကားအမျိုးအစားအပေါ်မူတည်ပြီး စိတ်ဝင်စားကြတာပါ။ အခုမှ ကားစစီးမည့်သူက သိန်း ၂၀၀ အောက်ကားကို ရှာကြတာ။ အဲ့ကားတွေက လောလောဆယ် မလွယ်လှဘူး။ ပြီးတော့ ဒီ ဂျပန် used car တွေက မြန်မာပြည်မှာတင် သုံးတာက ၁၅ နှစ်လောက်ရှိပြီနော်။ အဲ့တော့ သူတို့ ဘတ်ဂျက်နဲ့ဝင်တဲ့ ကားက အညံ့ဖြစ်နေလောက်ပြီ။ condition ကောင်းတဲ့ကားဆိုရင်တော့ စျေးခေါ်မှာပေါ့။ အဲ့လိုမျိုးတော့ ရှိတယ်။ ဒါပေမယ့် ခြုံပြီးပြောရရင် ကားစျေးကွက်က သိပ်အကောင်းကြီးမဟုတ်ပါဘူး” လို့ ပြောပါတယ်။
စစ်ကောင်စီခန့် ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီး ဦးအောင်နိုင်ဦးက မနေ့က မင်္ဂလာဒုံမြို့နယ်ရှိ ခရီးသည်တင်ယာဉ်တွေ တပ်ဆင်ထုတ်လုပ်ရောင်းချတဲ့ SC Auto (Myanmar) ကုမ္ပဏီကိုသွားရောက်ပြီး လျှပ်စစ် ခရီးသည်တင်ယာဉ် (E-Bus) တွေကိုပြည်တွင်းဈေးကွက်မှာ ထုတ်လုပ်ဖို့ကိစ္စ ဆွေးနွေးခဲ့တယ်လို့သိရပါတယ်။
